Երեւան։ Ծանր ու հոգնեցուցիչ տապ։ Եվ ջրանջատումներ։ Սոցցանցերում էլ բազմաթիվ ահազանգեր կան այս օրերին։ Հունիսի 23-ին, օրինակ, ֆիքսեցինք, որ 6-9 ժամով ջուր չի եղել Դավթաշենում, Աջափնյակում, Փարաքարում, Արգավանդում, հունիսի 24-ին՝ 4 ժամ Ավանում (Դուրյան թաղամաս)… Ամենօրյա ցանկը շարունակական է, բայց այն արձանագրելն իրավիճակը չի փոխում։
Ի դեպ, «Վեոլիա ջուր» ընկերություն զանգահարելու մեր բոլոր փորձերն անհաջող են։ Երեկ գրեթե 8 ժամվա ընթացքում, առավոտյան 8։30-ից սկսած, պարբերաբար փորձել ենք զանգահարել ընկերության ամենատարբեր հեռախոսահամարներով՝ 185, 011.300-185, 08-00-00-185 (անվճար)։ Այս երեք հեռախոսահամարը «թեժ գծի» սկզբունքով են գործում։ Նաեւ՝ այն հեռախոսահամարով, որ հենց մամուլի ներկայացուցիչների համար է նախատեսված՝ 374 11 59-03-68։ Վերջինս չի պատասխանում, իսկ նախորդ հեռախոսահամարներից էլ միակ պատասխանը… երաժշտությունն է կամ՝ որ բոլոր օպերատորները զբաղված են։
Ինչեւէ, «Վեոլիա ջրի» կայքում հունիսի 22-ի թվագրությամբ մի գրառում կա, ըստ որի ջրամատակարարման ընդհատումները մատակարարվող էլեկտրաէներգիայի լարման տատանումների պատճառով են. «Վերջին օրերին «Հայաստանի էլեկտրական ցանցեր» ՓԲԸ կողմից մատակարարվող էլեկտրաէներգիայի լարման տատանումների պատճառով ընդհատումներ են առաջացել ջրամատակարարման համակարգի պոմպակայանների աշխատանքում, որով պայմանավորված զգալիորեն նվազել է սպառողներին մատակարարվող ջրաքանակը: Ստեղծված իրավիճակում, ջրամատակարարման ժամանակացույցի անխուսափելի խախտումները նվազագույնի հասցնելու համար «Վեոլիա րուր» ընկերության կողմից ձեռնարկվում են քայլեր՝ աղբյուրներից ինքնահոս եղանակով ստացվող ջրաքանակի վերաբաշխման միջոցով սպասարկվող բոլոր բնակավայրերում ապահովել հնարավորինս կանոնավոր ջրամատակարարում։ Ջրամատակարարումը լիարժեք կվերադառնա հաստատված ժամանակացույցին «Հայաստանի էլեկտրական ցանցեր» ՓԲԸ-ի կողմից տվյալ խնդիրը լուծելուց հետո…»:
Այս ընթացքում, սակայն, լուրեր շրջանառվեցին, որ ջրանջատումների իրական պատճառն այն է, որ «Վեոլիա ջուրը» ՀԷՑ-ին պարտք է, ինչը հունիսի 23-ի հայտարարությամբ հերքել էր «Վեոլիա ջուրը»՝ նշելով, թե «իրենք բարձր են գնահատում իրենց գործարար համբավը եւ հարգում գործընկերներին, հետեւաբար, կանոնավոր վճարում են մատուցված ապրանքների ու ծառայությունների դիմաց եւ որեւէ պարտք չունեն»: Եվ կրկնել էին, թե խնդիրը զուտ տեխնիկական բնույթի է… Հետո «Վեոլիա ջուրը» հորդորել էր լրատվամիջոցներին նմանօրինակ լուրերը հրապարակելուց առաջ ճշտել ընկերության հանրային կապերի բաժնում:
