Կորյուն Առաքելյանի «Ադամալույսին ընդառաջ» բանաստեղծությունների նոր ժողովածուի լույս ընծայման առթիվ լոռեցի գրող, բանաստեղծուհի, վաստակաշատ մանկավարժ Ռոզա Վարդանյանի նախաձեռնությամբ Ստեփան Զորյանի տուն-թանգարանում կայացավ հանդիպում հեղինակի հետ: Հակիրճ խոսքով գրողին ներկայացրեց Ռոզա Վարդանյանը, ապա միջոցառմանը շուք հաղորդեցին «Ավետիս» ասմունքի խմբի ղեկավար Հռիփսիմե Ավետիսյանը եւ Վանաձորի պոեզիայի թատրոնի ղեկավար Ջիվան Սարգսյանը՝ ասմունքելով հեղինակի լավագույն գործերից:
Բանաստեղծի մտերիմ ընկեր՝ մանկավարժական գիտությունների դոկտոր, պրոֆեսոր, Վանաձորի պատվավոր քաղաքացի Վանդոս Ղարագյոզյանը պատմեց իրենց երկարամյա ընկերության մասին, հիշեց, որ Կորյունի ծնողների հյուրընկալ օջախում անմոռանալի օրեր են անցկացրել, պատմեց նաեւ հիշարժան դրվագներ իրենց երիտասարդ տարիներից:
Առաքելյանի կուրսընկերուհին՝ բանասիրական գիտությունների դոկտոր, պրոֆեսոր, ՎՊՄՀ-ի հայոց լեզվի ամբիոնի դասախոս Թերեզա Շահվերդյանը պատմեց իրենց ուսանողական տարիների հիշարժան դեպքերի մասին: ՀԳՄ Լոռու մարզի բաժանմունքի նախագահ, բանաստեղծ Մանվել Միկոյանը ներկայացրեց գրողի բանաստեղծական ձիրքն ու հարուստ ներաշխարհը: Դրամատուրգ, արձակագիր, երգիծաբան, ՀՀ մշակույթի վաստակավոր գործիչ Սամվել Խալաթյանը խոսեց բանաստեղծի ինքնատիպ գործերի մասին: Գյումրվա հարուստ խոսքով ու հումորով, երգ ու տաղով առանձնահատուկ շուք բերեց նրա ընկեր-բարեկամ, բազմաթիվ գրքերի հեղինակ Գագիկ Վարդանյանը: Իր Լոռվա քաղցրահունչ ձայնով յուրահատուկ գույն ու շունչ հաղորդեց Վանաձորի «Հորովել» անսամբլի մեներգիչ, ՀՀ վաստակավոր արտիստ Ստեփան Դալլաքյանը: «Գայանե» ռազմահայրենասիրական միության նախագահ Գայանե Փահլեւանյանն իր սրտի խոսքն ասաց եւ պատվոգիր հանձնեց Առաքելյանին:
«Լոռվա արվեստագետ» ֆիլմաշարի հեղինակ եւ ռեժիսոր, «Արվեստագետ» հանդեսի գլխավոր խմբագիր Իվան Ատոնյանը կարդաց հեղինակի գործերից եւ շնորհակալագիր հանձնեց նրան: Շնորհավորանքի խոսք ասաց թանգարանի տնօրեն Լիլիթ Չոբանյանը՝ հեղինակին նվիրելով Ստեփան Զորյանի օրերս վերահրատարակված պատմվածքների ժողովածուն: Բանաստեղծի ստեղծագործություններից հանդիսատեսին ներկայացրեցին Վանաձորի պոեզիայի թատրոնի ասմունքողներ, հանրապետական մրցույթների դափնեկիրներ Հրաչուհի Լոռեցյանը, Էմմա Ղամբարյանը:
Գագիկ ԱՆՏՈՆՅԱՆ
Լոռի
