Վարչապետի պաշտոնակատար Նիկոլ Փաշինյանի գլխավորությամբ երեկ տեղի է ունեցել խորհրդակցություն՝ 2022-2024 թթ. միջնաժամկետ ծախսերի ծրագրի նախագծի մակրոտնտեսական եւ հարկաբյուջետային շրջանակի վերաբերյալ:
Ինչպես տեղեկացրել են ՀՀ վարչապետի աշխատակազմի տեղեկատվության եւ հասարակայնության հետ կապերի վարչությունից, նախքան քննարկումն սկսելը, Նիկոլ Փաշինյանն անդրադարձել է Սյունիքի եւ Գեղարքունիքի մարզերում սահմանային իրադրությանը եւ նշել.
«Պաշտպանության նախարարությունն ամենօրյա ռեժիմով տեղեկատվություն է տալիս հանրությանը՝ ստեղծված իրավիճակի մասին: Իրադրությունը կայուն է, բայց լարված, եւ, մյուս կողմից, պետք է ընդգծեմ՝ անընդունելի մեզ համար: Որովհետեւ մեր դիրքորոշումը հստակ է եւ միանշանակ՝ Ադրբեջանի զինված ուժերի ստորաբաժանումները պետք է լքեն Հայաստանի Հանրապետության ինքնիշխան տարածքը: Իհարկե, մեր զինված ուժերն իրականացնում են մարտավարական բնույթի գործողություններ, բայց մեր դիրքորոշումն այն է, որ այս իրավիճակը պետք է լուծվի դիվանագիտական ճանապարհով, խաղաղ ճանապարհով: Սա մեր առաջնային մոտեցումը եւ նպատակն է:
Դուք տեղյակ եք, որ մենք դիմել ենք Հավաքական անվտանգության պայմանագրի կազմակերպության ընթացակարգերով որոշակի գործառույթներ իրականացնելու հարցով: Մասնավորապես, գիտեք, որ գոյություն ունի Հավաքական անվտանգության պայմանագրի կազմակերպության՝ ճգնաժամային իրավիճակներում արձագանքման կանոնակարգ, եւ մենք, այդ կանոնակարգին համաձայն, գործողություններ իրականացնելու ենք: Ընդհանուր առմամբ, մենք շարունակում ենք կոնսուլտացիաները ՀԱՊԿ շրջանակում: Գուցե գործընթացը ցանկալի արագությամբ չի ընթանում, բայց հավաքական անվտանգության մեխանիզմները կան, եւ մենք շարունակում ենք հետեւողական աշխատանքը՝ դրանք գործարկելու ուղղությամբ:
Նաեւ շարունակելու ենք դիվանագիտական ջանքերի գործադրումը՝ միջազգային հանրությանը իրադրության մասին ամբողջական տեղեկատվություն տալու եւ Ադրբեջանի վրա միջազգային ճնշումը մեծացնելու ուղղությամբ: Շարունակելու ենք, բնականաբար, աշխատանքը մեր ռազմավարական գործընկերոջ՝ Ռուսաստանի Դաշնության հետ: Տեղյակ եք նաեւ, որ աջակցության խնդրանքով դիմել եմ Ռուսաստանի նախագահին, եւ կոնսուլտացիաներն այս ուղղությամբ նույնպես կշարունակվեն:
Ընդհանուր առմամբ, Ադրբեջանի գործողությունները համարում եմ ապակառուցողական: Նրանք տարածաշրջանի լարվածությունն ավելացնելուն միտված քայլեր են ձեռնարկում: Մեր գնահատումն այն է, որ նրանք այս գործողություններով փորձում են վիժեցնել 2020 թ. նոյեմբերի 9-ի եւ 2021 թ. հունվարի 11-ի հայտարարությունների հետագա իրագործումը:
Հիշեցնեմ՝ հունվարի 11-ի հայտարարությունը վերաբերում էր տարածաշրջանային կոմունիկացիաների բացմանը եւ տարանցիկ բեռնափոխադրման հարցերի կարգավորմանը: Ուզում եմ ընդգծել, որ Հայաստանի Հանրապետությունը ոչ միայն շահագրգիռ է տարածաշրջանային կոմունիկացիաների բացմամբ, այլեւ սա համարում ենք մեզ համար կարեւոր տնտեսական առաջնահերթություններից մեկը: Բայց նաեւ ուզում եմ կրկին ընդգծել, որ Հայաստանը երբեք չի քննարկել եւ չի քննարկելու «միջանցքային» որեւէ տրամաբանություն: Մենք խոսում ենք տարածաշրջանի կոմունիկացիաների բացման մասին:
Ընդհանուր առմամբ մեր տպավորությունն այն էր եւ շարունակում է այն մնալ, որ Ռուսաստանի, Հայաստանի եւ Ադրբեջանի փոխվարչապետերի կողմից գլխավորվող եռակողմ հանձնաժողովը բավական արդյունավետ եւ կառուցողական աշխատանք է տարել, եւ մնում է այդ աշխատանքների արդյունքներն իմպլեմենտացնելու մասին մտածել: Եվ տարօրինակ է, որ այդ փուլում իրագործվեց այս սադրանքը:
Կրկին ուզում եմ ընդգծել, որովհետեւ շատ կարեւոր է, այսպես ասած, թացը չորից տարբերել. տարածաշրջանի կոմունիկացիաների բացումը ոչ միայն ընդունելի է Հայաստանի Հանրապետության համար, այլեւ մեզ համար կարեւոր առաջնահերթություն է: Որովհետեւ համաձայն այն պայմանավորվածությունների, որ մենք ունենք, Հայաստանն ստանում է երկաթուղային հաղորդակցություն Իրանի Իսլամական Հանրապետության եւ Ռուսաստանի Դաշնության հետ: Իհարկե, նաեւ Ադրբեջանն է ստանում երկաթուղային հաղորդակցություն Նախիջեւանի հետ: Խոսքը բեռնափոխադրումների մասին է, իհարկե: Հետագայում, ընդհանուր իրավիճակի կարգավորման դեպքում, կարելի է քննարկել նաեւ այդ ուղղություններով ուղեւորափոխադրումների հարցը:
Ինչո՞ւ եմ ասում՝ մենք պետք է տարբերակենք իրարից. որովհետեւ ճանապարհների բացումը, այո, մեզ համար կարեւոր է: Մենք հունվարի 11-ի հայտարարությունն ստորագրել ենք, քանի որ այդ հայտարարությունը բխում է մեր շահերից: Մենք հետեւողականորեն աշխատելու ենք տարածաշրջանի կոմունիկացիաների բացման ուղղությամբ: Բայց ինչո՞ւ եմ այս մասին ասում, որովհետեւ զգում եմ, որ հանրային դիսկուրսում փորձ է արվում սա նույնականացնել ինչ-որ «միջանցքների» մասին խոսակցության հետ:
«Միջանցքային» տրամաբանությամբ հարց Հայաստանի Հանրապետությունը չի քննարկել, չի քննարկում եւ չի քննարկելու: Ուզում եմ նաեւ ընդգծել հետեւյալը, որ հարցի էությունը հենց այսպիսին է, եւ մենք հենց այդ տրամաբանությամբ ենք առաջնորդվելու:
Ինչ վերաբերում է սահմանային իրադրությանը, կրկին ասում եմ, որ մեզ համար դիրքորոշումը միանշանակ է՝ Ադրբեջանի զինված ուժերը պետք է դուրս գան Հայաստանի ինքնիշխան տարածքից: Ես ուզում եմ ընդգծել, որ այստեղ, տվյալ դեպքում դեմարկացիայի եւ դելիմիտացիայի մասին խոսակցությունները տեղին չեն, եւ կրկին ուզում եմ ընդգծել, որ Հայաստանը դիվանագիտական ջանքերը շարունակում է՝ հարցը լուծելու համար: Իհարկե, սա չի նշանակում, որ մեր զինված ուժերն անգործության են մատնված, զինված ուժերն էլ իրենց հերթին իրականացնում են մարտավարական բնույթի գործողություններ: Բայց մեր առաջնահերթությունը եւ խնդիրն է՝ թույլ չտալ, որ իրավիճակը որեւէ ձեւով դուրս գա վերահսկողությունից»:
