Մի առիթով «Արվեստագետ» կրթամշակութային ՀԿ-ի հիմնադիր նախագահ, «Ֆորտունա» հեռուստաընկերությամբ հեռարձակվող «Լոռու արվեստագետներ» ֆիլմաշարի հիմնադիր-հեղինակ Իվան Անտոնյանը հրավիրված էր Երեւանի Նուբարաշեն վարչական շրջան՝ Արամ Մանուկյանի անվան ռազմամարզական դպրոց՝ ՀՀ ազգային հերոս Մոնթե Մելքոնյանին նվիրված միջոցառմանը:
Այդ ժամանակ Իվան Անտոնյանը խոստացավ, որ դպրոցին նվիրելու է Մոնթե Մելքոնյանի մի ինչ-որ նկար: Վերադառնալով Վանաձոր Անտոնյանն իր խոստմանը հավատարիմ հանդիպում-քննարկում ունեցավ երիտասարդ նկարիչ-մանկավարժ Սենիկ Մանուկյանի հետ… Եվ մի կարճ ժամանակ անց ծնվեց «Մոնթեն» խճանկար ստեղծագործությունը:
Այնուհետեւ Իվան Անտոնյանը, համագործակցելով Արամ Մանուկյանի անվան ռազմամարզական դպրոցի տնօրինության հետ, ստացավ ողջունելի նախաձեռնության թույլտվությունը՝ «Մոնթեն» խճապատկերը տեղադրել դպրոցի հատկացված սրահում: Ապա «Արվեստագետ» կազմակերպության համախոհների՝ ՀՀ ժողովրդական արտիստ Ռոզա Մխիթարյանի, ՄԳԱ ակադեմիկոս, լեզվաբան Լավրենտի Միրզոյանի, ՀՀ ժողովրդական նկարիչ Հրանտ Թադեւոսյանի (Թաթոս), ՀՀ վաստակավոր լրագրող, Իվան Անտոնյանի հեղինակային «Լոռու արվեստագետներ» ֆիլմաշարի գլխավոր խմբագիր Ֆահրադ Ափուջանյանի, հայ տարազի ժողովրդական վարպետ, բանաստեղծուհի Մարտուհի Սարգսյանի եւ մի շարք արվեստագետների հետ հյուրընկալվեցին ռազմամարզականում:
Ներկաներին դիմավորեցին Մոնթե Մելքոնյանին նվիրված բեմականացմամբ: Ներկայացվեց զորավարի՝ Մոնթեի ուսանելի փառավոր ուղին: Ապա եւ հնչեց «Կարոտի կանչ» համույթի անակնկալ առաջնաելույթը, երգ՝ նվիրված Մոնթե Մելքոնյանին (գեղ. ղեկ.՝ Բելլա Առաքելյան):
Այնուհետեւ հյուրերը հրավիրվեցին դպրոցի փառքի անկյուն, որտեղ Իվան Անտոնյանը հրապարակեց «Մոնթեն» ստեղծագործության նվիրաբերման եւ տեղադրման «Արվեստագետ» ՀԿ-ի որոշումը: Տեղադրման պատիվը տրվեց «Մոնթեն» ստեղծագործության հեղինակ Սենիկ Մանուկյանին, ով հայրենասիրության բարձր զգացմամբ կատարեց իրեն վերապահված առաքելությունը: Արամ Մանուկյանի անվան Նուբարաշենի ռազմամարզական դպրոցի տնօրեն Արմեն Թովմասյանը, գրադարանավար Փառանձեմ Մարգարյանը նշեցին, որ այս միջոցառումը մի յուրօրինակ հետք կթողնի դպրոցի պատմության մեջ եւ սաների հոգում ու սրտում: Վերջիններս շնորհակալություն հայտնեցին միջոցառման նախաձեռնող, իրենց դպրոցի նվիրյալ բարեկամ Իվան Անտոնյանին, Սենիկ Մանուկյանին ու ներկաներին: Մոնթեական հիշողություններով ներկաների հետ կիսվեցին Լավրենտի Միրզոյանը, Ֆահրադ Ափուջանյանը եւ այլք…
Վերջում չարենցյան հայրենաշունչ ասմունքով աշակերտներին, ուսուցիչներին ու հրավիրյալներին ոգեւորեց Իվան Անտոնյանը եւ խնդրեց դպրոցի ուսուցիչներին, որ հընթացս բանաստեղծական աղոթքը՝ «Ես իմ անուշ Հայաստանին» հնչի աշակերտների շուրթերից: Ներկաներին ճանապարհեցին ռազմամարզականի ջերմաշունչ ծափերի ներքո, նոր հանդիպման ակնկալիքով:
