ԱՄՆ-ի Գլենդել քաղաքի «Creo Studio»-ում վերջերս բացվել է գեղանկարիչ Մուշեղ Գրիգորյանի ստեղծագործությունների անհատական ցուցահանդեսը, որը մեծ հետաքրքրություն է առաջացրել արվեստասերների շրջանում:
Յուրաքանչյուր արվեստագետի ստեղծագործական ուղին լի է խոչընդոտներով: Այն շարունակ զարգացող բարդ մի ընթացք է, որը ոչ բոլորին է տրված հաջողությամբ անցնել: Մուշեղ Գրիգորյանը թեեւ աշխարհ է եկել ի վերուստ տրված բացառիկ շնորհքով, սակայն անցել է իսկական արվեստագետին բնորոշ ստեղծագործական բարդ ուղի, հասունության ու վարպետության երկար ճանապարհ: Ուսուցչի հարցում, սակայն, նրա բախտը բերել է: Նկարիչը ծնվել ու մեծացել է ՀՀ ժողովրդական նկարիչ, նրբազգաց ու նրբանկատ արվեստագետ, գեղանկարի հրաշալի վարպետ Զուլում Գրիգորյանի ընտանիքում եւ, բնականաբար, մանկուց զբաղվել է նկարչությամբ, եղել Հայաստանի տարբեր շրջաններում, հիացել հայկական բնության գեղեցկությամբ ու անկրկնելիությամբ, սակայն չի մտածել նկարիչ դառնալու մասին եւ բարձրագույն կրթությունն ստացել է Երեւանի պոլիտեխնիկական ինստիտուտում, այնուհետեւ սովորել ՀՀ գիտությունների ակադեմիայի ասպիրանտուրայում:
Սերը դեպի նկարչությունը հորից աննկատ անցել է որդուն ու ամբողջությամբ գրավել նրա սիրտը: Մուշեղն իր հոգու խորքում սկսել է ավելի մեծ տեղ տալ նկարչությանը: Նա թողել է իր բուն մասնագիտությունն ու լրջորեն զբաղվել գեղանկարչությամբ: Շուտով նկարչի գործերը հայտնվել են Հայաստանի նկարիչների միության կազմակերպած խմբակային ցուցահանդեսներում, գրավել այցելուների ուշադրությունը, իսկ 1985 թ. բացվել է նկարչի առաջին անհատական ցուցահանդեսը: Հետագայում Գրիգորյանը բազմաթիվ ցուցահանդեսներ է ունեցել Ֆրանսիայում, Իսպանիայում, Ճապոնիայում, Ավստրիայում, ԱՄՆ-ում եւ այլ երկրներում, նրա գործերը ցուցադրվել են Բարսելոնայի, Լոնդոնի, Շանհայի «Արտ էքսպոներում»՝ ամենուրեք արժանանալով ջերմ ընդունելության եւ ամենատարբեր խավի խստապահանջ այցելուների դրվատանքին:
Մուշեղ Գրիգորյանն արդեն երրորդ անգամ ԱՄՆ-ում է։ 2016-ին ունեցել է ցուցահանդես Լոս Անջելեսի հայկական հյուպատոսությունում։ 2019-ից ներկայացվում է Նյու Յորքի Մանհեթենի «Ագորա» գալերեայի կողմից եւ 2019 թ. հոկտեմբերին ցուցադրվել է այդ գալերեայում։ Թագուհի Վարդանյանն ու Տիգրան Բաղդասարյանը Գլենդել քաղաքի իրենց պատկանող «Creo studio»-ում կազմակերպել էին նկարչի անհատական ցուցահանդեսը: Այն բացվել է ապրիլի 3-ին:
