Վարդգես Արծրունու կյանքի անցած ճանապարհը մարդկային արժանապատվության եւ իմաստնության վառ օրինակ է

Երեք տարի անցավ   հայտնի պետական, հասարակական գործիչ, վաստակավոր շինարար եւ բարերար Վարդգես Արծրունու մահվան օրվանից:

Վարդգես Արծրունին ծնվել է 1941թ. հոկտեմբերի 31-ին Կիսլովոդսկում: Ծառայությունից հետո ընդունվել է Մոսկվայի շինարարական ինստիտուտը: Արդեն 1979-ից նա ղեկավար պաշտոններ էր զբաղեցնում շինարարական ոլորտում:

Նա իր կյանքը չէր զատում իր Հայրենիքի ճակատագրից  եւ անում էր իրենից կախված ամեն ինչ` ամրապնդելու հայ-ռուսական բարեկամական հարաբերությունները:

Վարդգես Արծրունին եղել է Խորհրդային Հայաստանի Նախարարների խորհրդի նախագահի տեղակալ, շինարարական կոմիտեի նախագահ: 1988թ. երկրաշարժից հետո ղեկավարել է աղետի հետեւանքների վերացման շտաբը: Շնորհիվ նրա անհետաձգելի միջոցառումների մասին անհապաղ կայացրած որոշումների,  փրկվեցին բազմաթիվ կյանքեր:

Ավելի քան 60 տարի շինարարության ոլորտում աշխատելով, նա իր մեծ լուման է ներդրել պատմաճարտարապետական ժառանգության պահպանման գործում: նա լուրջ աջակցություն է ցուցաբերել Մոսկվայի Լազարյան  ինստիտուտի շենքի վերակառուցմանը եւ Մոսկվայի նորակառույց հայկական եկեղուցու հողհատկացմանը: Մշտապես ակտիվ քննարկումներ է կազմակերպել հայոց ցեղասպանության, հայկական հարցի, ժամանակակից Թուրքիայի կողմից վարվող  հակահայկական եւ հակառուսական քաղաքականության թեմաներով: Հիմնադրել եւ հովանավորել է  հետազոտությունների ինստիտուտը, որն այսօր կրում է իր անունը:

Նա հովանավորել է նաեւ մի շարք հուշարձանների եւ քանդակների նախագծումը, պատրաստումն ու տեղադրումը թե Հայաստանում, թե Ռուսաստանում: Նրա վերջին ցանկությունն էր իր կողմից պատվիրված եւ արդեն պատրաստված ԱՄՆ նախագահ Վուդրո Վիլսոնի հուշարձանի տեղադրումը Երեւանում` ի նշան երախտիքի` նրա հայանպաստ գործունեության:

Իր միջոցներով տպագրել է հայագիտական, Հայոց եղեռնի մութ ծալքերը լուսաբանող, այդ թվում նաեւ ոչ հայազգի հեղինակների, հայ-ռուսական հարաբերություններին, ռուսահայ մեծանուն գործիչներին  նվիրված գրքեր, Հայ Առաքելական եկեղեցու պատմությանը եւ ճարտարապետությանը նվիրված  բազմահատոր ալբոմներ: Նրա հրատարակած գրքերը կարող են կազմել մի ամբողջ գրադարան:

1991 թվականից եղել է Մոսկվայի կառավարության շինարարության վարչության պետի տեղակալ: Իր գործունեության ընթացքում նա լուրջ աջակցություն է ցուցաբերել Մոսկվայի Լազարյան  ինստիտուտի շենքի վերակառուցմանը:

2020 թվականի հունիսին Գյումրու ավագանին    Վարդգես Բագրատի Արծրունուն հետմահու Գյումրու պատվավոր քաղաքացու կոչում շնորհեց:

Վարդգես Արծրունու կյանքի անցած ճանապարհը մարդկային արժանապատվության եւ իմաստնության վառ օրինակ է:

Վ.Բ.Արծրունու անվան Սեւծովյան

Կասպիական տարածաշրջանի համագործակցության ինստիտուտ