Արցախի բնակչության 2021 թ. հուլիսի էլեկտրաէներգիայի, գազամատակարարման եւ կապի ծառայությունների ծախսերի, ինչպեսեւ՝ Արցախի 2021 թ. պետական բյուջեով նախատեսված հուլիսի աշխատավարձերի, նպաստների, կենսաթոշակների, առողջապահության ծախսերի ֆինանսավորման համար գումար կտրամադրվի։ Այսպես երեկ որոշվեց ՀՀ կառավարության նիստում։
Ինչպես տեղեկացրեց ֆինանսների նախարարի պաշտոնակատար Ատոմ Ջանջուղազյանը, ստացվել է Արցախի ֆինանսների նախարարի գրությունը՝ այդ ծախսերի ֆինանսավորման, նաեւ կուտակային հատկացումների եւ պարտատոմսերի մարման նպատակով աջակցություն տրամադրելու վերաբերյալ: Կենսաթոշակների, երեխաների նպաստների, էլեկտրաէներգիայի, գազամատակարարման եւ կապի ծառայությունների սուբսիդավորման, առողջապահության ծախսերի եւ կուտակային հատկացումների համար պահանջվող գումարը 7 մլրդ 354 մլն 715 հազար է։ Իսկ պարտատոմսերի մարման համար անհրաժեշտ է 1 մլրդ 434 մլն 346 հազար դրամ։
Գումարի մի մասը Արցախի կառավարությանը կտրամադրվի նվիրատվության պայմանագրի հիման վրա՝ հուլիսին բնակչության էլեկտրաէներգիայի, գազամատակարարման եւ կապի ծառայությունների ֆինանսավորման համար՝ շուրջ 1,2 մլրդ-ի չափով: Մնացյալը Արցախին կտրամադրվի իբրեւ միջպետական վարկ՝ հուլիսի աշխատավարձերի, նպաստների, կենսաթոշակների, առողջապահության ծախսերի, պարտատոմսերի մարման նպատակով։ Միջպետական վարկը Արցախի կառավարությանը կտրամադրվի տարեկան 0,001 տոկոս տոկոսադրույքով, մինչեւ 2025 թ. հունվարի 1-ը մարման ժամկետով՝ վարկի հիմնական գումարի եւ դրա նկատմամբ հաշվեգրվող տոկոսագումարների վճարումը վարկի մարման վերջնաժամկետում իրականացնելու պայմանով։ «Այս տարվա Արցախին հատկացվող միջպետական վարկն ունեցել է նույն տրամաբանությունը, ինչ մինչ պատերազմը, եւ այն գրեթե ամբողջությամբ սպառվել է առաջին կիսամյակում, քանի որ սեփական տնտեսությունը նոր եկամուտներ հնարավորություն չի ունեցել գեներացնել: Դրանով պայմանավորված լրացուցիչ պետական վարկ տրամադրելու անհրաժեշտություն է առաջացել»,- ասաց Ջանջուղազյանը:
Որոշումն ուժի մեջ կմտնի պաշտոնական հրապարակմանը հաջորդող օրվանից։
Արցախի հետ կապված ՀՀ կառավարությունը երեկ մեկ այլ որոշում էլ ընդունեց, որն արդեն չզեկուցվողների շարքում էր։ Արտակարգ իրավիճակների նախարարության հաշվեկշռում հաշվառված գույքը՝ 7 մլն 123 հազ. դրամ հաշվեկշռային արժեքով, կվերցնի եւ կնվիրաբերի Արցախին։ 2020 թ. սեպտեմբերի 27-ին թշնամու կողմից Արցախի ուղղությամբ սանձազերծված պատերազմի ընթացքում արտակարգ իրավիճակների նախարարության փրկարար ծառայությունն իր միջոցների հաշվին Արցախի ներքին գործերի նախարարության արտակարգ իրավիճակների պետական ծառայությանն է տրամադրել գույք-սարքավորումներ, ինչը խիստ անհրաժեշտ է եղել Արցախի բնակչությանը ֆինանսական, բժշկական օգնություն ցուցաբերելու եւ փրկարարական ծառայության համար։ ՀՀ-ում արտակարգ իրավիճակների եւ Արցախի Հանրապետության ներքին գործերի նախարարությունների միջեւ ձեռք էր բերվել բանավոր համաձայնություն՝ տրամադրվող գույքը հնարավոր սեղմ ժամկետում Արցախ ուղարկելու վերաբերյալ՝ պայմանով, որ օրենքով սահմանված կարգով փաստաթղթավորումը կիրականացվի համապատասխան ընթացակարգով։ Ելնելով վերոգրյալից՝ անհրաժեշտություն է առաջացել ընդունելու ՀՀ կառավարության որոշում՝ ԱԻՆ հաշվեկշռում հաշվառված գույքը հետ վերցնելու եւ Արցախի ներքին գործերի նախարարությանը նվիրաբերելու համար:
