Կառավարությունը երեկվա նիստում «Գորիսի բժշկական կենտրոնի» եւ «Կապանի բժշկական կենտրոնի» կանոնադրական կապիտալները նվազեցնելու, պետական գույքի կառավարման կոմիտեին անշարժ գույք ամրացնելու եւ առողջապահության նախարարության «Դատաբժշկական գիտագործնական կենտրոնին» անժամկետ եւ անհատույց օգտագործման իրավունքով անշարժ գույք տրամադրելու որոշում կայացրեց։ Եվ դա պայմանավորեց Սյունիքի մարզում դատաբժշկական գործունեության իրականացման համար տարածքների հատկացման անհրաժեշտությամբ:
Համապատասխան տեղեկանքի համաձայն՝ ներկայում Սյունիքի մարզի դատաբժշկական փորձաքննությունների բաժնի փորձագետներն իրենց աշխատանքային գործունեությունն իրականացնում են Գորիսի բժշկական կենտրոնի եւ Կապանի բժշկական կենտրոնի մասնաշենքերում՝ սպասարկելով ամբողջ Սյունիքի մարզի բնակչությանն ու իրավապահ մարմիններին։ Օգտագործվող մասնաշենքերի շենքային պայմաններն իրենց չափանիշներով չեն համապատասխանում դատաբժշկական փորձաքննությունների կատարման պայմաններին ու պահանջներին, հատկապես խիստ անմխիթար է Կապանի ԲԿ-ի մասնաշենքը:
Սյունիքում դատաբժշկական փորձաքննությունների հետ կապված խնդիրները հատկապես ցայտուն ի հայտ եկան 2020 թ. սեպտեմբերի 27-ին Ադրբեջանի սանձազերծած պատերազմական գործողությունների ժամանակ, քանի որ Արցախում զոհված զինծառայողների մարմիններն ու մասունքները հիմնականում Հայաստան էին տեղափոխվում մարզի տարածքով՝ գործածելով Գորիսի եւ Կապանի բժշկական կենտրոնների դիահերձարանների մասնաշենքերը, որտեղ կատարվում էին նաեւ դիակների ու մասունքների արտաքին զննություններ եւ փորձաքննություններ։ Մասնավորապես՝ 2020 թ. Սյունիքում կատարվել են շուրջ 1000 ողջ անձանց եւ շուրջ 1030 դիակների դատաբժշկական փորձաքննություններ։ 2021 թ. առաջին կիսամյակում կատարվել են շուրջ 670 ողջ անձանց եւ շուրջ 480 դիակների փորձաքննություններ։
Հիմա առողջապահության նախարարության «Դատաբժշկական գիտագործնական կենտրոն» պետական ոչ առեւտրային կազմակերպության Սյունիքի մարզի Գորիսի եւ Կապանի դատաբժշկական փորձաքննությունների բաժինների գործունեության բնականոն աշխատանքի արդյունավետության տեսանկյունից նպատակահարմար է բաժինների համար առանձնացնել տարածքներ՝ դրանք տրամադրելով «Դատաբժշկական գիտագործնական կենտրոն» ՊՈԱԿ-ին։
Առողջապահության նախարարությունը նշում է, թե «ելնելով «Դատաբժշկական գիտագործնական կենտրոնի» Սյունիքի մարզի դատաբժշկական փորձաքննությունների բաժիններում պետության կողմից երաշխավորված բժշկական օգնության եւ սպասարկման շրջանակներում իրականացվող կենդանի անձանց եւ դիակների դատաբժշկական փորձաքննությունների կազմակերպման եւ անցկացման առանձնահատկություններից, ոլորտում առկա մի շարք խնդիրներից, դրանց շուրջ բնակչության եւ փորձաքննությունները նախաձեռնող՝ վարույթ իրականացնող մարմինների բազմաթիվ բանավոր եւ գրավոր միջնորդությունների վերլուծությունից՝ ոլորտի կողմից իրականացվող ծառայությունների արդյունավետությունը բարձրացնելու նպատակով առաջարկվում է բաժիններին հատկացնել տարածքներ Գորիսի եւ Կապանի բժշկական կենտրոններին սեփականության իրավունքով պատկանող շինություններից»։
Մասնավորապես՝ առաջարկվում է Գորիսի եւ Կապանի բժշկական կենտրոնների սեփականությունը համարվող համապատասխան անշարժ գույքով վճարել ՀՀ-ին պատկանող՝ ընկերությունների կողմից տեղաբաշխված բաժնետոմսերի դիմաց՝ ՀՀ-ից ձեռք բերված բաժնետոմսերի մարման միջոցով։ Համապատասխանաբար նվազեցնելով նաեւ բժշկական կենտրոնների կանոնադրական կապիտալները։
Այս որոշումը, ըստ առողջապահության նախարարության, անմիջականորեն բխում է ՀՀ կառավարության 2021-2026 թթ. ծրագրից, քանզի նախատեսվում է արդիականացնել մարզային առողջապահական համակարգն ու բարելավել դատաբժշկական ծառայության շենքային պայմանները։
Նախագծի ընդունմամբ պետական կամ տեղական ինքնակառավարման մարմնի բյուջեում ծախսերի եւ եկամուտների ավելացում կամ նվազեցում չի նախատեսվում:
