Հայաստանի նկարիչների միության «Արա Սարգսյան» ցուցասրահում տեղի ունեցավ ՀՀ վաստակավոր նկարիչ Արմեն Վահրամյանի անհատական ցուցահանդեսի բացման արարողությունը։ Ընկերներ, հարազատներ, արվեստի բնագավառի ներկայացուցիչներ… Բոլորը հավաքվել էին դիտելու եւ շնորհավորելու նկարչի 55- ամյակին նվիրված հոբելյանական ցուցահանդեսը։
«Նկարիչ, որը պարզապես իր կյանքը չի կարող պատկերացնել առանց արվեստի, նրա նկարները ապրեցնում են եւ հոգուն խաղաղություն փոխանցում»,- բացման արարողությանը նշեց Հայաստանի նկարիչների միության նախագահ Սուրեն Սաֆարյանը։ Ըստ բանաստեղծ, լուսանկարիչ, հասարակական գործիչ Գրիգոր Մաչանենց Բաբախանյանի` նկարիչների միությունը դարձել է «սիրո արտադրության տուն», որի անդամներից վարպետը` Արմեն Վահրամյանը, «իր մեջ ամբողջ տիեզերք վերապրած մարդ է»։
Արմեն Վահրամյանը ընդգծում է, որ յուրաքանչյուր նկարիչ կարող է ոգեշնչվել ամենից, բայց ոգեշնչման աղբյուրը ոչ միշտ է հայտնի լինում նկարչին, պարզապես, այն տրվում է Աստծո կողմից: «Ամեն նկար պահանջում է իր մոտեցումը, կոլորիտն ու տրամադրությունը, գույնը, բայց բոլոր դեպքերում ավելի շատ գերադասում եմ հողային գույները, ամեն նկարի մեջ սեր եմ դնում, որպեսզի գնա այդ սերը մարդկանց սրտերն ու ջերմացնի նրանց»,- նշում է արվեստագետը։ Նրա միտքը կիսում են նաեւ այցելուները, որովհետեւ ինչպես խոսքում նշում էին նրանցից մի քանիսը, ավելի շատ կտավներում ակնառու էին այն սերն ու խաղաղ ներդաշնակությունը, որը նկարիչն իր վրձնի տաղանդով պատկերել էր։
Հեղինե ՄԽԻԹԱՐՅԱՆ, Դավիթ ԲԱՂՐԱՄՅԱՆ
ՀՊՄՀ լրագրության բաժին
