ԱՄՆ պետքարտուղարի եվրոպական եւ եվրասիական հարցերով տեղակալի պաշտոնակատար Ֆիլիպ Ռիքերը հանդիպում է ունեցել ՀՀ ԱԳ նախարարությունում:
Ինչպես տեղեկացրել են ՀՀ արտաքին գործերի նախարարության լրատվության եւ հանրային դիվանագիտության վարչությունից, հանդիպման ընթացքում ՀՀ եւ ԱՄՆ արտաքին քաղաքական գերատեսչությունների բարձրաստիճան պաշտոնյաները քննարկել են երկկողմ հետաքրքրություն ներկայացնող հարցերի լայն շրջանակ: Հատուկ անդրադարձ է կատարվել ԼՂ հակամարտության կարգավորմանը, հայ ռազմագերիների եւ պատանդի կարգավիճակում գտնվող քաղաքացիական անձանց անհապաղ հայրենադարձմանը, ինչպես նաեւ` Ադրբեջանի զինված ուժերի կողմից ՀՀ ինքնիշխան տարածք ներթափանցման հետեւանքով ստեղծված իրավիճակին:
«Երկուստեք վերահաստատվեց ԵԱՀԿ Մինսկի խմբի համանախագահների ձեւաչափի առանցքային դերակատարության շարունակականությունը ԼՂ հակամարտության կարգավորման գործում: Կարեւորվեց առաջացած հումանիտար հարցերի հասցեագրումը եւ Արցախ միջազգային մարդասիրական օգնության անարգել մուտքը»,- ասվում է հաղորդագրության մեջ:
Ըստ աղբյուրի՝ ամերիկյան կողմն ընդգծել է Հայաստանի եւ Ադրբեջանի սահմանին տիրող իրավիճակի լարվածության թուլացման անհրաժեշտությունը` վերահաստատելով ԱՄՆ պետքարտուղարության մայիսի 27-ի հայտարարությամբ ամրագրված դիրքորոշումն առ այն, որ Ադրբեջանի զինված ուժերը պետք է հետ քաշվեն մայիսի 11-ի դրությամբ զբաղեցրած դիրքեր։
ՀՀ ԱԳՆ-ից հայտնում են, որ մտքեր են փոխանակվել նաեւ մարդու իրավունքների պաշտպանության եւ մարդկության դեմ հանցագործությունների կանխարգելման օրակարգի շուրջ: Ընդգծվել է Հայոց ցեղասպանության ճանաչման կարեւորությունը՝ որպես ապագայում նման հանցագործությունները կանխարգելելու գործուն միջոց:
Քննարկվել են նաեւ ՀՀ-ԱՄՆ ռազմավարական երկխոսության ձեւաչափում իրականացվող հետագա աշխատանքները:
