Երեւանի Հովհաննես Թումանյանի թանգարանում կայացավ «Արվեստագետ» կրթամշակութային հասարակական կազմակերպության «Հովհ. Թումանյան-150» մեդալի շնորհանդեսը: Ներկա էին մտավորականներ, հյուրեր հանրապետության տարբեր շրջաններից:
«Արվեստագետ» ՀԿ նախագահ, պատվավոր պրոֆեսոր Իվան Անտոնյանը նախ ներկայացրեց մեդալի ստեղծման պատմությունը՝ միջոցառումը բացելով թումանյանական քառյակով: Այնուհետեւ «Հովհ. Թումանյան-150» մեդալի կնքյալ օրինակը հանձնեց թատրոնին՝ պահպանության եւ մշտական ցուցադրության:
Ապա «Հովհ. Թումանյան-150» մեդալով պարգեւատրվեցին անվանի լոռեցիներ, «Արվեստագետ» կրթամշակութային հանդեսի խմբագրական խորհրդի անդամներ՝ ՀԽՍՀ ժողովրդական արտիստ, Երեւանի եւ Սպիտակի պատվավոր քաղաքացի Ռուբեն Մաթեւոսյանը, ՀՀ ժողովրդական արտիստ, բանասիրական գիտությունների դոկտոր, պրոֆեսոր Թովմաս Պողոսյանը, ՀՀ վաստակավոր արտիստ Ստեփան Դալլաքյանը: Վերջինս կատարեց գուսան Սարգիս Զաքարյանի «Անմահ Թումանյան» երգը, ում ձայնակցեցին Թովմաս Պողոսյանը, Ռուբեն Մաթեւոսյանը, Իվան Անտոնյանը: Ապա թանգարանի բակում Իվան Անտոնյանի առաջարկությամբ նռնենու շիվ տնկվեց «Լոռվա ծառ» անվամբ:
Պարգեւատրվածները եւ թանգարանի ղեկավարությունը, ներկաները հիացական խոսքեր ասացին միջոցառման կազմակերպման համար:
«Ինձ համար շատ հաճելի էր հայ անվանի արվեստագետներին պարգեւատրել: Սա ես անում եմ հոգու թելադրանքով, սա մի միջոցառում է, որ շատ կհիշվի: Իմ խոնարհումը Ամենայն հայոց բանաստեղծի հավերժող անվան առաջ: Շնորհավորում եմ»,- նշեց Իվան Անտոնյանը՝ շնորհակալություն հայտնելով թանգարանի աշխատակիցներին, տնօրեն Անի Եղիազարյանին՝ պատշաճ հյուրընկալության համար:
