2021 թ. մայիսին կառավարությունը 2017 թ. հոկտեմբերի 5-ի որոշման մեջ փոփոխություն կատարեց, որը վերաբերում էր մինչեւ 2018 թ. հունվարի 1-ը ունեցած հարկ վճարողների գերավճարները եւ դրանցից տարբերվող գումարները վերադարձնելու պարզեցված ընթացակարգ սահմանելուն։ Բանն այն է, որ, ըստ ՊԵԿ-ի, հարկ վճարողի՝ մինչեւ 2018 թ. հունվարի 1-ը գործող օրենսդրության շրջանակներում առաջացած գերավճարի կամ գերավճարից տարբերվող գումարի մնացորդի վերադարձման գործընթացի համար հարկ վճարողից պահանջվում էր երկու անգամ հարկային մարմին ներկայացնել դիմում, ինչի արդյունքում ձգձգվում էր նշված գումարի վերադարձման ընթացակարգը։ Խնդիր էր նաեւ այն, որ 2018 թ. հունվարի 1-ի դրությամբ առկա՝ հարկ վճարողի գերավճարի կամ գերավճարից տարբերվող գումարների հաշվին չէին մարվում վերջինիս սոցիալական վճարի գծով պարտավորությունները: Այդ պարտավորությունները 2018 թ. հունվարի 1-ից հետո մարվում են միայն միասնական հաշվում առկա գումարների հաշվին: Փոփոխության համաձայն՝ 2018 թ. հունվարի 1-ի դրությամբ առկա գերավճարի եւ գերավճարից տարբերվող գումարի մնացորդը կվերադարձվի հարկ վճարողի միասնական հաշվին՝ առանց հարկ վճարողի դիմումի ներկայացման:
«ՀՀ»-ն երեկ հարց ուղղեց ՊԵԿ-ին այս տարվա մայիսին ընդունված այդ փոփոխության արդյունքում՝ ՀՀ պետական բյուջեի միջոցների առանձին ենթահաշիվներում հաշվառված եւ 2018 թ. հունվարի 1-ի դրությամբ առկա գերավճարի վերադարձման մասին՝ ինչքան գերավճար է վերադարձվել կազմակերպությունների ու անհատ ձեռնարկատերերի միասնական հաշվին: Ի պատասխան՝ ՊԵԿ տեղեկատվության եւ հասարակայնության հետ կապերի բաժնի պետ Լուսինե Մկրտչյանը տեղեկացրեց, որ մասնավորապես շուրջ 4.1 մլրդ դրամ գերավճարի մնացորդը ՀՀ պետական եկամուտների կոմիտեի կողմից ամբողջությամբ փոխանցվել է 29 306 հարկ վճարողի միասնական հաշվին: «Միաժամանակ տեղեկացնում ենք,- ասաց Լ. Մկրտչյանը,- որ միասնական հաշվին փոխանցված գումարները ստանալու նպատակով հարկ վճարողները կարող են էլեկտրոնային եղանակով հարկային մարմին ներկայացնել համապատասխան դիմում (սահմանված է ՀՀ ԿԱ ՊԵԿ նախագահի 27. 07. 2017 թ թիվ 246-Ն հրամանով), որից հետո գումարն ինքնաշխատ կփոխանցվի դիմումում նշված բանկային հաշվին, եւ հարկ վճարողը կարող է այն տնօրինել»:
Պատկերն ամբողջականացնելու նպատակով հավելենք, որ ՊԵԿ տեղեկատվական բազայում առկա տվյալների համաձայն՝ 2021 թ. մայիսի 1-ի դրությամբ գերավճար ունեցող հարկ վճարողների թիվը 35935 է, իսկ գերավճարի գումարը՝ 4549.3 հազար դրամ։ Ընդ որում՝ գերավճար ունեցող հարկ վճարողների շուրջ 89 տոկոսն ունեն 1 դրամից մինչեւ 100 հազար դրամ գերավճարներ, իսկ 35 հարկ վճարողներ ունեն 10 մլն դրամից ավելի գերավճարներ, որի ընդհանուր հանրագումարը կազմում է մոտ 1.800.0 հազար դրամ։
