Վանաձորի կերպարվեստի թանգարանում բացվեց լոռեցի նկարիչների՝ արդեն ավանդական «Բազմաշավիղ» խորագրով ցուցահանդեսը: Մասնակցում են 60 նկարիչներ ավելի քան 150 աշխատանքներով: Ցուցահանդեսի կազմակերպման մասին տեղեկություններ ներկայացրեց Հայաստանի նկարիչների միության Լոռու մարզային բաժանմունքի նախագահ, գեղանկարիչ Փափագ Ալոյանը, ում նախաձեռնությամբ են լոռեցի նկարիչներն արդեն 22 տարի ներկայանում հաշվետու տարեկան ցուցադրությամբ:
Լոռին լուրջ ու նշանակալի ներդրում ունի հայրենի մշակույթի զարգացման ասպարեզում: Այս առումով տպավորիչ է նաեւ կերպարվեստի բնագավառը: Լոռեցի նկարիչների արվեստն ինքնատիպ է, իրենց բնության պես՝ անխառն ու հնչեղ, ըմբոստ ու ներդաշնակ:
Փափագ Ալոյան, Անատոլի Ավետյան, Վարդան Մերջանյան, Ռոբերտ Հեքիմյան, Բոգդան Հովհաննիսյան, Սարգիս Ղարիբյան, Վազգեն Ղաբուզյան, Աշոտ Հախոյան… Նկարիչներ, ովքեր իրենց արվեստով բացահայտում են բնության ներքին ռիթմը, հուզականորեն միահյուսում օբյեկտիվ իրականության ու այդ իրականությունից ստացած իրենց տպավորությունները՝ լեցուն երեւակայությամբ ու քնարականությամբ:
Այսօր գեղարվեստական որոնումներով ու ասելիքով նոր խոսք են ասում երիտասարդ նկարիչները: Յուրաքանչյուր նոր ցուցահանդեսի նրանց ակտիվ մասնակցությունն արդեն նշանավորվում է նոր անուններով, ովքեր փորձում են իրենց աշխարհընկալումն ու գեղեցիկի իդեալները փոխանցել արվեստասեր մարդուն:
Գագիկ ԱՆՏՈՆՅԱՆ
Լոռի
