Լոռու մարզում, Հովհան Օձնեցի Իմաստասեր կաթողիկոսի ծննդավայր Օձուն գյուղում օրը տոնական էր։ Օձունի երիտասարդական կենտրոնի եւ համայնքապետարանի նախաձեռնությամբ 5-7-րդ դարերում կառուցված Սուրբ Աստվածածին տաճարի բակում տեղի ունեցավ ազգայինի պահպանմանը միտված միջոցառում, որը բաղկացած էր երկու մասից։ Առաջին մասում ելույթ ունեցան Ալավերդի քաղաքի «Լազուր» ժողգործիքների եւ դհոլահարներ համույթները, այնուհետեւ՝ Օձունի արվեստի դպրոցի սաները։ Տեղի ունեցավ նաեւ նկարների ցուցահանդես։
Միջոցառման երկրորդ մասը շարունակվեց «Մաթեմիկ» ՀԿ-ի, ՈՄԱ Վանաձորի, Երեւանի Իրական դպրոցի, «Վարը Վարենկ» ՀԿ-ի ներկայացուցիչների մասնակցությամբ։ ՈՄԱ Վանաձորը ցուցադրեց ռազմամարզական որոշ վարժություններ։ Ապա օրվա ազգային-ավանդական մասն ապահովեց «Վարը Վարենկ» կրթամշակութային հասարակական կազմակերպությունը, որը ձեւավորվել է ամենատարբեր մասնագիտություններ ունեցող, բայց ազգայինի շուրջ համախմբված կամավորների շնորհիվ։ Վարվորները, այցելելով Հայաստանի տարբեր համայնքներ, իրականացնում են ազգային պարերի եւ երգերի ուսուցում, ավանդական խաղերի եւ ծեսերի կազմակերպում, ավանդական ուտեստների հյուրասիրություն։ Այս կերպ նրանք կենցաղ են վերադարձնում ազգայինը։ Թիմում կան պարուսույցներ, երաժիշտներ, երգուսույց, ծիսաբան, խաղավար։ Նախաձեռնությունն սկիզբ է առել 44-օրյա պատերազմից հետո։ Իրենց խոսքով՝ վարվորներն այս նախաձեռնությամբ լուծում են այնպիսի խնդիրներ, ինչպիսիք են ինքնաճանաչողության ու հայրենաճանաչության մեծ բացը, հայրենատիրության եւ հայրենասիրության պակասը, ինքնության պահպանման գաղափարի բացակայությունը, ազգային համընդհանուր նպատակի չգոյությունը։
Օձունի տաճարի բակում կայացած միջոցառման ընթացքում վարվորներն իրականացրին պսակադրության ծեսը, սակայն, մինչեւ դրան անցնելը, կազմակերպեցին ազգային պարերի եւ երգերի ուսուցում, որն օգտագործելու էին ծեսի ժամանակ։ Նախ վարվորներից եւ միջոցառման մասնակիցներից ընտրվեցին դերակատարներ, ապա ազգային խաղերի, երգ ու պարի ուղեկցությամբ իրականացվեց հարսանեկան ծեսը։ Պարի միջազգային օրվան նվիրված միջոցառումն ավարտվեց «Յարխուշտա» ռազմապարով։ Տեսնելով երեխաների հետաքրքրվածությունը, ակտիվ մասնակցությունը՝ օրը կարող ենք համարել հաջողված եւ հուսալ, որ նման միջոցառումները վարակիչ կլինեն Հայաստանի տարբեր բնակավայրերում։
Գայանե ԸՌՔՈՅԱՆ
ՃՇՀԱՀ ճարտարապետության ֆակուլտետի 2-րդ կուրսի ուսանողուհի