Ճշտելն, ինչ խոսք, կճշտենք, եթե միայն «Վեոլիա ջուրը» պատասխանի հեռախոսազանգերին կամ՝ գոնե հենց ԶԼՄ-ների համար նախատեսված հեռախոսահամարի զանգերին։ Մեր զանգերին պատասխանեցին «Հայաստանի էլեկտրական ցանցերում»։ «ՀՀ»-ն փորձեց հասկանալ՝ ի վերջո՝ որն է ջրանջատումների իրական պատճառը կամ՝ «Վեոլիա ջուրը» պա՞րտք է ՀԷՑ-ին։ Ի պատասխան ՀԷՑ ՓԲԸ հասարակայնության եւ կորպորատիվ կապերի դեպարտամենտի ղեկավար Նատալյա Սարջանյանն ասաց, որ իրենք չեն պատասխանի այն պատասխանին, որ «Վեոլիա ջուրը» տվել է լրատվամիջոցներին՝ պարտքի մասով։ Փոխարենը կպատասխանեն «Վեոլիա ջրի»՝ հենց իրենց՝ ՀԷՑ-ին ուղղված մասին՝ լարման տատանումների մասով։ Այն է՝ ««Հայաստանի էլեկտրական ցանցեր» ընկերությունը էլեկտրաէներգիա է մատակարարում Հայաստանում գործող բազմաթիվ արդյունաբերական ձեռնարկությունների, ոռոգման, ջրամատակարարման այլ ընկերությունների, որոնցից այս օրերին լարման շեղման վերաբերյալ որեւէ բողոք չի ստացել»:
ՀԷՑ-ի ներկայացուցիչը «ՀՀ»-ի հետ զրույցում մեկ օրինակ բերեց. ըստ տեխնիկական կանոնակարգի միջազգային ստանդարտի (ГОСТ 32144-2013) էլեկտրաէներգիայի լարման դրական/բացասական շեղումները չպետք է գերազանցեն 10 տոկոսը: «Վեոլիա ջուր» ընկերությունը, որպես, ասենք, «Շոր-շոր» աղբյուրի պոմպակայանում պոմպի աշխատանքի անջատման պատճառ, նշում է լարման նվազումը՝ 6000 վ-ի փոխարեն՝ 5484 վ, ավելացնում նաեւ, որ 4 պոմպի փոխարեն աշխատում է 1-ը: Առաջինը, տվյալ դեպքում առկա է նորմատիվային, թույլատրելի շեղում, եւ երկրորդը, եթե մեկ պոմպը աշխատում է, ապա կարող են աշխատել նաեւ մնացած 3-ը: Լարման շեղման արդյունքում պոմպերը կա՛մ միանում են, կա՛մ՝ ոչ, եւ պոմպերի քանակն այստեղ նշանակություն չունի:
Ինչ վերաբերում է «Վեոլիա ջուր» ընկերության կողմից էլեկտրամատակարարման լարման շեղումների մասին 15 օրվա կտրվածքով բողոքին, ՀԷՑ-ը կրկին խնդրում է նկատի ունենալ, որ իրենք էլէներգիա են մատակարարում Հայաստանում գործող բազմաթիվ ընկերությունների, որոնցից այս օրերին որեւէ մեկը լարման շեղման որեւէ բողոք չի ներկայացրել։ «Ավելին,- ընդգծեց Ն. Սարջանյանը,- մեր ընկերության մի շարք աշխատակիցներ զանգահարել են «Վեոլիա ջուր» ընկերության բաժանորդների սպասարկման տեղեկատվական կենտրոն, ճշտելու, թե որն է իրենց հասցեների ջրազրկման պատճառը։ Եվ պատասխան ստանալով, որ պատճառը լարման շեղումներն են, հնարավորություն են ունեցել չափելու լարումը։ Համոզվել են, որ շեղում չկա»: ՀԷՑ-ը հավելում է նաեւ, թե «անհրաժեշտության դեպքում պատրաստ է աջակցել եւ մասնագիտական խորհրդատվություն տրամադրել «Վեոլիա ջուր» ընկերությանը՝ պոմպակայանների բնականոն աշխատանքի վերականգնման համար»։
Այս պահին սա է պատկերը՝ ջուր սպառողը վճարում է, բայց դրա դիմաց պատշաճ ծառայություն չի ստանում: Եվ սպառողին բնավ հետաքրքիր չէ, ով ում է պարտք կամ՝ պարտք է արդյոք, կամ լարման շեղում կա, թե ոչ: Սպառողը նաեւ ֆինանսական կորուստ է կրում (դեռ չենք խոսում այս տապին ջրանջատումների բացասական հետեւանքների մասին՝ վարակների տարածում եւն)՝ ստիպված լինելով խմելու, ճաշ պատրաստելու եւ անհետաձգելի դեպքերի համար, հնարավորության պարագայում իհարկե, տանն անկողնային հիվանդին, տարեցին կամ մանկահասակ երեխային գոնե փոքր-ինչ հովացնելու համար «թաթախելու» ջուրը խանութից գնել: Ու այս դեպքերում ջրամատակարար ընկերության ներողամտությունը սպառողին բնավ պետք չէ, ինչին դարձյալ կարող են… հետեւանքներ հետեւել:
