«Կայթ» նվագախմբի «ՆՈՒԱԳ» ալբոմի շնորհանդեսին ներկա էին հայ ժողովրդական, ազգագրական պարերի սիրահարներ, արվեստի բնագավառի ներկայացուցիչներ: Ներկաներին ողջունեց եւ ալբոմի ստեղծման ընթացքն ու պատմությունը ներկայացրեց «Կայթ» կրթամշակութային հանգույցի հիմնադիր տնօրեն Կորյուն Դավթյանը։
Ալբոմում տեղ են գտել 9 պարեղանակներ՝ «Թամզարա», «Գովնդ վերվերի», «Ետ ու առաջ», «Շավալի», «Համշենի հոպա», «Ջուրջնա», «Տալ տալա», «Խամխամա» եւ «Ռոստամ բազի»։ «Մենք» ավանդական պարի խումբը, Ստեփան Թորոյանի ղեկավարությամբ, ներկայացրեց ալբոմում տեղ գտած պարերի իրենց բեմականացումները։ Ընթացքում պարերը կայացան «Կայթ» նվագախմբի երաժշտության ներքո։ «Մենք»-ի պարախմբին միացան նաեւ դահլիճի հանդիսատեսները, եւ կայացավ տոնական մեծ համերգ։
«Կայթ» կրթամշակութային հանգույցի հիմնադիր տնօրեն Կորյուն Դավթյանի հետ զրույցից տեղեկացանք, որ իր ղեկավարած կառույցը գործում է 2014-ից։ Հանգույցը հիմնադրման օրվանից իրագործել է կրթամշակութային տարբեր ծրագրեր։ Նրա կազմում գործող «Կայթ» նվագախումբը, գեղարվեստական ղեկավար Գրիգոր Քարտաշյանի եւ երաժշտական ղեկավար Գրիգոր Դավթյանի հետ, հանդես է գալիս հայկական ավանդական երաժշտությունը մատուցելով։ «Թագպար» նվագախումբը ներկայացնում է հայկական ավանդական երաժշտությունը հիմնականում տոնածիսակարգերին: Այն հանդես է գալիս նաեւ համայնքային եւ ընտանեկան տոնախմբություններում, տարատեսակ միջոցառումների, հանդիպումների, արարողությունների ժամանակ։ «Ճարտար» ակումբը հիմնականում ուսումնական ծրագրեր է իրականացնում։ «Արեւ է ելել» համայնքային մշակութային ուսումնական ծրագրով հանդես է գալիս հանրապետության տարբեր համայնքներում։ Այժմ նման ծրագիր է իրականացվում Վայոց ձորի Խաչիկ գյուղում։ Ասեղնագործության փոքրերի խումբն արդեն տիրապետում է ցողունակար ասեղնագործությանը, իսկ մեծերը քայլ առ քայլ յուրացնում են Մարաշի հյուսված կարը։
Կ. Դավթյանն ասաց նաեւ. «Ալբոմի ստեղծման նպատակը ազգային պարերի երաժշտական ֆոնդի թարմացումն ու չձայնագրված պարեղանակների առաջխաղացումն է։ «ՆՈՒԱԳ»-ն առաջին հերթին կծառայի պարախմբերին եւ ազգային պարերով հետաքրքրվողներին, բացի այդ, շարքն ազգային երաժշտության նմուշների յուրօրինակ հավաքածու է»։ Հատկապես կարեւորեց համշենահայության պարերի ու երգերի պահպանումը, մոռացումից փրկումը։ Եվ ներկա ալբոմում ընդգրկվել է «Համշենի հոպա» պարը։ Սակայն այս մեկ ալբոմով չի բավարարվելու «Կայթ»-ը, եւ նման ծրագրերը լինելու են շարունակական։ Համագործակցում է «Իրական դպրոց» կրթամշակութային հիմնադրամի հետ, որի տնօրեն Վահագն Պողոսյանը նույնպես ներկա էր շնորհանդեսին, ելույթ ունեցավ եւ կարեւորեց «Կայթ»-ի ձեռնարկը։ Ասաց նաեւ, որ պատրաստ են բոլոր ծրագրերին աջակցել, հույս հայտնեց՝ շուտով կստեղծվի հաջորդ ալբոմը, եւ 9-ի փոխարեն բազմապատիկ պարեղանակներ կներկայացվեն։
Բացելով շնորհանդեսը՝ Կ. Դավթյանն օրն իրենց համար հատկանշական համարեց եւ շնորհակալություն հայտնեց ներկաներին, որ ընդառաջել են իրենց հրավերին, ինչը ոգեւորող ու գոտեպնդող է, եւ հաջորդ նախագծերն ավելի ամուր քայլերով առաջ կընթանան ու կիրագործվեն։ Նշեց, որ ալբոմը պետք է ավելի շուտ՝ 2020 թ. սկզբին հրապարակվեր։ Այդ ժամանակ արդեն ձայնագրել էին «Շավալի» պարեղանակը, հրապարակել եւ պետք է 4 ամիս անց հանրությանը ներկայացնեին ալբոմը։ Սակայն եղավ համաճարակ, պատերազմ եւ այլ արհավիրքներ մեր ժողովրդի կյանքում։ Նա կարեւորեց համագործակցությունը «Մենք» պարախմբի հետ՝ նշելով, որ ներկա ալբոմի պարեղանակներն ընտրվել են «Մենք»-ի կողմից։ Հավելեց նաեւ՝ հաջորդ ալբոմի հրապարակման համար կդիմեն այլ պարախմբերի եւս։ Նաեւ պատրաստ են նվագախմբերին անհատույց տրամադրել պարեղանակներ։ Անդրադարձավ նաեւ պարերի ձայնագրմանը, որ բավականին աշխատարար գործողություն է եւ ժամանակ է պահանջում։
Կ. Դավթյանը կարեւորեց նաեւ այն, որ հայկական ավանդական պարերը ոչ թե հանրակրթական դպրոցներում դասավանդվեն, այլ փոխանցվեն սերնդեսերունդ։ Անդրադարձավ իրենց ու «Իրական դպրոց»-ի համագործակցության կարեւորությանը, շնորհակալություն հայտնեց տնօրեն Վ. Պողոսյանին։ «Իրական դպրոց» կրթամշակութային հիմնադրամը հիմնադրվել է 2016 թ. Երեւանում։ 2018 թ. սեպտեմբերին մասնաճյուղեր է բացել Գյումրի եւ Վանաձոր քաղաքներում, իսկ 2019-ին՝ Գորիսում, 2021-ին՝ Իջեւանում, իսկ 6-րդը՝ 2022 թ. հուլիսին՝ Ստեփանակերտում։ Հիմնադրամն իրականացնում է Համակարգերի տեսություն մասնագիտությամբ քառամյա ուսումնական ծրագիր։ Դպրոցը կոչվում է «Իրական դպրոց»՝ ի հիշատակ Շուշիի Ռեալական ուսումնարանի, ինչպես նաեւ այն բանի համար, որ նախագծային կրթությունը հենված է բացառապես իրական կյանքից վերցված եւ իրական մարդկանց համար ստեղծվող նախագծերի վրա։ «Մենք» պարախմբի ղեկավար Ստեփան Թորոյանը նույնպես կարեւորեց ալբոմի ստեղծումը։ Ալբոմի պարեղանակների կիրառությունը բաց եւ անհատույց է, սակայն ձայնագրված պարեղանակները չի կարելի խմբագրել։ Կ. Դավթյանն ասաց՝ դեմ են նաեւ, որ օգտագործվեն առեւտրային նպատակներով։
