Կառավարությունը երեկվա նիստում որոշեց կրթության, գիտության, մշակույթի եւ սպորտի նախարարության 2021 թ. հաստատված բյուջեով նախատեսված ծրագրերից վերաբաշխել 29,915.0 հազար դրամ։
Այս գումարից 7,915.0 հազար դրամը դրամաշնորհային պայմանագրի հիման վրա կհատկացվի «Վանաձորի մաթեմատիկայի եւ բնագիտության առարկաների խորացված ուսուցմամբ հատուկ դպրոց» ՊՈԱԿ-ին՝ լոկալ ջեռուցման համակարգի տեղադրման համար (բյուջետային ծախսերի տնտեսագիտական դասակարգման «Կապիտալ դրամաշնորհներ պետական եւ համայնքային ոչ առեւտրային կազմակերպություններին» հոդվածով): Իսկ 22,000.0 հազար դրամը, դարձյալ դրամաշնորհային պայմանագրի հիմամբ, կհատկացվի «Կրթական տեխնոլոգիաների ազգային կենտրոն» ՊՈԱԿ-ին՝ 2021 թ. սեպտեմբեր-դեկտեմբերին հեռավար կրթություն կազմակերպելու նպատակով:
Կրթության, գիտության, մշակույթի եւ սպորտի նախարար Վահրամ Դումանյանը նշում է, որ Վանաձորի մաթեմատիկայի եւ բնագիտության առարկաների խորացված ուսուցմամբ հատուկ դպրոցը մինչ օրս ջեռուցումն իրականացնում է գազի վառարանների միջոցով. «Եվ դասապրոցեսը ձմեռվա ցուրտ օրերին ավելի բարենպաստ պայմաններում կազմակերպելու նպատակով անհրաժեշտություն է առաջացել անցկացնել լոկալ ջեռուցման համակարգ»:
Համաձայն կազմված եւ «Վանարխ» ՍՊԸ-ի կողմից ստացված ու փորձաքննություն անցած նախագծանախահաշվային փաստաթղթերի՝ Վանաձորի մաթեմատիկայի եւ բնագիտության առարկաների խորացված ուսուցմամբ հատուկ դպրոցի լոկալ ջեռուցման համակարգի անցկացման աշխատանքները իրականացնելու ընդհանուր արժեքը կազմում է հենց 7,915.0 հազար դրամ:
Կառավարության նույն որոշմամբ՝ առողջապահության նախարարի 2020 թ. սեպտեմբերի 18-ի հրամանով սահմանված՝ ռիսկային խմբում գտնվող աշխատողների եւ սովորողների համար ԿԳՄՍ նախարարության կողմից ՀՈՒԿ-ի միջոցով կազմակերպվում է հեռավար կրթություն: Եվ, ըստ այդմ, անհրաժեշտ է 30 ուսուցիչներին վարձատրելու համար ամսական 180.0 հազար դրամ դրույքաչափով։ Յուրաքանչյուր ամիս անհրաժեշտ կլինի 6 մլն 480 հազ. դրամ (30x180000x1.2=6480000)՝ ներառյալ հարկերը։ Մանկավարժներին մինչեւ տարեվերջ վարձատրելու համար անհրաժեշտ 25,920.0 հազար դրամ գումարից 3,920.0 հազար դրամը «Կրթական տեխնոլոգիաների ազգային կենտրոն» ՊՈԱԿ-ը կիրականացնի կազմակերպության կանխատեսվող խնայողությունների հաշվին, ուստի ծրագրի իրականացման համար անհրաժեշտ է լրացուցիչ 22 մլն դրամ։
Կառավարության երեկվա նիստի չզեկուցվող հարցերից մեկն էլ վերաբերում էր հրաձգության հանրապետական մարզադպրոցին։ Ըստ ԿԳՄՍ նախարարության, այս մարզադպրոցի հիմնական նպատակը «ֆիզիկական կուլտուրայի եւ սպորտի միջոցով պարապողների առողջության պահպանումն ու ամրապնդումն է, ազգային եւ համամարդկային արժեքների ոգով դաստիարակված անձի ու քաղաքացու համակողմանի ձեւավորումը, ընտրած մարզաձեւում պարապողների մարզական ընդունակությունների կատարելագործումը, հատուկ մարզական պատրաստության միջոցով ՀՀ ազգային հավաքական թիմերի համար հերթափոխի պատրաստումը եւ համալրումը, սովորողների ազատ ժամանցի կազմակերպման միջոցով նրանց հետաքրքրությունների զարգացման համար պայմաններ ստեղծելը»:
Այժմ մարզադպրոցի 10 մարզիչ-մանկավարժ 18 խմբում մարզում են շուրջ 150 սանի, որոնք ՀՀ տարբեր տարիքային հավաքական թիմի անդամներ են:
Կառավարության 2018 թ. ապրիլի 12-ի «Անշարժ գույքի հետ վերցնելու եւ ամրացնելու մասին» որոշմամբ Երեւանի Քանաքեռ ՀԷԿ 23 հասցեում գտնվող երկհարկանի ուսումնական մասնաշենքի մի մասն անժամկետ, անհատույց օգտագործման իրավունքով ամրացվել է «Հրաձգության հանրապետական մարզադպրոց» ՊՈԱԿ-ին։ Այս անշարժ գույքը ներկայումս ոչ բարվոք վիճակում է, եւ մարզադպրոցի բնականոն աշխատանքն ու ուսումնամարզական գործընթացը բարելավելու նպատակով անհրաժեշտ է կատարել վերանորոգում, ներքին հարդարում, ձեռք բերել համապատասխան գույք ու սարքավորումներ, մարզական գույք, ինչպեսեւ՝ կատարել այլ անհրաժեշտ ծախսեր: Հիմա առաջարկվում է կատարել վերաբաշխում եւ 2021 թ. պետբյուջեով նախարարությանը հատկացված գումարներից 20847.6 հազար դրամ հատկացնել մարզադպրոցին։