Թեեւ բազմաժանր նկարիչ է, սակայն Գլենդելյան ցուցահանդեսում Մուշեղ Գրիգորյանը հիմնականում ներկայացրել է իր բնանկարներն ու նատյուրմորտները: Նա բնապաշտ նկարիչ է: Նկարում է պարզ ու անկաշկանդ, անկեղծորեն եւ ներշնչումով, այնպես, ինչպես ինքն է տեսնում ու զգում շրջապատող աշխարհը: Նկարիչը բնության տարբեր վիճակները ներկայացնում է զգացմունքի ուժգնությամբ ու ինքնատիպ մեկնաբանությամբ: Նրա՝ թանձր ու հյութեղ կոլորիտով, գունային հարուստ նրբերանգներով, արտահայտիչ բնանկարները զարմացնում եւ հիացնում են իրենց գեղեցկությամբ ու ճաշակով: Այդ կտավներում, որոնց մեծ մասը Գրիգորյանը նկարել է բնության գրկում, պարզությունն ու նրբությունը լրացնում են իրար` դառնալով սիրով ու լավատեսությամբ լի, յուրօրինակ տրամադրությամբ հյուսված հեքիաթային հորինվածքներ: Նկարչի՝ հայկական բնության գողտրիկ անկյունները պատկերող գործերը լի են հոգեւոր էներգիայով, համոզիչ են, հուզում են դիտողին եւ հաղորդակից դարձնում նրա բանաստեղծական քնքուշ աշխարհին:
Գեղանկարչի արվեստում մեծ տեղ է գրավում նաեւ նատյուրմորտի ժանրը, եւ պետք է ասել, որ հենց այս ժանրում ավելի ակնառու դրսեւորվեցին Գրիգորյան նկարչի ստեղծագործական ես-ը, նրա բացառիկ շնորհքը: Նրա նատյուրմորտներում տաք ու տրամադրող գույներն առանձնանում են կոլորիտի բացառիկ արտահայտչականությամբ: Գեղանկարչի նատյուրմորտներում հիմնականում ծաղիկներ են, ամենատարբեր նուրբ, գեղեցիկ ծաղիկներ, բայց դրանց միջոցով Գրիգորյանը կարողանում է ստեղծել գույների, երանգների համադրությունների ու հակադրությունների բազմազանություն, որտեղ տաք, հյութեղ գույները միաձուլվում են վրձնի պարզ թրթիռի հետ ու դառնում են գեղեցիկ, անկրկնելի ստեղծագործություններ: Միակուռ կոմպոզիցիան, թանձր, հյութեղ գույների ու երանգների ճիշտ ընտրությունն ու նուրբ համադրությունը ենթարկվում են նատյուրմորտի բովանդակությանն ու առանձնահատուկ հնչողություն հաղորդում դրանց: Նկարիչը կարողանում է իր ապրումներն ու հույզերը հաղորդել դիտողին, գրավել նրա սիրտն ու արժանանալ ուշադրությանն ու համակրանքին:
Մուշեղ Գրիգորյանի՝ հայրենի եզերքի բնությունը պատկերող գողտրիկ կտավներից, միջավայրի գեղեցկությունը ներկայացնող նատյուրմորտներից յուրաքանչյուրի արտաքին հանգստության տակ քնարական մի տրամադրություն է թաքնված: Դրանք կատարված են գեղանկարի ինքնատիպ, գրիգորյանական գունեղ լեզվով, գունային ռիթմերի, պլաստիկական ձեւերի հարստությամբ եւ լավատեսություն ու տոնական տրամադրություն են հաղորդում դիտողին: Մ. Գրիգորյանի ստեղծագործությունները խոսում են ոչ միայն նկարչի տաղանդի մասին, այլեւ այն անկեղծ հետաքրքրության, որով նա վերաբերվում է իրեն շրջապատող աշխարհին:
Մնում է ավելացնել, որ հարուստ ու նուրբ հոգի ունեցող արվեստագետը հայկական արվեստ է մտել նոր ասելիքով, նոր խոսքով` հնարավորություն տալով դիտողին շփվելու Մուշեղ Գիրգորյան գեղանկարիչի տաղանդի զանազան դրսեւորումների, նրա գեղեցիկ ու անկրկնելի արվեստի հետ:
Սյուզաննա ՓԻԼՈՍՅԱՆ
Արվեստաբան
