Վ. Բրյուսովի անվան պետական համալսարանը Կ. Դեմիրճյանի անվան մարզահամերգային համալիրում կազմակերպել էր դիպլոմների հանձնման արարողություն:
Համալսարանականների համար այս ուսումնական տարին հեշտ չէր` պայմանավորված կորոնավիրուսային համավարակով ու 2020 թ. 44-օրյա պատերազմով: Այնուամենայնիվ, եւ՛ պրոֆեսորադասախոսական կազմը, եւ՛ ուսանողությունը հաջողությամբ հաղթահարեցին 2020-21 ուստարվա դժվարությունները` միմյանց աջակցելու շնորհիվ:
Միջոցառումը սկսվեց 44-օրյա պատերազմի զոհերի հիշատակը մեկ րոպե լռությամբ հարգելով: Պատերազմում ընկած հերոսների շարքերում են նաեւ ԲՊՀ ուսանողներ: ԲՊՀ ռեկտոր Կարինե Հարությունյանն իր ելույթում նշեց, որ գրեթե կանոնավորել էին համավարակի պայմաններում ուսուցումը, սակայն պատերազմն էլ իր հերթին ավելի խաթարեց ուսումնական բնականոն գործընթացը: Եվ այդ ծանր օրերին համալսարանի ողջ ուսանողությունն ու դասախոսները հանձն էին առել ռազմաճակատում կռվող զինվորներին օգնելու, սատարելու եւ Արցախից տեղահանվածներին աջակցություն ցույց տալու պատասխանատու գործը: Հուլիսի 16-ը ուսանողների կյանքում միակ տոնն էր համավարակի եւ պատերազմի արհավիրքներից հետո: Ռեկտորի խոսքերով` շուրջ 800 ուսանող ստացել է ավարտական դիպլոմ եւ ԲՊՀ-ի ուսանողները բավական արագ են աշխատանքի տեղավորվում` լինելով շատ մրցունակ, քանի որ տիրապետում են նվազագույնը երկու օտար լեզվի:
Ելույթ ունեցավ նաեւ համալսարանի հոգաբարձուների խորհրդի նախագահ Տիգրան Հակոբյանը, ով իր խոսքում նշեց, որ գուցե պատահական չէ, որ պատերազմից հետո են ուսանողները ստանում դիպլոմները, քանի որ հենց նրանց է վիճակված հաղթահարել այդ տրամադրությունները եւ ծաղկեցնել մեր երկիրը:
Շրջանավարտների անունից ելույթ ունեցող Եվա Հարությունյանն էլ, բացի շնորհակալական խոսքերից, հավաստիացրեց, որ ԲՊՀ ուսանողներն իսկապես բավական մրցունակ մասնագետներ են, ովքեր անպայմանորեն նպաստելու են մեր երկրի հզորացմանը:
Ի դեպ, «ՀՀ» աշխատակցուհի Մարիամ Ավագյանը եւս ԲՊՀ այս տարվա շրջանավարտներից է, ում հանձնվեց գերազանցության կարմիր դիպլոմ, ինչի առթիվ ջերմորեն շնորհավորում ենք նրան եւ մաղթում նոր հաջողություններ:
