Կառավարությունը երեկվա նիստում որոշեց «Հյուսիս-հարավ» ճանապարհային միջանցքի ներդրումային ծրագրի հետագա իրականացման գործընթացում այդ միջանցքի ներդրումային ծրագիր-ծրագիր 4-ի շրջանակներում Սիսիան-Քաջարան ճանապարհահատվածի կառուցումը սահմանել որպես առաջնահերթություն: Նույն որոշմամբ հաստատվեց նաեւ ներդրումային ծրագիրը։
«Հյուսիս-հարավ» ծրագիրը խոշոր ենթակառուցվածքային ծրագիր է, որի նպատակն է միջազգային բարձր ստանդարտներին բավարարող 560 կմ ընդհանուր երկարությամբ Մեղրի-Երեւան-Բավրա ավտոճանապարհի միջոցով երկրի հարավը կապել հյուսիսի հետ՝ կրճատելով այն: Արդյունքում՝ առկա 560 կմ միջինում 50 կմ/ժ արագությամբ գործարկվող ավտոմոբիլային ճանապարհը վերակառուցվելու է միջինում 80-100 կմ/ժ արագությամբ ճանապարհի։ «Հյուսիս-հարավ» ծրագրի իրականացման համար մինչ օրս վարկային պայմանագրեր են կնքվել Ասիական զարգացման (ԱԶԲ), Եվրոպական ներդրումային (ԵՆԲ) բանկերի եւ Եվրասիական կայունացման եւ զարգացման հիմնադրամի հետ: Հայաստանի համար «Հյուսիս-հարավ» ծրագրի աշխարհաքաղաքական նշանակության մասին «ՀՀ»-ն մեկ անգամ չէ, որ խոսել է, ուստի այստեղ դրան չենք անդրադառնա։
Ըստ տարածքային կառավարման եւ ենթակառուցվածքների նախարարի տեղակալ Վաչե Տերտերյանի՝ «Հյուսիս-հարավ» ծրագրի ներկա փուլում շինարարական աշխատանքներն ընթանում են հյուսիսային ուղղությամբ, ուստի անհրաժեշտ է ուշադրությունը կենտրոնացնել հարավային ուղղության (տրանշ 4) վրա եւ որպես առաջնահերթություն սահմանել Սիսիան-Քաջարան ճանապարհահատվածի (այդ թվում՝ Բարգուշատի թունելի) կառուցումը. «Ծրագրի առաջնահերթությունը պայմանավորված է այն հանգամանքով, որ վերջինիս իրականացումը հնարավորություն կտա արդիականացնել Իրանին կապող ճանապարհահատվածը, մեծացնել հետաքրքրությունը Հայաստանի տարածքով տարանցիկ երթեւեկության նկատմամբ, ապահովել Հայաստանի հարավային շրջանների անվտանգությունը, ճանապարհային անվտանգության պահանջվող մակարդակը, նպաստել հարավային շրջանների (Արարատի, Վայոց ձորի եւ Սյունիքի մարզեր) տնտեսական զարգացմանը եւ, որպես արդյունք, նշված մարզերի բնակչության կենսամակարդակի բարելավմանը»:
Դարձյալ ըստ Վ. Տերտերյանի՝ 2015 թ. մարտի 30-ին իտալական «SPEA Engineering SpA եւ IRD Engineering Srl» համատեղ ձեռնարկության հետ կնքված 03-CS-001 պայմանագրի շրջանակներում նախագծողն իրականացրել է Սիսիան-Քաջարան ճանապարհահատվածի, այդ թվում՝ Բարգուշատի թունելի, մանրամասն նախագծումը։ Դրա համաձայն՝ նախատեսվում է կառուցել 2-րդ տեխնիկական կարգի (100 կմ/ժամ հաշվարկային արագությամբ) շուրջ 60 կմ ընդհանուր երկարությամբ նոր ճանապարհահատված, այդ թվում՝ 4.7 կմ ընդհանուր երկարությամբ կամուրջների եւ 12.5 կմ ընդհանուր երկարությամբ թունելների (ամենաերկարը` Բարգուշատի թունելն է, որի երկարությունը կկազմի շուրջ 8.6 կմ) կառուցում։
Ի դեպ, իտալական այս նախագծողի նախապատրաստած նախահաշվի համաձայն՝ ծրագրով նախատեսված շինարարական աշխատանքների արժեքը կազմում է շուրջ 474.3 մլրդ դրամ (այդ թվում՝ ԱԱՀ-ն): Նախագիծն անցել է հատուկ համալիր փորձաքննություն։
ՏԿԵ փոխնախարարի խոսքերով՝ հաշվի առնելով ներդրումային ծրագրի կարեւորությունն ու ռազմավարական նշանակությունը երկրի սոցիալ-տնտեսական եւ տարածաշրջանային զարգացման համար, ինչպեսեւ մրցույթի ծավալներն ու միջազգային կազմակերպությունների կողմից ֆինանսավորվելու հավանականությունը՝ առաջարկվում է ներդրումային ծրագրի շրջանակներում շինարարական աշխատանքների գնման նախաորակավորման ընթացակարգը կազմակերպել Վերակառուցման եւ զարգացման եվրոպական բանկի գնումների միջազգային ուղեցույցով սահմանված աշխատանքների ձեռքբերման համար նախատեսված նախաորակավորման ընթացակարգի կազմակերպման փաստաթղթերի օրինակելի ձեւաչափերի հիմամբ։
«Հյուսիս-հարավ» ճանապարհային միջանցքի այս շատ կարեւոր ռազմավարական՝ Սիսիան-Քաջարան հատվածի կառուցումը կապահովի ավելի դյուրին, հարմարավետ երթեւեկություն Հայաստանի հարավային սահմանից դեպի Վրաստանի սահման եւ թույլ կտա ուղեւորների ու բեռների փոխադրումներն իրականացնել բարձր ստանդարտներին համապատասխան կառուցված ճանապարհային հատվածով»,- եզրափակեց Վ. Տերտերյանը:
