Արդեն մի քանի օր է, ինչ սոցցանցերում շրջանառվում է մի տեսանյութ, որտեղ հստակ երեւում է, թե Կապան-Գորիս ավտոճանապարհի Որոտանի հատվածում «հերթապահող» ադրբեջանցի զինվորներն ինչպես են թիրախավորել Արցախի ֆուտբոլի պատանեկան թիմի անդամներին՝ նրանցից պահանջելով «համապատասխան փաստաթղթեր»: Իրենց կասկածները «փարատելու» համար ադրբեջանցիները մեկառմեկ հետախուզել են տղաների բջջային հեռախոսները՝ դրանցում փնտրելով «լրտեսություն» պարունակող նկարներ եւ այլ նյութեր:
Սակայն դրանով «դիմակավորված» զինվորները չեն բավարարվել եւ սկսել են մանրակրկիտ զննել ավտոմեքենայի «պարունակությունը»՝ փորձելով ամեն գնով ինչ-որ բան «գտնել»: Իմանալով, որ տղաներն Արցախից են, վերջիններս հետաքրքրվել են, թե «ինչ նպատակով են Կապան գնացել ու ինչ են իրենց հետ տարել այնտեղ»: Ադրբեջանցիները, տեղեկանալով, որ Արցախի պատանիների թիմն ընկերական խաղում 8:1 հաշվով հաղթել է Կապանի թիմին, լկտիաբար հռհռացել են եւ սկսել ծաղրել. «Ղարաբաղը Արցախ եք դարձրել՝ հերիք չէ, դեռ մրցումների էլ եք գնո՞ւմ»,- ասել է նրանցից ավագն ու հայացք ձգելով ավտոմեքենայի համարանիշին եւ քիչ վերեւ պատկերված դրոշին՝ գրպանից հանել է դանակն ու սուր ծայրով սկսել քերել այն:
Դիմակավորված ադրբեջանցիների ջանքերն ապարդյուն են անցել՝ երեխաներին համոզելու, թե «Ադրբեջանը պետական մի դրոշ ունի, եւ Ղարաբաղը նրա տարածքի անբաժանելի մասն է»: Երբ մեքենայում համակ լռություն է տիրել, զինվորներն ավելի են կատաղել՝ սպառնալով, որ երեխաները եթե միաձայն չասեն՝ Ղարաբաղը Ադրբեջանինն է, մեքենային թույլ չեն տալու շարժվել… Տղաները, բնականաբար, համառորեն լռել են, իսկ ադրբեջանցի զինվորները նրանց երկու ժամ պահելուց հետո ֆշշացրել են. «Ռադ եղեք, ձեզ այստեղ էլ չտեսնենք»…
Տեղի ունեցածն ահաբեկչական դասական օրինակ է որակել ԱՀ կրթության, գիտության, մշակույթի եւ սպորտի նախարար Լուսինե Ղարախանյանը, ինչը, նրա մեկնաբանմամբ, ատելության եւս մեկ դրսեւորում է, մարդու իրավունքների կոպտագույն խախտում: Նախարարի համոզմամբ՝ սպորտը երբեք չի կարելի քաղաքականացնել, եւ, բառի լայն իմաստով, այն հատում է բոլոր սահմանները: «Նման սադրիչ, ահաբեկչական գործողությունները կողմերի միջեւ միմիայն կարող են սրել լարվածությունը եւ վտանգել 2021 թ. ձեռք բերված եռակողմ համաձայնագրի լիարժեք իրագործումը»,- նշել է նա:
Նախարարը կարեւորել է մարզիկների սառնասրտությունը, ովքեր չեն տրվել ահաբեկիչների սադրանքին: Քաջալերելով տղաներին՝ նա հույս է հայտնել, որ «պատանի ֆուտբոլիստները կշարունակեն սպորտով զբաղվել ու նվաճել բարու, հաղթանակի, ուժի, ինքնահաղթահարման սահմանները»:
Հավելենք, որ թիմը 2020-2021 թթ. ՀՀ պատանիների ֆուտբոլի առաջնության չեմպիոն է: Իսկ Գերմանիայի Լայպցիգ քաղաքի 16 երկրի ֆուտբոլի պատանիների մրցությունում այս տարի տղաները նվաճել են երկրորդ պատվավոր տեղը:
