Հուլիսի 11-ին ԻԻՀ-ում ՀՀ արտակարգ եւ լիազոր դեսպան Արտաշես Թումանյանն այցելել է Իրանի Կենտրոնական նահանգ: Այցի ընթացքում ՀՀ դեսպանին ընդունել է նահանգապետ Սեյեդ Ալի Աղազադեն, որի հետ քննարկվել են ՀՀ-ԻԻՀ տնտեսական եւ մշակութային հարաբերությունների զարգացման խնդիրները եւ այդ համատեքստում կողմերի համապատասխան կառույցների ներուժի առավել արդյունավետ օգտագործման հնարավորությունները:
Կենտրոնական նահանգի առեւտրի, արդյունաբերության, հանքերի եւ գյուղատնտեսության պալատում կազմակերպված գործարար համաժողովի ընթացքում դեսպան Թումանյանը հանգամանորեն ներկայացրել է ՀՀ տնտեսության եւ գործարար միջավայրի վիճակը, առեւտրային եւ ներդրումային ծրագրերի իրականացման առավել բարենպաստ ուղղությունները եւ պատասխանել գործարարների բազմաթիվ հարցերին:
Համաժողովի շրջանակներում պայմանավորվածություն է ձեռք բերվել նահանգի գործարարներից բաղկացած խումբ գործուղել Հայաստան՝ տնտեսական գործունեություն սկսելու հնարավորությունների քննարկման նպատակով:
Այցի ընթացքում ՀՀ դեսպանը եղել է նահանգի մի շարք ձեռնարկություններում:
Դեսպան Թումանյանը Կենտրոնական նահանգ կատարած այցի նպատակների եւ հայ-իրանական տնտեսական հարաբերությունների մասին հարցազրույց է տվել նահանգային ռադիոհեռուստատեսությանը (IRIB):
Օրվա ավարտին դեսպան Թումանյանն այցելել է Արաքի Սուրբ Մեսրոպ եկեղեցի եւ հանդիպում ունեցել տեղի հայ համայնքի ներկայացուցիչների հետ:
