Ռեժիսոր, սցենարիստ, «Արվեստագետ» ՀԿ-ի հիմնադիր նախագահ, մշակութային նույնանուն ամսագրի գլխավոր խմբագիր Իվան Անտոնյանը հեղինակեց «Լոռու արվեստագետներ» ֆիլմաշարի հերթական՝ «Բազմակողմանի արվեստագետը» ֆիլմը, որը նվիրված է հայ ազգային տարազների ժողովրդական վարպետ, տիկնիկագործ, բանաստեղծուհի, մանկագիր, մի շարք երգերի հեղինակ Մարտուհի Սարգսյանին:
Ֆիլմը ծնվել է ստեղծագործական խմբի անդամներ գլխավոր խմբագիր, ՀՀ վաստակավոր լրագրող Ֆահրադ Ափուջանյանի, օպերատոր եւ մոնտաժի ռեժիսոր Էդգար Օհանյանի, ՀԿ-ի գիտական խորհրդի ու խորհրդի նախագահներ, մանկավարժական գիտությունների դոկտոր, պրոֆեսոր Վանդոս Ղարագյոզյանի եւ «Մշո զարմ» գիտակրթական ՀԿ-ի նախագահ Էդվարդ Խլղաթյանի համագործակցության արդյունքում:
Ֆիլմը ներկայացնում է Մարտուհի Սարգսյանի ստեղծագործական ուղին, անցած ուսանելի ճանապարհը, անդրադարձ է կատարվում բանաստեղծություններին, երգերին, տիկնիկներին եւ դրանց կարեւորությանը: Ներկայացվել են լուսանկարներ, նրա տպագրված գրքերը, պատվոգրերը, շնորհակալագրերը: Օրերս Վանաձորի Սուրբ Գրիգոր Նարեկացի առաջնորդանիստ եկեղեցու դահլիճում քաղաքի արվեստասեր հասարակայնության համար ցուցադրվեց ֆիլմը:
Գագիկ ԱՆՏՈՆՅԱՆ
Լոռի
