Արդեն 133 տարի է, ինչ մայիսի 1-ը նշվում է որպես Աշխատանքի եւ աշխատավորների միջազգային օր։ Տոնի առթիվ Երեւանում՝ «Թեքեյան կենտրոնում», համերգով հանդես եկան Հայկանուշ Դանիելյանի անվան արվեստի դպրոցի ուսուցիչներն ու աշակերտները: Ներկա էին մշակութային տարբեր կառույցների ներկայացուցիչներ, նաեւ՝ քաշաթաղցիներ։
Ներկաներին ողջունեց, օրվա առթիվ շնորհավորեց «Թեքեյան կենտրոնի» տնօրեն Արմեն Ծուլիկյանը՝ կարեւորելով օրվա խորհուրդը։ Նշեց նաեւ՝ մեր մշակույթում իր ուրույն տեղն ունի համերգով հանդես եկող արվեստի դպրոցը, որը կրում է հայ օպերային երգչուհի (քնարակոլորատուրային սոպրանո), հայ դասական երգարվեստի վարպետ, ԽՍՀՄ պետական մրցանակի դափնեկիր Հայկանուշ Դանիելյանի անունը։ Հայկանուշ Դանիելյանը հայ երգիչներից առաջինն է, որ 1939 թ. արժանացել է ԽՍՀՄ ժողովրդական արտիստի կոչման։ Ծնվել է 1893 թ. դեկտեմբերի 3-ին Թիֆլիսում, մահացել` 1958 թ. ապրիլի 19-ին Երեւանում։ Արդեն 11 տարի է՝ դպրոցը տնօրինում է կոմպոզիտոր, Հայաստանի կոմպոզիտորների միության անդամ Նաիրա Դիվանյանը։ Մինչ համերգի սկսվելը՝ զրուցեցի նրա հետ, ով 1981 թ. ավարտել է նույն դպրոցի դաշնամուրի եւ կոմպոզիցիայի բաժինները, իսկ 1990-94 թթ.՝ Երեւանի պետական կոնսերվատորիայի կոմպոզիցիայի, վոկալ-տեսական բաժինները եւ ասպիրանտուրան։ Ասաց. «Երեւանի Նոր Նորքի վարչական շրջանում գործող Հ. Դանիելյանի անվան արվեստի դպրոցը հիմնադրվել է 1968 թ.։ Մոտ 1000 սան ունեցող դպրոցն ունի դաշնամուրային, լարային, ազգային, փողային նվագարանների, վոկալի (դասական, ժողովրդական, էստրադային), կիթառի (դասական, ակուստիկ, բաս) բաժիններ, հարվածային գործիքների դասարան, գեղարվեստի (կերպարվեստ, դիզայն, խեցեգործություն, քանդակագործություն), պարարվեստի (լատինաամերիկյան, ժողովրդական, ազգերի, ժամանակակից) բաժիններ, ստեղծագործական դասարաններ։ Համերգն սկսվեց դպրոցի փողային բաժնի սաների ելույթով՝ Նարինե Ղուկասյանի ղեկավարությամբ։ Այնուհետեւ Մանուշակ Նիկողոսյանի ղեկավարությամբ հանդես եկան դպրոցի թատերական բաժնի սաները՝ ներկայացնելով տարբեր մասնագիտության տեր մարդկանց։ Հումորով լեցուն էր ելույթը ու բավականություն պարգեւեց հանդիսատեսին։ Եղան նաեւ անհատ կատարողների ելույթներ։ Համերգը եզրափակեց դպրոցի «Դանիելյան ֆոլկ բենդ DanielyaN FolK BanD» խումբը, որում ընգրկված են դպրոցի եւ՛ ուսուցիչներ, եւ՛ աշակերտներ։ 2020-ից գործող խումբն այս տարվա մարտ ամսին, մասնակցելով Միացյալ Թագավորությունում անցկացվող «Goldentimetalent» երաժշտական միջազգային փառատոնին՝ ներկայացնելով Հայաստանը, արժանացել է 1-ին կարգի դիպլոմի։
«Թեքեյան կենտրոնում» «Դանիելյան ֆոլկ բենդը» ներկայացավ հայ ժողովրդական ու ազգագրական երգերի երաժշտական կատարումների նոր մեկնաբանություններով։ Խմբի անդամներ՝ դպրոցի ուսուցիչներ Մարինե Մաղաքյանը, Լիլիթ Պերիխանյանը, Աննա Հովհաննիսյանը եւ աշակերտներ Տաթեւ Մայիլյանն ու Նարեկ Հայրապետյանը իրենց ելույթներն ավարտեցին՝ կատարելով ժողովրդական «Գինի լի՛ց» երգը (մեներգիչ՝ Մ. Մաղաքյան)։ Իր ձայնային կատարումով ներկաներին ոգեւորեց նաեւ աշակերտուհի Տաթեւ Մայիլյանը։ Համերգի վերջում դպրոցի տնօրենը շնորհավորեց տոնի առթիվ եւ շնորհակալություն հայտնեց ներկաներին։ Շնորհակալություն հայտնեց նաեւ իր սաներին ու ուսուցիչներին լավ ելույթների համար։ Անդրադարձավ նաեւ «Դանիելյան ֆոլկ բենդ» խմբի ստեղծման եւ բազում ելույթների պատմությանը։ «Թեքեյան կենտրոնի» տնօրենը համերգից հետո բարի երթ մաղթեց արդեն 55-ամյա դպրոցին։ Հավելեց նաեւ՝ իր ղեկավարած կենտրոնը համագործակցում է տարբեր երաժշտական դպրոցների, համույթների, մշակութային այլ կառույցների հետ։ Համերգից հետո ներկաներն այցելեցին «Թեքեյան կենտրոնի» ցուցասրահ, որտեղ ներկայացված է տողերիս հեղինակի «Հնադարյան Արցախ» խորագիրը կրող լուսանկարների ցուցահանդեսը։
