Դեկտեմբերի 25-ին Երևանում՝ Կոմիտասի թանգարան-ինստիտուտի դահլիճում, կայացավ տոնական երաժշտական երեկո՝ նվիրված Սուրբ Ծննդյան և Ամանորի տոներին։ Համերգը կազմակերպվել էր Երևանի Սուրբ Գրիգոր Նարեկացի ժողովրդապետության կողմից։ Ներկա էին արվեստասերներ, ինչպես նաև՝ ՀՀ-ում Սիրիայի Արտակարգ և լիազոր դեսպան տիկին Նորա Արիսյանը։ Երեկոյի ողջ ընթացում հանդիսատեսն ունկնդրեց հրաշալի երգ ու երաժշտություն, որոնք հնչեցրեցին արհեստավարժ երգիչ-երաժիշտները։
Հաղորդավարը նրեկայացրեց համերգի մեներգիչներ Մագրուհի Խաչատրյանին ու Արամ Ճապաղջուրեանին, ովքեր դաշնակահարներ Թերեզա Ոսկանյանի, Սարգիս Ադամյանի, Ռաֆֆի Պալեանի նվագակցությամբ կատարեցին հայ ու համաշխարհային հայտնի երգահանների ստեղծագործություններ, ժողովրդական ու աշուղական երգեր՝ դասական կատարումներով։ Քեռուբինիի «Ave Maria» երգով սկսեց համերգը Մ․ Խաչատրյանը՝ Թերեզա Ոսկանյանի՝ դաշնամուրի նվագակցությամբ։ Հենց առաջին կատարումից արդեն մեծ ոգևորություն էր դահլիճում։ Նույն զույգի կատարմամբ առանձնակի հնչեղությամբ հանդիսատեսն ունկնդրեց աշուղ Ջիվանու «Պաղ աղբյուրի մոտ» հայտնի երգը։ Արամ Ճապաղջուրեանը դաշնակահար Ռաֆֆի Պալեանի նվագակցությամբ կատարեց առաջին երգը՝ Ալեքսանդրո Սդրատելլայի՝ մշտապես ունկնդրին հմայող «Pieta Signore»-ն։ Նույն երգիչը դաշնակահար Սարգիս Ադամյանի մշակմամբ ու նվագակցությամբ կատարեց Դևի խոսքերով և Նիկոլ Գալանտերյանի երաժշտությամբ գրված «Դու նորից եկելես․․․» երգը, որը մշտապես է գերել հայ ունկնդրին։ Այս անգամ էլ հանդիսատեսը մեծ ոգևորությամբ ընդունեց։ Երբեմն երգիչները հանդես էին գալիս զուգերգերով։ Ն․ Ռոդայի «Parla Piu Piano» երգը Մ․ Խաչատրյանի և Ա․ Ճապաղջուրեանի կատարմամբ հնչեց դաշնակահար Ռ․ Պալեանի մշակմամբ ու նվագակցությամբ։ Հանդես եկան նաև թավջութակահար Անդրանիկ Աղաջանյանը և ջութակահար Շանթ Դանիէլեանը։ Ջ․ Նասիֆի արաբերեն ռոմանս զուգերգ «Վարդը» հնչեց Ա․ Ճապաղաջուրեանի և կիթառահար Սարօ Հայրապետեանի կատարմամբ՝ մշակումը և դաշնամուրային նվագակցությունը Ռ․ Պալեանի, ջութակահար Շ․ Դանիէլեան։ Մեծ սիրով ունկնդրեց հանդիսատեսն այդ զուգերգը։ Երգացանկում հնչեց նաև Սայաթ-Նովա։ «Դուն էն հուրին իս» երգը կատարեց մեներգչուհի Մ․ Խաչատրյանը՝ Թերեզա Ոսկանյանի՝ դաշնամուրի հիանալի նվագակցությամբ։ Հնչեցին նաև ժողովրդական երգեր՝ «Նուբար-Նուբար»-ը, «Սարի աղջիկ»-ը։ Նման համերգներում չհնչեցնել Առնո Բաբաջանյան, հնարավոր չէ։ Հայ մեծ երգահանի «Նոկտյուր»-ը կատարվեց մենակատարների զուգերգով՝ դաշնակահար՝ Ռ․ Պալեան, թավջութակահար՝ Ա․ Աղաջանյան, ջութակահար՝ Շ․ Դանիէլեան։ Համերգն ավարտվեց «Սուրբծննդյան երգերի շարան»-ով՝ մեներգիչների ու նվագակցողների կատարմամբ։ Մեծ էր ոգևորությունը դահլիճում ու բեմում։ Անընդհատ հնչող ծափերն ունեին հասցեատեր։ Երեկոն Տերունական աղոթքով ու բարեխոսությամբ ամփոփեց Երևանի Սուրբ Գրիգոր Նարեկացի Հայ Կաթողիկե եկեղեցու ժողովրդապետ Հայր Մաշտոց վարդապետ Զահթէրեանը։ Ողջունելով ներկաներին, շնորհակալություն հայտնելով երգիչ-երաժիշտներին, որ երեկոյի ողջ ընթացքում մեծ ոգևորություն պարգևեցին հանդիսատեսին՝ Հայր Մաշտոցը դիմեց առ Աստված, որ Տերը զորավիգ լինի հայ ժաղովրդին, որ օգնի Արցախի շրջափակված հայությանը՝ դուրս գալու այս նեղ պայմաններից։ Ընթերցեց Պարույր Սևակի «Անլռելի զանգակատուն» պոեմի «Ղողանջ թաղման և հարության» տողերից՝ նվիրված Կոմիտասին՝
«Դո՜ւ – Վարդապե՞տ:
Դու Ամենայն Հայոց Երգի Վեհափառն ես,
Դու՝ մեր երգի Մեսրոպ Մաշտոց,
Գիրն ու տառն ես Հայոց երգի․․․»
Հավելեց՝ պատահական չի ընտրվել այս դահլիճը, որտեղ Մեծն Կոմիտասի ոգին է։ «Անկրկնելի է Կոմիտասը, և մեր երաժիշտները, ովքեր անում են այս աշխատանքը բարձր մակարդակով ամբողջ Հայաստանում, դաստիարակում են մեր ոգին։ Եվ այս գաղափարն է, որ մենք ուզեցինք իրականացնել», -ասացՀայր Մաշտոցը և կարևորեց, որ հայը մնա և գործի հայրենիքում, որ ամուր դրձնենք մեր սահմանները։ Երեկոյի վերջում հայ խորհրդային բանասեր, հայագետ-արևելագետ, թարգմանիչ, Հայկական ԽՍՀ գիտության վաստակավոր գործիչ, ՀՀ ԳԱԱ ակադեմիկոս Կարապետ Մելիք-Օհանջանյանի զարմիկը՝ Վահան Մելիք-Օհանջանյանը, Հայր Մաշտոցին նվիրեց գրքույկ՝ ակադեմիկոսի հայտնի հոդվածը՝ հայ ժողովրդի մեծ բարեկամ Արմին Թեոֆիլ Վեգների մասին, որը ժամանակին տպագրվել է Բեյրութի «Զարթոնք» և Կահիրեի «Արև» թերթերում։ Գրքույկում տպագրված են նաև Վեգների 4 նամակները՝ Կ․ Մելիք-Օհանջանյանին։ Վեգները, հետագայում իմանալով Կարապետի մահվան մասին, գրել է նաև մահախոսական, որը նույնպես տպագրված այս գրքույկում։ Զրույցի ընթացքում Հայր Մաշտոցը տեղեկացրեց՝ Երևանի Սուրբ Գրիգոր Նարեկացի ժողովրդապետությունը 20 տարուց ավելի է, ինչ գործում է Մայր հայրենիքում։ Դուրս գալով դահլիճից, որտեղ կոմիտասական ոգին է տիրում, զգացի՝ մեզ շատ են պետք նման համերգներ, և ցանկալի է՝ այդ երգերը հաճախ հնչեն մեր հեռուստաալիքներով, որ մեր մատաղ սերուննդը, հատկապես, դաստիարակվի իսկական արվեստով․․․
