Հաջողությունները ձգտումների ճանապարհին խիզախելու արդյունք են… Այն ճանապարհին, որը նախ դառնում է նշմարելի, ապա երեւութանում է, ապա եւ սկսում է ամբողջանալ: Համառորեն մեր ականջներն են խոթում առարկություն չհանդուրժող այն խոսքը, թե «ով փնտրում է, նա գտնում է»: Սակայն մեր սեփական փորձն աստիճանաբար ստիպում է մեզ հասկանալ, որ ոչ բոլոր փնտրողներն են գտնում: Սկյուդերին ասում է. «Եթե մենք անում ենք այն, ինչ կարող ենք, նշանակում է՝ մենք անում ենք այն, ինչ պարտավոր ենք անել»: Ճիշտ է՝ այստեղ առաջնահերթությունը պատկանում է կոնկրետ անհատականությանը, նրա խառնվածքին, որը եւ դառնում է սեփական ունակությունների ճանաչողը, կազմակերպիչն ու համակարգողը. երբ մղումն ազնիվ է, նրան պետք չէ թիկունքից հրել, նա ինքը կհարթի իր ուղին:
Իվան Անտոնյանը, տարակույս չունենալով, որ իր մղումն ազնիվ է, որ ինքն անում է իր գործը, միաժամանակ խոստովանում է ինքն իրեն եւ իրեն շրջապատող-իմացողներին, որ ինքը պարտավոր է այդ անել: Հետեւաբար, մենք էլ՝ նրա եւ նրա գործի հետ առնչվողներս, կարող ենք եւ պարտավոր ենք խրախուսել նրան, ոչ թե խրատել, մանավանդ որ ավելի հաճախ խրատում են նրանք, ովքեր ոչինչ չեն անում եւ փորձում են ժխտել գործի վերածված գաղափարը՝ փոխարենը ոչինչ չառաջադրելով: Ես ստույգ գիտեմ, որ լավ գործ կարող է անել միայն լավ մարդը, իսկ լավ մարդուն եւ նրա լավ գործին զորավիգ կարող են լինել միայն լավ մարդիկ:
Ինձ հնարավորություն է տրված ճշմարիտ գնահատել Իվանի իմացությունը, երբ այն արդեն արտահայտվել է կոնկրետ գործողության մեջ, որտեղ բացահայտվում են նաեւ նրա արժանիքները, հատկապես՝ սեփական ունակությունների հանդեպ վստահությունն ու հաստատակամությունը, որովհետեւ վստահությամբ արված գործի հետեւանքներն էլ են վստահելի: Այստեղ ուզում եմ նշել նաեւ, որ առավել գեղեցիկ է այն գործը, որը գեղեցկանում է սեփական փորձով.
-Բա թերությունները,-կասեն թերահավատները:
Ինչ կա որ, ես կարող եմ ինչ-որ տեղ նաեւ դժգոհ լինել, բայց իրավունք չունեմ չգնահատել՝ գիտակցելով, որ առողջ դժգոհության ներսում ապրում է առողջ բարեխոհությունը: Նաեւ կասեմ, որ պետք է զգուշանալ այն մարդկանցից, ովքեր թերություններ չունեն, եւ այն գործերից, որոնք զերծ են թերություններից:
Դե ինչ, ծափահարությունը պատկանում է նրան, ով ծափահարություն չի աղերսում:
