Վանաձորի Շարլ Ազնավուրի անվան մշակույթի պալատի դահլիճում կայացավ հոբելյանական համերգ՝ նվիրված «Հորովել» երգի-պարի համույթի հիմնադրման 50-ամյակին:
«Հորովելը» որպես ինքնագործ խումբ գործել է 1958-ից, սակայն պետական գրանցում ստացել է 1972-ին: Առաջին գեղարվեստական ղեկավարը եղել է ՀԽՍՀ ժողովրդական արտիստ, կոմպոզիտոր Գրիգոր Հախինյանը, հետո համույթը ղեկավարել են ՀԽՍՀ ժողովրդական արտիստ Վանուշ Խանամիրյանը, կոմպոզիտոր Վաղարշակ Կոտոյանը, ՀԽՍՀ վաստակավոր արտիստ Խաչիկ Մարգարյանը, արդեն 10 տարի «Հորովելի» տնօրենն ու գեղղեկավարը մեներգիչ Արմեն Ներսիսյանն է, գործիքային մասի ղեկավարը՝ ՀՀ մշակույթի վաստակավոր գործիչ Էլմիրա Կռոյանը, գլխավոր բալետմայստերը՝ Արայիկ Գրիգորյանը: Համույթը համերգներով հանդես է եկել աշխարհի շուրջ 25 երկրում:
Տոնի կապակցությամբ Լոռու մարզպետի շնորհակալագրերով, Վանաձորի քաղաքապետարանի պատվոգրերով, «Հորովել-50» հոբելյանական հուշամեդալով պարգեւատրվեցին մի խումբ երգիչներ, պարողներ: Համերգը հագեցած էր ժողովրդական երգով ու պարով, մենակատարները հանդես եկան ժողովրդական եւ գուսանական երգերի կատարումներով, առաջին անգամ կատարվեց «Լոռվա հարսներ» պարը (երաժշտությունը՝ Գագիկ Աղաբաբյանի): Համույթի ստեղծագործական կազմը հյուրընկալվել է Հայաստանի հանրային ռադիոյի տաղավարում, հանդես եկել պարային համարներով եւ երգերով, «Հորովելը» համերգային ծրագրով հանդես եկավ նաեւ Գյումրիի Վարդան Աճեմյանի անվան պետական դրամատիկական թատրոնում եւ արժանացավ ջերմ ընդունելության:
Վանաձորի «Հորովել» երգի-պարի անսամբլը հիմնադրման 50-ամյակին նվիրված համերգաշրջանը կեզրափակի երեւանյան համերգով: Այն տեղի կունենա նոյեմբերի 17-ին Ալ. Սպենդիարյանի անվան օպերայի եւ բալետի ազգային ակադեմիական թատրոնում:
Գագիկ ԱՆՏՈՆՅԱՆ
Լոռի
