Մայիսի 21-ին N զորամասում տեղի ունեցավ ՀՀ զինված ուժերի հակաօդային պաշտպանության զորքերի կազմավորման 29-ամյակին նվիրված հանդիսավոր միջոցառում։ Ներկաների թվում էին բարձրաստիճան սպաներ, հյուրեր։
Զորամասի հրամանատար, գնդապետ Սասուն Աբրահամյանը նախ ողջունեց ներկաներին, ապա ներկայացրեց շուրջ երեսնամյա պատմության ընթացքում ՀՕՊ ուժերի կարեւորագույն դերակատարումը մեր միասնական հայրենիքի օդային սահմանների անառիկության պահպանման գործում։ Նա միաժամանակ ընդգծեց ՀՕՊ ուժերի բացառիկ գործառույթը մարտական գործողությունների ընթացքում օդում նկատված ԱԹՍ-ների կամ թռչող այլ օբյեկտների խոցման հարցում, երբ առաջնահերթ թաքստոց փնտրելու փոխարեն ՀՕՊ զորքերի զինծառայողները գիտակցաբար իրենց կցված մարտական մեքենաներով դուրս են գալիս թշնամու նշանառության տակ՝ վայրկյան իսկ առաջ խոցելու թիրախը։
Ելույթով հանդես եկավ նաեւ զորամասի հրամանատարի ԲՀԱ գծով տեղակալ, փոխգնդապետ Մկրտիչ Պողոսյանը՝ նշելով. «ՀՕՊ ուժերը ծնվեցին Արցախյան առաջին հաղթական պատերազմի կրակներում, թրծվեցին ու կատարելագործվեցին՝ սահմանելով բարձր մարտունակության նշաձող եւ ամրագրելով իրենց ծանրակշիռ դերակատարումն ազգային բանակի մարտունակության ապահովման համատեքստում»։
Միջոցառման ավարտին ծառայության ընթացքում լավագույն կողմերով աչքի ընկած զինծառայողները պարգեւատրվեցին պատվոգրերով եւ շնորհակալագրերով։
