ՀՀ վարչապետի պաշտոնակատար Նիկոլ Փաշինյանը շնորհավորական ուղերձ է հղել Վրաստանի վարչապետ Իրակլի Ղարիբաշվիլիին ազգային տոնի առթիվ: Այս մասին հայտնել են ՀՀ վարչապետի աշխատակազմի տեղեկատվության եւ հասարակայնության հետ կապերի վարչությունից:
«Ջերմորեն շնորհավորում եմ Ձեզ եւ Վրաստանի բարեկամ ժողովրդին Վրաստանի ազգային տոնի՝ Անկախության վերականգնման օրվա կապակցությամբ։
Ավելի քան մեկ դար առաջ, արտահայտելով սեփական անկախ պետականությունն ունենալու վերաբերյալ իր անբեկանելի կամքը, բարեկամ վրաց ժողովուրդն այսօր էլ հետեւողականորեն շարունակում է վերահաստատել իր այդ ձգտումը՝ կառուցելով եւ զարգացնելով Վրաստան պետությունը։
Հարգելի պարոն վարչապետ, Հայաստանը եւ Վրաստանը իրենց պետականաշինության ընթացքում մշակել եւ ներդրել են այնպիսի փոխգործակցության նախադրյալներ, որոնց իրականացմամբ հնարավոր է եղել մեր երկրների միջեւ հարաբերությունները լավագույնս պահպանել եւ զարգացնել:
Այսօր էլ առաջնորդող է այն տեսակետը, որ մեր երկրները շատ անելիքներ ունեն ինչպես երկկողմ հարաբերություններում, այնպես էլ տարածաշրջանային գործընթացներում: Այս համատեքստում աներկբա է Հայաստանի եւ Վրաստանի միջեւ համագործակցությունը խորացնելու եւ այն նորանոր ձեռքբերումներով հարստացնելու մեր հանձնառությունը:
Օգտվելով առիթից՝ մաղթում եմ Ձեզ հաջողություն Ձեր պետական գործունեության մեջ, իսկ եղբայրական Վրաստանի ժողովրդին՝ բարգավաճում եւ առաջընթաց»,-նշված է ՀՀ վարչապետի պաշտոնակատարի ուղերձում։
Իր հերթին՝ ՀՀ նախագահ Արմեն Սարգսյանը շնորհավորական ուղերձ է հղել Վրաստանի նախագահ Սալոմե Զուրաբիշվիլիին: Նա ընդգծել է, որ հայ եւ վրացի ժողովուրդները դարեր շարունակ առաջնորդվել են բարիդրացիական հարաբերությունները պահպանելու, սերտ համագործակցությունը շարունակելու եւ ամրապնդելու սկզբունքներով: «Գոհունակությամբ պետք է նշեմ, որ այսօր էլ Հայաստանն ու Վրաստանը շարունակում են հետեւողական հոգատարությամբ վերաբերվել երկու երկրների միջեւ ձեւավորված բազմաշերտ հարաբերություններին:
Ուրախ եմ, որ Վրաստան կատարած իմ պաշտոնական այցի ընթացքում հնարավորություն ունեցանք քննարկելու մեր երկրների գործակցության խորացմանն ու զարգացմանը վերաբերող հարցեր: Որպես տարածաշրջանի երկու հարեւան եւ բարեկամ պետությունների նախագահներ՝ հանձնառու ենք նվիրումով եւ պատվով ծառայել մեր ժողովուրդներին եւ շարունակել համատեղ ջանքերը՝ հաջորդ սերունդներին փոխանցելու մեր նախնիներից ժառանգություն ստացած բարեկամական հարաբերությունները»,-մասնավորապես ասված է նախագահ Սարգսյանի շնորհավորական ուղերձում:
