Ամերիկայի Միացյալ Նահանգները մտահոգված է Հայաստանի եւ Ադրբեջանի սահմանին գրանցվող միջադեպերով, հատկապես՝ Երասխ/Սադարակ հատվածի վերջին դեպքերով: Այս մասին հայտարարել է Հայաստանում ԱՄՆ դեսպանատունը:
«Մենք երկու կողմերին կոչ ենք անում արագ եւ խաղաղ կերպով թուլացնել լարվածությունը եւ առարկայական բանակցությունների վերսկսման տիրույթ ստեղծել», – նշված է դեսպանության տարածած հայտարարության մեջ:
Հուլիսի 19-ին, սահմանային իրադրությունը լարված է եղել Նախիջեւանի ուղղությամբ՝ Երասխ գյուղի հատվածում: ՀՀ ՊՆ-ի հաղորդմամբ՝ հուլիսի 19-ի երեկոյան ադրբեջանական զինված ուժերը, ժամը 18:40-ից սկսած, մի քանի ժամ շարունակ, տարբեր տրամաչափի հրաձգային զինատեսակներից գնդակոծել են հայ-ադրբեջանական սահմանի Երասխի հատվածում տեղակայված հայկական դիրքերը: Պարբերաբար կիրառվել են նաեւ ականանետեր: Հակառակորդի կրակոցից վիրավորում է ստացել Երասխ համայնքի ղեկավար Ռադիկ Օղիկյանը, որն այդ պահին կազմակերպում էր ադրբեջանցիների գործողությունների արդյունքում տեղանքում բռնկված հրդեհը մարելու աշխատանքները։ Հուլիսի 20-ի առավոտյան տեղեկացնելով, որ ադրբեջանական զինուժը շարունակել է Երասխի հայկական դիրքերի գնդակոծումը, նաեւ շեշտել է, որ ՀՀ զինված ուժերը շփման գծի որեւէ փոփոխություն թույլ չի տալու:
