Այսպիսի վերտառությամբ՝ «Դպրոց» վեպից հատվածով սկսվող «Մաշտոց» հանդեսի Գիրք «84»-ը՝ նվիրված հանդեսի 25-ամյակին, լույս ընծայվեց «Վան Արյան» հրատարակչության տպագրատան աջակցությամբ:
Քառորդ դարի պատմություն ունեցող հանդեսը ցայսօր լույսընծայել է ութ տասնյակից ավելի համարներ՝ յուրաքանչյուրը հինգ տպագրական մամուլ ծավալով, յուրօրինակ հետաքրքիր բովանդակությամբ: Հոբելյանական համարի առաջնորդող՝ հանդեսի ստեղծման պատմություն-էսսեին հաջորդում է բանաստեղծ Գագիկ Խաչատրյանի երկու տասնամյակ առաջ «Բոլոր Ք» պատմամշակութային պարբերականում «Արարման տենչով» վերտառությամբ հրապարակած «Մաշտոց» հանդեսի հիմնադրի վերաբերյալ խոսքը:
Հաջորդիվ հանդեսի հոբելյանը «Քառորդ դար ապրող եւ ապրեցնող հանդես» վերնագրված շնորհավորանքի խոսք է ասում «ՀՀ» օրաթերթի գլխավոր խմբագիր Արթուր Ղարագյոզյանը: Հանդեսի հոբելյանը շնորհավորում են նաեւ «Հայկական հանրագիտարան հրատարակչության» գլխավոր խմբագիր- տնօրեն Հովհաննես Այվազյանը, բանաստեղծ Լեւոն Բլբուլյանը , մ. գ. դ., պրոֆեսոր, ՌԴ ԿԱ ակադեմիկոս, ՀՀ արվեստի վաստակավոր գործիչ Լեմս Ներսիսյանը:
Այնուհետեւ հանդեսի ու նրա հիմնադիր խմբագրի վերաբերյալ «Մաշտոցաշունչ մյուռոնած հանդեսը 25 տարեկան է» վերնագրված սրտառուչ խոսքով հանդեսի հոբելյանը շնորհավորում է տաղանդաշատ երիտասարդ քանոնահարուհի Մարիաննա Գեւորգյանը:
Բար ու բանի մաղթանքներով շնորհավորանքի խոսք է ասում բանաստեղծ Ռաֆայել Մարգարյանը:
Հոբելյանական համարում «Աշխարհահռչակ հայ բանաստեղծը» հոդվածով ներկայացվում է հանդեսի հիմնադիր խմբագիրներից՝ տառաստեղծ Էդիկ Ղաբուզյանը:
Ընդարձակ խոսքով հանդես է գալիս «ՀՀ» օրաթերթի թղթակից, երգիծաբան, դրամատուրգ Գագիկ Անտոնյանը ՝ մեկնաբանելով «Մաշտոցի 25-ամյա անշեղ ընթացքը»: Հաջորդիվ «Վահագն Մուղնեցյան-15 » խորագրի տակ «25 տարի «Մաշտոցի» հետ ու «Մաշտոցի» համար» վերնագրի տակ լուսաբանվում է տաղանդավոր գրողի ու «Մաշտոց» հանդեսի 25- ամյա բարեկամությունը եւ ներկայացվում են մուղնեցյանական հրաշալի պոեզիայի գոհարներ: Նույն խորագրի ներքո Մուղնեցյան գրողի ստեղծագործության վերաբերյալ խոսք են ասում բ. գ. դ., պրոֆեսոր Գուրգեն Խաչատրյանը եւ բ. գ. թ., դոցենտ Վալերի Փիլոյանը:
Այնուհետեւ հանդես է գալիս ՀՀ ՄԳԱ ակադեմիկոս, լեզվաբան, պրոֆեսոր Լավրենտի Միրզոյանը, իր խոսքը վերնագրում՝ «Իմ շատ սիրելի «Մաշտոց» հանդեսը»:
Լրագրող, երգիծաբան, դրամատուրգ Գագիկ Անտոնյանը պատկերավոր ներկայացրել է մայր թերթն ու նրա խմբագիր Արթուր Ղարագյոզյանին: «ՀՀ» օրաթերթի գլխավոր խմբագիր Արթուր Ղարագյոզյանին «Մաշտոցի» բարձրաճաշակ ընթերցողին է ներկայացրել նաեւ հանդեսի գիտական խմբագիրներից, մ.գ.դ., պրոֆեսոր, Վանաձորի պատվավոր քաղաքացի Վանդոս Ղարագյոզյանը:
«Էդվարդ Միլիտոնյան-70» խորագրի ներքո ներկայացված է «Վաստակաշատ գրողն ու մշակութային գործիչը՝ ում միտքն ու գործը ներդաշնակ են»:
«Ժամանակի գիր» խորագրի տակ Մանվել Միկոյանի «Լռության խոնավ աչքերը» ժողովածուն ներկայացնում է բ. գ. թ., դոցենտ Վալերի Փիլոյանը: Գագիկ Հրատապը «Նա համաշխարհային ռեկորդի ռեկորդ սահմանեց» հոդվածով ներկայացնում է փրկարար, ուժային եռամարտի աշխարհի եւ Եվրոպայի բազմակի չեմպիոն Զորիկ Պողոսյանին:
«Մեսրոպ Մաշտոց» ՀՌԽ գործադիր տնօրեն Ռոբերտ Խբալյանը շնորհավորում է «Միգ» մարզային ռադիոկայանի 25-ամյակը:
«Հուշադարան» խորագրի տակ պայծառահիշատակ արձակագիր Վալտեր Թորոսյանի «Սա է գիրք զարմանալի…» վերնագրված նախաբանի խոսքն է:
Այնուհետեւ նույն խորագրի տակ ներկայացվում է ՀՀ ԱԱՆ պայծառահիշատակ գնդապետ Ռոբերտ Բաղոմյանի պոեզիան:
Այնուհետեւ Լեւոն Լաճիկյանի «Գյումրիապատումն» է պ.գ.թ. Արմեն Կարապետյանի ներկայացմամբ: Հանդեսի այս համարի վերջին «Ք» էջում «Մաշտոց» հանդեսի գեղարվեստական խմբագիրներից՝ վաղամեռիկ գեղանկարիչ Կարեն Դավթյանի 60-ամյակի կապակցությամբ վերահրապարակվել է 2012 թվականին հանդեսում տպագրված «ԿաՊոն ու Մացոն» ակնարկը:
Հանդեսի շապիկի առաջին էջին «Մաշտոց» հանդեսի գիտական խմբագիրներից Լեմս Ներսիսյանի «Սուրբ Մեսրոպ Մաշտոցը» ստեղծագործության վերատպությունն է, իսկ շապիկի վերջին էջին Լեւոն Լաճիկյանի «Գուգարաց թեմի առաջնորդարանը» ստեղծագործության վերատպությունն է:
Իվան ԱՆՏՈՆՅԱՆ
«Արվեստագետ» հանդեսի գլխավոր խմբագիր, կինոռեժիսոր
