Ադրբեջանի, Թուրքիայի եւ Պակիստանի խորհրդարանների ղեկավարներն առաջին եռակողմ հանդիպման արդյունքներից ելնելով՝ նախօրեին ստորագրել են Բաքվի հռչակագիրը, որն ուղղված է երեք երկրների հարաբերությունների ինստիտուցիոնալացմանը։ Եռակողմ հանդիպման ընթացքում քննարկվել են ռազմական ոլորտում համագործակցությանն ուղղված հարցեր։
Թուրքիայի Մեծ ազգային ժողովի նախագահ Մուստաֆա Շենթոփը Գանձակում երեկ կայացած մամուլի ասուլիսի ժամանակ հայտարարել էր, որ Թուրքիան եւ Ադրբեջանը բանակցություններ են վարում միացյալ թյուրքական բանակ ստեղծելու շուրջ: Սակայն ավելի ուշ, «Minval.az»-ի տեղեկացմամբ, նա հերքել է իր իսկ խոսքերը՝ նշելով, որ ինքը չի խոսել միացյալ թյուրքական բանակ ստեղծելու շուրջ Բաքվի եւ Անկարայի միջեւ բանակցությունների մասին։ Նա ընդգծել է, որ առայժմ անցկացվում են միայն երկու երկրների համատեղ զորավարժություններ: Ի դեպ, առաջին անգամ չէ, երբ Թուրքիան օրակարգ է մտցնում միացյալ բանակի ստեղծման գաղափարը։ Ադրբեջանի, Թուրքիայի եւ Պակիստանի խորհրդարանների ներկայացուցիչների հաջորդ հանդիպումը տեղի կունենա 2022 թվականին Իսլամաբադում: Թուրքիայի խորհրդարանի ղեկավարը չի բացառել, որ ապագայում հնարավոր է՝ եռակողմ հանդիպում անցկացվի երեք երկրների ղեկավարների մասնակցությամբ:
Եռակողմ հանդիպման ժամանակ խոսք է եղել Թուրքիայի եւ Ադրբեջանի միջեւ ցամաքային կապի ստեղծման մասին, ինչը նշանակում է ոտնձգություն Հայաստանի Հանրապետության սուվերեն տարածքի նկատմամբ։ Ադրբեջանի եւ Թուրքիայի կողմից շրջանառության մեջ դրված այսպես կոչված՝ «Զանգեզուրի միջանցք» ձեւակերպումը բացահայտ ոտնահարում է մեր պետության եւ ազգի շահերը։ Ադրբեջանի խորհրդարանի նախագահ Սահիբա Գաֆարովան Միլլի մեջլիսում երեք երկրների խորհրդարանների նախագահների հանդիպման ժամանակ հայտարարել էր, որ «Զանգեզուրի միջանցքը կդառնա նոր միջանցք եղբայրական Պակիստանից դեպի Թուրքիա եւ Ադրբեջան»: Շենթոփը նույնպես անդրադարձել է «Զանգեզուրի միջանցքի» բացմանը՝ կարեւորելով դրա նշանակությունն ինչպես Ադրբեջանի, այնպես էլ՝ Թուրքիայի համար. «Զանգեզուրի միջանցքը ցամաքային ուղի կստեղծի Ադրբեջանի հիմնական մասի եւ Նախիջեւանի, Ադրբեջանի եւ Թուրքիայի միջեւ, ինչպես նաեւ Թուրքիայի եւ ասիական երկրների միջեւ: Համապատասխան պայմանավորվածություն է ձեռք բերվել, եւ յուրաքանչյուր կողմ պետք է պահի իր խոսքը: Միջանցքը պետք է բաց լինի»։
Բաքվի, ինչպես նաեւ հունիսին օկուպացված Շուշիում ստորագրված հռչակագրերով նպատակ է հետապնդվում Հայաստանի տարածքի անեքսիայով իրականություն դարձնել «Զանգեզուրի միջանցքը»։ Երեկ Ադրբեջանի զինված ուժերի՝ Գեղարքունիքի ուղղությամբ իրականացրած հերթական սադրանքը, որի արդյունքում հայկական կողմն ունեցել է զոհեր եւ վիրավորներ, նաեւ նպատակ ունի բարենպաստ դիրքեր զբաղեցնել մեր տարածքում հետագայում նոր հարձակումներ գործելու համար։ Չմոռանանք, որ մայիսի 12-ից առայսօր ՀՀ տարածքում են ադրբեջանական զինված ուժերի մեծաքանակ ներկայացուցիչներ եւ զինտեխնիկա։ Միաժամանակ թուրք-ադրբեջանական տանդեմը քարոզչական գրոհ է սկսել՝ Հայաստանին վերագրելով իրենց իսկ սադրանքներն ու ագրեսիվ գործողությունները։ «Եթե այս սադրանքները չդադարեն, ապա ավելի դառը հետեւանքներն անխուսափելի են: Համաշխարհային հանրությունը պետք է նաեւ հորդորի Հայաստանին՝ դադարեցնել սադրանքները, որոնք վտանգ են ներկայացնում տարածաշրջանում խաղաղության համար»,- բացահայտ սպառնում է Շենթոփը՝ չմոռանալով շեշտել, որ Թուրքիան մշտապես, այդ թվում՝ արցախյան երկրորդ պատերազմի ամբողջ ընթացքում, աջակցել է Ադրբեջանին:
Հայաստանի տարածքով թյուրքական աշխարհի միավորումը դուրս է այլեւս Հայաստան-Ադրբեջան, անգամ տարածաշրջանային հարաբերությունների զարգացման տիրույթից։ Այս ամենը վկայում է, որ Հայաստանն առանցքային նշանակություն ունի թե տարածաշրջանային, թե գլոբալ զարգացումներում, դերակատարություն, որը հաճախ մենք չենք գիտակցում եւ համաշխարհային բեմ ենք բարձրանում սեփական հնարավորությունները չգիտակցելով։
