Հանրության դատին ներկայացվեց Ռիչարդ Հ. Թալերի «Սխալ վարքագիծ» նոր մասնագիտական գիրքը: Անգլերենից այն թարգմանել է Նունե Գաբրիելյանը, իսկ խմբագրել՝ ՀՀ նախագահ Վահագն Խաչատուրյանը։
ՀՀ նախագահ Վահագն Խաչատուրյանն իր խոսքում նշեց, որ այս գրքի հայերեն թարգմանությունը իր եւ մյուս տնտեսագետների համար մեծ նշանակություն ունի: «Սխալ վարքագիծը» հետաքրքրաշարժ պատմություն է ակադեմիական գիտակարգերը վերանայելու եւ տնտեսագիտության, ինքներս մեր ու աշխարհի վերաբերյալ մեր մտածելակերպի փոփոխության մասին: Եվ այս թարգմանությունը ավելի շատ գիրք է տնտեսագետների եւ գործարարների, իրենց առօրյա տնտեսական գործունեության համար, որտեղ կգտնեն նաեւ շատ հարցերի պատասխաններ, թե իրենց բիզնես գործունեության մեջ ինչո՞ւ մի բանը ստացվեց, մյուսը՝ ոչ: Հեղինակը եղել է գործնական տնտեսագետ եւ իր բոլոր եզրակացությունների մեջ որեւիցե կարծիք չի հայտնել, մինչեւ թվերի հետ չի աշխատել եւ ուսումնասիրություններ չի կատարել: Եվ իր խորհուրդը մեզ՝ տնտեսագետներիս սա է՝ հավաքեք թվեր, տվյալներ եւ նոր դրանից հետո կարող եք ընդհանուր եզրակացություններ անել»,- ասաց նախագահը:
Հայաստանի ազգային պոլիտեխնիկական համալսարանի ռեկտոր Գոռ Վարդանյանը նշեց, որ Նոբելյան մրցանակի դափնեկիր Ռիչարդ Հ. Թալերն իր ողջ կարիերայի ընթացքում ուսումնասիրել է արմատական այն գաղափարը, որ տնտեսագիտության կենտրոնական խաղացողը սխալների հակում ունեցող, կանխատեսելի մարդն է:
«Պոլիտեխնիկական համալսարանը, լինելով ինժեներական կրթության եւ գիտելիքի կենտրոնատեղի, ողջունում է առհասարակ նմանօրինակ միջոցառումները եւ իր պատրաստակամությունն է հայտնում այս միջոցով եւ մեր հնարավորությունների շրջանակում գիտելիքը տարածել: Այս գրքում, ըստ էության, այնպիսի մոտեցումներ կան, որոնք ոչ ֆորմալ են եւ ծնվել են գիտության, փիլիսոփայության եւ հոգեբանության համադրության արդյունքում»,- ասաց Վարդանյանը:
Նրա խոսքով՝ յուրաքանչյուր մասնագիտություն ունի իր փիլիսոփայությունն ու հոգեբանությունը, եւ շատ երիտասարդ ինժեներներ, ծանոթանալով այս գրքի բովանդակությանը, ավելի կմոտենան մասնագիտական գործունեությանը:
Միջոցառման ընթացքում Թալերի սկզբունքների եւ գաղափարախոսության մասին ելույթներ ունեցան եւ քննարկումներ իրականացրեցին ոլորտի առաջատար մասնագետներ:
Նշենք, որ գրքի տպագրության հովանավորն է «Ապավեն» ընկերության տնօրեն, Հայաստանի արդյունաբերողների եւ գործարարների միության նախագահ Արսեն Ղազարյանը։
