«Skoda JS» ընկերության հրավերով դեկտեմբերի 2-րդ տասնօրյակում Չեխիայի Հանրապետությունում էին «ՀԱԷԿ» ՓԲԸ գլխավոր տնօրենն ու գլխավոր տնօրենի առաջին տեղակալը։ Նկատենք, որ այս ընկերության հետ հայկական ԱԷԿ-ը ակտիվ համագործակցում է դեռ 2004-ից, եւ այս ընկերությունն է, որ մեր ԱԷԿ-ում հենց այդ տարվանից ստուգում է ռեակտորի իրանի մետաղը, մատակարարում է ռեակտորի եւ շոգեգեներատորների պահեստամասեր՝ վերանորոգման համար։
Ինչեւէ, ի՞նչ նպատակով էր Չեխիա այցը, հատկապես ի՞նչ է հետաքրքրել հայկական կողմին, փոխադարձ կարեւորություն ունեցող ի՞նչ հարցեր են քննարկվել. «ՀՀ»-ն փորձեց տեղեկանալ «ՀԱԷԿ» ՓԲԸ-ի գլխավոր տնօրենի առաջին տեղակալ-ՀԱԷԿ-ի տնօրեն Մովսես Վարդանյանից։
ՀԱԷԿ-ի տնօրենը նախ ասաց, որ աշխատանքային այցի նպատակն էր տեղում ծանոթանալ ռեակտորի բաղադրատարրերի եւ աշխատած միջուկային վառելիքի պահման կոնտեյներների արտադրության հրապարակներին, ինչպես նաեւ վառելիքի խտացված պահման համար նախատեսված դարակաշարերին: «Նրանք ոչ միայն աշխատած միջուկային վառելիքի պահպանման հատուկ տարրաներ են արտադրում, այլեւ բարձր ակտիվությամբ թափոնների տարրաներ։ 2023 թ. մենք պետք է աշխատած միջուկային վառելիքի պահման 4-րդ պահեստարանի շինարարությունն անենք: Որովհետեւ երբ քայլեր ենք ձեռնարկում ԱԷԿ-ի շահագործման ժամկետի երկարաձգման (նաեւ՝ կրկնակի երկարաձգման,- Ա.Մ.) ուղղությամբ, ուրեմն պետք է ռազմավարություն ունենանք, այն է՝ ոչ միայն կարող ենք կայանն աշխատեցնել, այլեւ՝ պահպանել աշխատած միջուկային վառելիքը։ Գործն այսօրվանից ենք անում։ Իսկ «Skoda»-ն ունի եվրոպական ստանդարտներով սերտիֆիկացված կոնտեյներներ, մտել ենք արտադրության հրապարակ, ծանոթացել աշխատանքին՝ ինչ սերտիֆիկատներ ունեն, ինչ հիմնավորումներ եւ այլն»,- ասաց Մ. Վարդանյանը։
Նա միաժամանակ հավելեց, թե հայկական ԱԷԿ-ի ղեկավարները, նախատեսված ծրագրի համաձայն, այցելել են նաեւ Դուկովանի ԱԷԿ: Եվ չեխական ատոմակայանի վերահսկվող գոտում հնարավորություն են ունեցել ամենամյա պլանային վերանորոգման փուլում գտնվող թիվ 2 էներգաբլոկում ծանոթանալ վերանորոգվող սարքավորումներին, համակարգերին եւ իրականացվող աշխատանքներին:
Հայկական կողմն աշխատանքային հանդիպումներ է ունեցել նաեւ չեխական «Bria s.r.o.» եւ «TacticWare s.r.o.» ընկերությունների ղեկավար անձնակազմի հետ, այցելել են փորձարկադաշտ (պոլիգոն) եւ մասնակցել պարագծի անվտանգության ապահովման նախագծի շրջանակներում իրականացվող փորձարկումներին:
Աշխատանքային հանդիպումների ընթացքում դիտարկվել են փոխադարձ կարեւորություն ունեցող մի շարք հարցեր, որոնք կնպաստեն ոչ միայն հայ-չեխական համագործակցության ընդլայնմանը, այլեւ հետագա զարգացմանը:
