Մինչեւ 3 հեկտար հողատարածքներում կաթիլային, անձրեւացման ոռոգման համակարգերի ներդրման դեպքում ջրօգտագործողներին ոռոգման ջրի վարձավճարի փոխհատուցում կտրվի։
Կառավարությունը երեկվա նիստում հաստատեց համապատասխան ծրագիրը եւ ջրօգտագործողների ընկերություններին (ՋՕԸ-եր) առաջարկեց՝ 1. hաշվետու տարվա ֆինանսական հոսքերում առանձնացնել եւ պլանավորել ծրագրից բխող անհրաժեշտ ցուցանիշները՝ քանակային եւ արժեքային արտահայտությամբ, 2. հաստատված ֆինանսական հոսքերը ներկայացնել տարածքային կառավարման եւ ենթակառուցվածքների նախարարության ջրային կոմիտեին՝ ՋՕԸ-երի եւ ՋՕԸ-երի միությունների գործունեությունը կանոնակարգող խորհրդի գործադիր մարմնին։
Ջրային կոմիտեն հաստատված ֆինանսական հոսքերի հիմամբ ֆիննախին պետք է ներկայացնի ՋՕԸ-երի եւ ՋՕԸ-երի միությունների՝ միջնաժամկետ ծախսային ծրագրերի եւ յուրաքանչյուր տարվա համար հատկացվող բյուջետային ֆինանսավորման հայտերի նախագծերը: Ֆիննախը պետք է ապահովի այդ ընկերություններին եւ միություններին փոխհատուցման գումարների հատկացումները։
Էկոնոմիկայի նախարարին էլ հանձնարարվեց մինչեւ 2023 թ. դեկտեմբերի 31-ը մշակել եւ ներկայացնել առաջարկություն նոր տեխնոլոգիաներով՝ կաթիլային, անձրեւացման եղանակով գյուղատնտեսական մշակաբույսերի ոռոգման նորմերն ու ռեժիմները։ Որոշումն ուժի մեջ կմտնի հրապարակմանը հաջորդող օրվանից, ծրագիրը կմեկնարկի որոշումն ուժի մեջ մտնելու պահից եւ կգործի 5 տարի ժամկետով:
Հիմա անդրադառնանք այն հարցին, թե ինչ է ենթադրում ոռոգման ջրի վարձավճարի փոխհատուցման ծրագիրը։ Բանն այն է, որ, ըստ ՏԿԵ նախարարության, մեր երկրում կան գերնորմատիվային հողատարածքներ, որտեղ ոռոգման ջրի պահանջարկը ավելի է 2-3 անգամ: Կաթիլային կամ անձրեւացման ոռոգման արդի համակարգերն «իրենց բնույթով ներկայացնում են ճնշումային խողովակաշարերի առկայություն», այլ ոչ թե բաց ոռոգման համակարգեր, որոնք հնարավորություն են տալիս հաշվառել ջրի ծավալը: Մինչեւ 3 հա հողատարածք ունեցող կաթիլային, անձրեւացման համակարգով ոռոգվող շուրջ 250.0 հա հողատարածքների համար օգտագործվում է 980.0 հազ. խմ ջուր, միջինում 1 հա հողատարածքի համար օգտագործվում է 4.0 հազ. խմ ջուր, իսկ նախնական տվյալներով՝ ծրագրի շրջանակներում կանխատեսվող կաթիլային, անձրեւացման համակարգ ներդրողները 22.0 հազ. հա հողատարածքի համար կօգտագործեն շուրջ 88.5 մլն խմ ջուր, որի արդյունքում ոռոգման ջրի ծախսը կնվազի 2-3 անգամ: Որոշման նախագծի ընդունումը հնարավորություն կտա այդ տարածքներում աճեցնել ջրախնայող մշակաբույսեր. կաթիլային, անձրեւացման ոռոգման համակարգերով ջուրը կօգտագործվի արդյունավետ եղանակով: Եվ գյուղատնտեսական մշակաբույսերով զբաղեցված այն հողատարածքները, որոնք ընդգրկված են ՋՕԸ-երի սպասարկման տարածքներում՝ բացառությամբ ջերմատների եւ ջերմոցային տնտեսությունների, այն ֆիզիկական եւ իրավաբանական անձինք, ովքեր ՋՕԸ-երի անդամներ են, եւ ովքեր մինչեւ 3 հա հողատարածքներում կաթիլային, անձրեւացման ոռոգման արդի համակարգերում կկատարեն ներդրում, կստանան ոռոգման ջրի վարձավճարի փոխհատուցում՝ 5 տարի ժամկետով:
Ծրագրի շահառու դառնալու նախապայմանն է կաթիլային կամ անձրեւացման ոռոգման համակարգեր ներդրած շահառուների կողմից դիմումի ներկայացումը։
Ծրագրին մասնակցելու համար կաթիլային, անձրեւացման ոռոգման համակարգ ներդրած գյուղատնտեսությամբ զբաղվող անձը դիմում պետք է ներկայացնի այն ՋՕԸ-ին, որի անդամ է։ Ստանալով դիմումը՝ ՋՕԸ-ն կուսումնասիրի դրա համապատասխանությունը ծրագրին եւ եզրակացություն կկազմի։ Որպես ծրագրից օգտվելու նախապայման՝ շահառուն պարտավորվում է սահմանազատման կետում տեղադրել առցանց հաղորդող ջրաչափ սարքավորում՝ առցանց վերահսկելու համար, մուտքի բանալին (կոդը) տրամադրում է ՋՕԸ-ին եւ ջրային կոմիտեին:
Գանք ոռոգման ջրի վարձավճարի փոխհատուցման կարգին։ Յուրաքանչյուր ՋՕԸ իր ընկերության սպասարկման տարածքի ծրագրի շահառուներին մատակարարած ոռոգման ջրի վարձավճարի մասին կկազմի ամփոփ տեղեկատվություն եւ մինչեւ հաշվետու ամսվան հաջորդող ամսվա 15-ը կներկայացնի ջրային կոմիտե։ Վերջինս, ամփոփելով բոլոր ՋՕԸ-երից ստացված տեղեկատվությունը, մինչեւ հաշվետու եռամսյակին հաջորդող ամսվա 25-ը կմշակի եւ կներկայացնի կառավարության որոշման նախագիծ՝ վարձավճարների փոխհատուցման մասին։
Հավելենք, որ ջրօգտագործողին, ըստ պահանջի, կարող է տրամադրվել տեղեկանք կամ անդորրագիր փոխհատուցման մասին՝ ՋՕԸ-երի կողմից միջինացված սակագնի եւ ջրօգտագործողների օգտագործած ծավալների փաստացի չափով։
