Երկու օր առաջ ԱԺ-ում ՀՀ 2021 թ. պետական բյուջեի կատարման տարեկան հաշվետվության քննարկման ժամանակ տարածքային կառավարման եւ ենթակառուցվածքների նախարարը, անդրադառնալով հայկական ատոմակայանի աշխատանքին, նշել է, թե «ամեն տարի որոշակի պարբերականությամբ ատոմակայանը կանգնում է, որոշակի վերանորոգման փուլ է անցնում։ Նախորդ տարի բավական ծավալուն փուլ էր, կարեւոր հատվածներում փոփոխություններ տեղի ունեցան, վերջում մի կարեւոր ձեռքբերում ունեցանք՝ 1995-ից սկսած՝ ատոմակայանն աշխատել է իր հզորության 92 տոկոսի չափով, իսկ անցած տարի կապիտալ փոփոխություններից հետո առաջին անգամ սկսել է աշխատել հնարավորության 98 տոկոսի չափով»։
«ՀՀ»-ն փորձեց պարզաբանում մտցնել տոկոսային այս հատվածում, վերագործարկումից հետո ինչո՞ւ է ատոմակայանն աշխատել միայն 92 տոկոսի չափով, որ 98-ն արդեն ձեռքբերում է համարվում, եւ ինչն է խանգարում ցուցանիշը հասցնել 100 տոկոսի։ «ՀԱԷԿ» ՓԲԸ գլխավոր տնօրենի առաջին տեղակալ-Հայկական ԱԷԿ-ի տնօրեն Մովսես Վարդանյանը երեկ մեզ հետ զրույցում բացատրեց, որ երբ 1995 թ. վերագործարկեցինք կայանը եւ միացանք էներգահամակարգին, մեր կարգավորող մարմինը՝ Միջուկային անվտանգության կարգավորման կոմիտեն, թույլատրեց 92 տոկոս ջերմային հզորությամբ աշխատել։
«92 տոկոսով աշխատել ենք մինչեւ 2016 թ.։ Իսկ 2016-2017 թթ. որոշեցինք շահագործման ժամկետների երկարացման շրջանակներում դուրս գալ 100 տոկոսի սահմանագիծ։ Այդ ընթացքում բոլոր փոփոխություններն ու հիմնավորումները հենց 100 տոկոս հզորության համար էինք կատարում։ Նախորդ տարի ( 2021 թ. պլանային նախազգուշական վերանորոգման ընթացքում, երբ 141-օրյա կանգ եղավ,- Ա.Մ.) ռեակտորի վթարային հովացման համակարգը տեղադրեցինք։ Գումարած ամենակարեւորը՝ ունենք մի համակարգ, որ կոչվում է ռեակտորի ներքին հսկման համակարգ, որը ջերմաստիճանից, ծախսից կախված հաշվարկներ է անում, ռեակտորի հզորությունը գնահատում։ Դրա համար նորից դիմեցինք կարգավորող մարմին, որ դուրս գանք 100 տոկոս հզորության արդեն։ Կարգավորող մարմինը թույլ տվեց 98 տոկոս։ Այս տարի նորից ենք դիմել՝ 100 տոկոսի համար»,- ասաց ՀԱԷԿ-ի տնօրենը։
Նկատենք՝ 100 տոկոս ցուցանիշը մեզ համար նորություն չէ։ ՀԱԷԿ-ի՝ 1995 թ. վերագործարկումից առաջ, խորհրդային շրջանում աշխատել ենք 100 տոկոսով։
Այս տարվա ՊՆՎ-ն արդեն ավարտին է մոտենում։ Մ. Վարդանյանի խոսքով՝ ապրիլի 16-ից ատոմակայանում ընթանում են պլանային նախազգուշական վերանորոգման աշխատանքները: Ըստ սահմանված ցանցային գրաֆիկի` մինչ օրս կատարվել են անվտանգության համակարգերի եւ հիմնական սարքավորումների հետ կապված բոլոր նախատեսված աշխատանքները: Սահմանված ժամկետում իրականացվել է ռեակտորի միջին վերանորոգում՝ ակտիվ գոտու վերաբեռնմամբ: Ավարտվել են ակտիվ գոտու վթարային հովացման համակարգի արդիականացման աշխատանքները: Համակարգի առավել հուսալի եւ անխափան աշխատանքն ապահովելու նպատակով բարձր ճնշման նախկին 6 պոմպերից 2-ը փոխարինվել են ցածր ճնշման պոմպերով, ինչը կմեծացնի համակարգի՝ ակտիվ գոտին հովացնելու կարողությունը առաջին կոնտուրի ցածր ճնշման դեպքում:
«ՊՆՎ-ի շրջանակներում արդիականացվել են տուրբոգեներատորի օժանդակ սարքավորումներն ու նրանց ղեկավարման վահանակները, վերանորոգվել է տուրբինների կոնդենսատորների շրջանառու ջրամատակարարման համակարգը: Ընթացքի մեջ են թիվ 1 հովացման աշտարակի արդիականացման աշխատանքները: Աշխատանքներն ընթանում են սահմանված ժամանակացույցով: Համապատասխան փորձարկումներից եւ ստուգումներից հետո ՀՀ ՄԱԿ կոմիտեի տրամադրած լիցենզիայի հիման վրա թիվ 2 էներգաբլոկը կմիանա ՀՀ էներգահամակարգին»,- նշեց մեր զրուցակիցը:
Էներգահամակարգին թիվ 2 Էներգաբլոկի միացումը նախատեսված է հունիսի 28-ին, բայց հնարավոր է՝ մի քանի օր շուտ էլ լինի։
