Գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի կամ նյութերի նկատմամբ սակագնային, մասնավորապես, ներմուծման մաքսատուրքից ազատելու արտոնությունից օգտվելու համար «Ա-Ս ԷՆԵՐՋԻ» ՍՊԸ-ի կողմից ներկայացված հայտը կառավարության երեկվա նիստում բավարարվեց։
Ըստ էկոնոմիկայի նախարարության, նշյալ ընկերության կողմից իրականացվող ներդրումային ծրագրի շրջանակներում տեխնոլոգիական սարքավորումների, դրանց բաղկացուցիչ ու համալրող մասերի, հումքի կամ նյութերի ներմուծումն իրականացվելու է սույն որոշումն ուժի մեջ մտնելուց հետո 6 ամսվա ընթացքում։ Ծրագրի իրականացման ժամկետը սույն որոշումն ուժի մեջ մտնելուց հետո 1 տարի է։ Մալուխների, ուժային տրանսֆորմատորի, արեւային կայանը կրող կոնստրուկցիայի ծագման երկիրը Չինաստանն է, ընդհանուր արժեքը` 312 մլն 630 հազ. դրամ:
«Ա-Ս ԷՆԵՐՋԻ» ընկերության կողմից ներմուծվող սարքավորումները նախատեսված են Գեղարքունիքի մարզի Աստղաձոր համայնքում 5 ՄՎտ դրվածքային հզորությամբ արեւային կայան կառուցելու համար։ Կայանի կառուցման եւ սարքավորումներով համալրման գործընթացը հիմնված է ժամանակակից առաջատար տեխնոլոգիաների վրա։ Կառուցման, փորձարկման եւ գործարկման համար անհրաժեշտ ներդրումների ընդհանուր գումարը կազմում է մոտ 1.65 մլրդ դրամ։ Նախատեսվում է տեղադրել բարձր արդյունավետությամբ «Risen Energy» ընկերության երկերեսանի մոնոբյուրեղային ՖՎ մոդուլներ, որոնց հզորության նվազեցումը չի գերազանցում տարեկան 0.5 տոկոսը: Նախագծում օգտագործվելու են «Huawei» ընկերության արտադրության ինվերտորներ (փոխակերպիչներ): Արեւային վահանակների շարժական կրող կոնստրուկցիան կներմուծվի «Arctech» ընկերությունից։
Արտադրված էլեկտրաէներգիան ամբողջությամբ վաճառվելու է «ՀԷՑ» ՓԲԸ-ին։ Կա ՀՀ հանրային ծառայությունները կարգավորող հանձնաժողովի տված՝ էլեկտրական էներգիայի արտադրության (հզորության) լիցենզիան։ Ըստ էկոնոմիկայի նախարարության, ներդրումների մոտ 80 տոկոսը կատարված է, այդ թվում՝ ծրագրի շրջանակներում ձեռք է բերվել հողամաս, իրականացվել են շինարարություն, նախագծային աշխատանքներ, կատարվել են վճարումներ սարքավորումների դիմաց։ Ծրագրի շրջանակում նախատեսվում է ստեղծել 4 աշխատատեղ՝ 250 հազ. դրամ աշխատավարձով։ Արտադրանքի ընդհանուր ծավալը տարեկան կկազմի շուրջ 230 մլն դրամ, որն ամբողջությամբ կիրացվի ՀՀ տարածքում:
Արտոնություն ստանալու համար ներկայացված ապրանքների արժեքը, ինչպես ասացինք, կազմում է 312.6 մլն դրամ: Մաքսատուրքից ազատման արտոնությունը 30.6 մլն դրամ է: Ներմուծվող ապրանքները չեն ներմուծվում ԵԱՏՄ անդամ երկրներից, քանի որ չեն բավարարում ընկերության տեխնիկական պահանջներին։
Նախարարությունը հայտնում է, որ «Գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը կամ նյութերը ներմուծման մաքսատուրքից ազատման արտոնությունից օգտվելու համար «Ա-Ս ԷՆԵՐՋԻ» ընկերության կողմից ներկայացված հայտը բավարարելու եւ արտոնությունը կիրառելու մասին» կառավարության որոշման նախագիծը բխում է կառավարության 2021-2026 թթ. ծրագրի «3.4 Էներգետիկա» կետից։ «Արտոնության առկայությունը լուրջ խթան կլինի նոր ներդրումային ծրագրերի իրականացման եւ, որպես հետեւանք, նոր աշխատատեղերի ստեղծման, ներդրումների ներգրավման, տեղական արտադրության եւ արտահանման խթանման համար, ինչպես նաեւ կնպաստի, որ մինչեւ 2030 թ. արեւային էներգիայի արտադրության բաժինն ընդհանուրի մեջ հասցվի առնվազն 15 տոկոսի»։
Այս որոշմամբ պայմանավորված պետական բյուջեում կամ տեղական ինքնակառավարման մարմնի բյուջեում ծախսերի կամ եկամուտների ավելացում կամ նվազեցում չի նախատեսվում: Ամփոփաթերթի համաձայն, Պետեկամուտների կոմիտեն հայտնել է, որ «Ա-Ս ԷՆԵՐՋԻ» ընկերությունը (գրանցված 29.03.2017 թ.) գործում է հարկման ընդհանուր համակարգում, ըստ ներկայացրած վերջին՝ 2021 թ. ապրիլ ամսվա եկամտային հարկի եւ սոցիալական վճարի ամսական հաշվարկի, ունի 1 հարկման բազա ունեցող վարձու աշխատող, որի հարկման բազան կազմում է 343 հազ. դրամ: Ինչ վերաբերում է ընկերության շրջանառությունից ստացված տարեկան հասույթներին, ապա ՊԵԿ-ը տեղեկացնում է, որ ընկերության կողմից 2019-2020 թթ. իրացման շրջանառություն չի հայտարարագրվել, իսկ դիմումին կից ներկայացված 2021 թ. վերաբերող տեղեկատվությունը չի համընկնում հարկային մարմնի տեղեկատվական բազայում առկա տվյալների հետ, «ուստի վերջինս հարկային գաղտնիք է եւ ենթակա չէ տրամադրման», իսկ 2021 թ. հունիսի 1-ի դրությամբ ընկերությունը չունի հարկային մարմնի կողմից վերահսկվող եկամուտների գծով պարտավորություն:
