«Ինձ թվում է, որ Խորեն Հակոբյանը, այո, փնտրեց եւ գտավ: Նա «Սասունցի Դավթին» ձեռք մեկնեց բավականին երկար ստեղծագործական փորձ ունենալուց հետո եւ ստեղծեց «Սասունցի Դավթի» նկարազարդումները, որոնք աչքի են ընկնում ընդգծված հայկականությամբ, շնչում են էպիկականությամբ, շնչում են մոնումենտալ լուծումներով…»:
Գրիգոր ԽԱՆՋՅԱՆ
Մեր ժողովրդի ստեղծած դյուցազնավեպերից ամենակուռն ու համապարփակը՝ «Սասունցի Դավիթ» էպոսը, իր արտացոլումն է գտել կերպարվեստում: Այն հարուստ, գունեղ նյութ է, ներշնչանքի աղբյուր նկարիչների, քանդակագործների, կոմպոզիտորների համար: Էպոսի առանձին հատվածներ, նրա հերոսներն իրենց գեղարվեստական կերպավորումն են ստացել կտավների, գրքի գրաֆիկայի, քանդակագործության, երաժշտության մեջ: Այս թեմային անդրադարձել են արվեստագետներ, նկարահանվել է մուլտֆիլմ:
Հայ նկարիչներից շատերն են ոգեշնչվել էպոսի հերոսական պատումներով ու կերպարներով: Նրանցից յուրաքանչյուրը հանդես է եկել էպոսի ուրույն մեկնաբանությամբ: Հակոբ Կոջոյանի, Սեդրակ Ռաշմաճյանի, Երվանդ Քոչարի, ուրիշ շատ արվեստագետների գործերում կերպարներն առանձնանում են գեղարվեստական տարբեր լուծումներով, սակայն բոլորին միավորում է հայոց դյուղցազնավեպի էպիկական շունչը փոխանցելու ձգտումը: Էպոսն այսօր էլ շարունակում է մնալ ստեղծագործական ինքնատիպ արարումների աղբյուր: Ահա «Սասնա ծռերի» մերօրյա լավագույն պատկերազարդողներից մեկը՝ Խորեն Հակոբյան վրձնի վարպետը, ով առաջինն է մեզանում ստեղծել դյուցազնավեպի ամենամանրամասն նկարազարդումների շարքը՝ ավելի քան 220 տեսարաններով (ջրաներկով եւ պաստելով արված աշխատանքներ) եւ 33 մեծամասշտաբ գործեր, որոնք ներկայացնում են էպոսի բոլոր՝ չորս ճյուղերի կարեւորագույն հատվածները: Տաղանդավոր նկարիչն այս շարքի մեծածավալ կտավներն առաջին անգամ հանրությանն է ներկայացրել 1994-ին՝ անհատական ցուցահանդեսով: Հենց այդ ցուցահանդեսի առիթով է իր հիացումն արտահայտել մեծանուն Գրիգոր Խանջյանը…
…Արտաշատի շրջանի Նորաշեն գյուղում ծնված արվեստագետն ավարտել է մայրաքաղաքի գեղարվեստի ուսումնարանը, 1972-ին՝ գեղարվեստաթատերական ինստիտուտը, եղել հայկական հեռուստատեսության բեմադրող նկարիչ, «Գարուն» ամսագրի գեղարվեստական խմբագիր, «Արեւիկ» մանկական հրատարակչության գլխավոր նկարիչ: 1992-ից ի վեր ստեղծագործում է որպես ազատ նկարիչ՝ համագործակցելով հայրենի եւ միջազգային հրատարակիչների, արվեստի կոլեկցիոներների հետ: Նրա պատկերազարդած գրքերը բազմիցս ցուցադրվել են միջազգային գրքի փառատոներում՝ Ֆրանկֆուրտի գրքի տոնավաճառ, Մոսկվայի ցուցահանդես: Խորեն Հակոբյանի վրձնով են պատկերազարդվել մեր նորանկախ հանրապետության եւ ԱՄՆ-ի արեւմտյան նահանգների հայկական դպրոցների դասագրքերից շատերը:
«Ես ավելի շատ նկարում եմ, քան խոսում». սակավախոս նկարչի խոսքերն են, որի արվեստանոցի պատուհանը միշտ բաց է ու բաց: Երեխաներն հաճախ են ծիկրակում այնտեղից, նայում նորաստեղծ կտավները, «գնահատում»: Իսկ երբ իր թոռնիկներն էլ են հավանում՝ ուրախությանը չափ ու սահման չկա…
Այսօր հայոց դյուցազնավեպի աննախադեպ հարուստ պատկերաշարերով առանձնացող ու հայտնի գեղանկարչի ծննդյան օրն է: Նոր ներշնչանքներ ու շքեղ արարումներ մաղթենք վրձնի նվիրյալին եւ իհարկե՝ նոր ու հնչեղ ցուցահանդեսներ:
