Հայ-ռուսական տնտեսական հարաբերությունների հետագա խորացման hնարավորություններն ու ուղղությունները քննարկվեցին Հայաստանի արդյունաբերողների եւ գործարարների միության նախագահ Արսեն Ղազարյանի եւ ՀՀ-ում Ռուսաստանի Դաշնության առեւտրային ներկայացուցիչ Աննա Դոնչենկոյի՝ նախօրեին ՀԱԳՄ գրասենյակում կայացած հանդիպման ժամանակ:
Հայաստանի արդյունաբերողների եւ գործարարների միությունը տեղեկացնում է, որ Աննա Դոնչենկոն հանգամանալի ներկայացրեց ՌԴ արդյունաբերության եւ առեւտրի նախարարության ներքո գործող, աշխարհի շատ երկրներում իր գրասենյակներն ունեցող կառույցի գործունեությունը, որդեգրած տնտեսական քաղաքականությունը, առաջնահերթային ոլորտները։ Խնդիր է դրված խթանել Ռուսաստանից արտահանվող ապրանքների ծավալների մեծացումը, ներկրվող տեսականու ընդլայնումը, երկկողմ ներդրումները։ Ներկայացուցչությունն այս առումով իր ուսումնասիրություններն է արել հայաստանյան շուկայում եւ առանձնացրել տնտեսական կապերի այն առաջնահերթություններն ու ուղղությունները, որոնք առավել հեռանկարային են ներկա փուլում։ ՌԴ ներկայացուցիչը մասնավորապես ընդգծեց էներգետիկայի, քիմիական արդյունաբերության, մետալուրգիայի, գյուղատնտեսության, դեղագործության, տեղեկատվական տեխնոլոգիաների ոլորտները, որոնք փոխադարձ հետաքրքիր ներդրումային բնագավառներ են։ Կառույցն անմասն չի մնում նաեւ մշակութային եւ հումանիտար համատեղ ծրագրերին աջակցությունից։
Բարձր գնահատելով հայ-ռուսական տնտեսական առկա կապերը՝ ՀԱԳՄ նախագահ Արսեն Ղազարյանը կարեւորեց դրանց հետագա խորացումն ինչպես երկկողմ ձեւաչափում, այնպես էլ Եվրասիական տնտեսական միության շրջանակներում։ Հատկապես վերջինում խորացող ինտեգրացիոն գործընթացների արդյունքում էապես մեծացել են փոխադարձ ապրանքաշրջանառության ծավալները։ Նա ընդգծեց ուղղակի ներդրումների ընդլայնման անհրաժեշտությունը, համատեղ արդյունաբերական եւ վերամշակող ձեռնարկությունների հիմնումը, ինչը հնարավորություն կտա դուրս գալու նաեւ երրորդ երկրների, մասնավորապես՝ եվրոպական եւ իրանական շուկաներ։ Արսեն Ղազարյանի խոսքով՝ համագործակցության լայն դաշտ կա գյուղատնտեսության, հանքարդյունաբերության, ՏՏ, զբոսաշրջության, բազմաթիվ այլ ոլորտներում։ Նա կարեւորեց տարածաշրջանների, ինչպես նաեւ մասնավոր ձեռներեցների միջեւ անմիջական տնտեսական փոխգործակցության ընդլայնման անհրաժեշտությունը։ «Ռուսաստանը եղել եւ մնում է մեր առաջնահերթ տնտեսական գործընկերներից մեկը»,- նշեց ՀԱԳՄ նախագահը։
Աննա Դոնչենկոն Արսեն Ղազարյանին փոխանցեց ՌԴ արդյունաբերության եւ առեւտրի նախարար Դենիս Մանտուրովի հրավերը՝ հուլիսի 6-9-ը մասնակցելու Եկատերինբուրգում կայանալիք միջազգային արդյունաբերական ցուցահանդեսին։ Կողմերը պայմանավորվեցին նման հանդիպումները դարձնել պարբերական։
Հանդիպմանը ներկա էին ՀԱԳՄ փոխնախագահ Ներսես Կարամանուկյանը, տնօրեն Էդուարդ Կիրակոսյանը:
