Ամիսներ առաջ «Ֆորտունա» հեռուստաընկերությամբ հեռարձակվող «Լոռու արվեստագետներ» ֆիլմաշարի հեղինակ, «Արվեստագետ» կրթամշակութային հկ-ի նախագահ, համանուն հանդեսի գլխավոր խմբագիր Իվան Անտոնյանը մի խումբ մտավորականների հետ հյուրընկալվեց ՀՀ ԿԳՄՍ Կոտայքի մարզի Նոր Հաճնի ավագ դպրոցում, որտեղ ցուցադրվեց այս շարքի տարիներ առաջ նկարահանված՝ վաստակաշատ մատենագետ, մանկավարժ Ռիմա Մկրտչյանին նվիրված ֆիլմը:
Դպրոցի տնօրեն, վաստակաշատ մանկավարժ Կարինե Գեւորգյանը, ով ծնունդով լոռեցի է, վերջերս Կրթության զարգացման նորարարական, ազգային կենտրոնի ծրագրի շրջանակներում դասընթաց էր վարում Վանաձորի Հովհաննես Թումանյանի անվան թիվ 3 հիմնական դպրոցում լոռեցի ուսուցիչների համար:
Իվան Անտոնյանը եւ գեղանկարիչ, Հայաստանի եւ Ռուսաստանի նկարիչների միությունների անդամ Կառլեն Քոչինյանն այցելեցին Կարինե Գեւորգյանին եւ դպրոցի բակում Հովհաննես Թումանյանի կիսանդրու մոտ պարգեւատրեցին «Հովհաննես Թումանյան 150» հուշամեդալով, որը նրան հանձնեց Իվան Անտոնյանը, ով նաեւ Կարինե Գեւորգյանի կերպարվեստի ուսուցիչն է եղել Կիրովականում:
«Անչափ զգացված եմ նման պարգեւի եւ անակնկալի համար, հատկապես, որ այն ինձ շնորհվում է իմ ծննդավայրում, շնորհակալ եմ Իվան Անտոնյանին»,- ասաց Կարինե Գեւորգյանը:
