Գործադիրի երեկվա նիստում համապատասխան որոշմամբ փոփոխություններ արվեցին կառավարության 2010 թ. դեկտեմբերի 30-ի N 1734-Ն եւ 2013 թ. դեկտեմբերի 26-ի N 1489-Ն որոշումներում։
Տեղեկացնենք, որ 2010 թ. որոշումը վերաբերում էր հիմնական կենսաթոշակի, նվազագույն կենսաթոշակի եւ թաղման նպաստի չափերը, ստաժի մեկ տարվա արժեքը, պարտադիր ժամկետային զինվորական ծառայության շարքային կազմի զինծառայողների հաշմանդամության եւ նրանց ընտանիքների անդամների կերակրողին կորցնելու դեպքում կենսաթոշակների չափերը սահմանելուն։
Իսկ 2013 թ. որոշումը ծերության, հաշմանդամության, կերակրողին կորցնելու դեպքում նպաստների եւ թաղման նպաստի չափերը սահմանելու մասին էր։
Ըստ աշխատանքի եւ սոցիալական հարցերի նախարարի, փոփոխությունների նպատակը կենսաթոշակառուների, ծերության, հաշմանդամության եւ կերակրողին կորցնելու դեպքում նպաստ ստացողների շրջանում «ծայրահեղ աղքատությունը հաղթահարելն է»։ Եվ որ կառավարության ծրագրի համաձայն, պարբերաբար բարձրացվելու են պետական կենսաթոշակների չափերը՝ ապահովելով միջին կենսաթոշակի չափի առաջանցիկ աճ գնաճի նկատմամբ: Պետական կենսաթոշակների չափերի պարբերաբար ավելացումը 2022-2024 թթ. միջնաժամկետ ծախսային ծրագրով սահմանված սոցիալական ոլորտի ծախսային գերակայություններից մեկն է:
Այսպիսով՝ ինչ կարգավորում առաջարկվեց։
ԱՍՀ նախարարը տեղեկացրեց, որ 2022 թ. հունվարի 1-ից կսահմանվի այս չափերով։
1. Նվազագույն կենսաթոշակի չափը` 28600 դրամ (26500 դրամի փոխարեն)։
2. Պարտադիր ժամկետային զինվորական ծառայության շարքային կազմի զինծառայողի հաշմանդամության զինվորական կենսաթոշակի չափերը` ա) առաջին խմբի հաշմանդամի համար՝ 43000 դրամ (40.000 դրամի փոխարեն), բ) երկրորդ խմբի հաշմանդամի համար՝ 33000 դրամ (30.000 դրամի փոխարեն), գ) երրորդ խմբի հաշմանդամի համար՝ 30000 դրամ (27.000 դրամի փոխարեն)։
3. Պարտադիր ժամկետային զինվորական ծառայության շարքային կազմի մահացած (զոհված) զինծառայողի ընտանիքի անդամի կերակրողին կորցնելու դեպքում զինվորական կենսաթոշակի չափը՝ 30000 դրամ (27000 դրամի փոխարեն)։
Առաջարկվում է բարձրացնել նաեւ ծերության, հաշմանդամության եւ կերակրողին կորցնելու դեպքում նպաստների չափերը` դրանք սահմանելով 28600 դրամ (26500 դրամի փոխարեն), իսկ հաշմանդամ երեխա ճանաչված անձի համար՝ 37000 դրամ (26500 դրամի փոխարեն)։
Կառավարությունը խոստանում է՝ «քայլեր է ձեռնարկել մինչեւ 2026 թվականը նվազագույն կենսաթոշակի եւ կենսաթոշակի միջին չափերը հավասարեցնել, համապատասխանաբար` պարենային եւ սպառողական զամբյուղների արժեքներին, վերացնել ծայրահեղ աղքատությունը»։
Հիշյալ՝ 2010 եւ 2013 թթ. համապատասխան որոշումներում փոփոխություններով 2022 թ. պետական բյուջեի եկամուտների ավելացում կամ նվազեցում չի նախատեսվում, իսկ ծախսերը նախատեսված են 2022 թ. պետբյուջեով (բյուջեի նախագիծը կազմված է առաջարկվող այս ցուցանիշների հիման վրա)։
