Կառավարության 2020 թ. փետրվարի 13-ի թիվ 171-Ն որոշման մեջ լրացումներ կլինեն։ Գործադիրն այն երեկվա նիստում հավանության է արժանացրել չզեկուցվող հարցերի շարքում։
Ինչպես տեղեկանում ենք ֆինանսների նախարարությունից, նպատակը ԱՏԳ ԱԱ 2404 11 000 9, 2404 12 000 0, 2404 19 000 եւ 8543 40 000 0 ծածկագրերին դասվող՝ համապատասխանաբար՝ ծխախոտային արտադրանքի գլանակների, հեղուկ քարթրիջների, էլեկտրոնային սիգարետներ եւ համանման անհատական էլեկտրոնային գոլորշիացնող սարքավորումների` անհատ ձեռնարկատեր չհանդիսացող ֆիզիկական անձանց կողմից Եվրասիական տնտեսական միության անդամ պետություններից Հայաստան ներմուծելու դեպքերում առեւտրային չափաքանակներ սահմանելն է:
Բանն այն է, որ գործող օրենսդրությամբ նշյալ ծածկագրերին դասվող նշյալ ապրանքների մասով անհատ ձեռնարկատեր չհանդիսացող ֆիզիկական անձանց կողմից ԵԱՏՄ պետություններից Հայաստան ներմուծելու դեպքերում առեւտրային չափաքանակներ սահմանված չեն: Եվ խնդիրն այն է, որ (լրատվությունը բացառապես ֆինանսների նախարարությանն է,- Ա. Մ.) անհատ ձեռնարկատեր չհանդիսացող ֆիզիկական անձանց կողմից խնդրո առարկա ապրանքներն առանց հարկեր վճարելու անսահմանափակ քանակով կարող են ԵԱՏՄ-ից ներմուծվել Հայաստան, «ինչը կհանգեցնի պետական բյուջեի եկամուտների նվազման եւ անհավասար մրցակցային պայմանների ստեղծման»:
Բացի այդ՝ ֆիննախը մշակել է Հարկային օրենսգրքում լրացումներ եւ փոփոխություններ կատարելու նախագիծ, որով առաջարկվում է հիշյալ ծածկագրերին դասվող՝ ծխախոտային արտադրանքի գլանակները, հեղուկ քարթրիջները հարկել ակցիզային հարկով: Այս պարագայում նախագծով առաջարկվող սահմանաչափերի բացակայության դեպքում հնարավորություն կստեղծվի անհատ ձեռնարկատեր չհանդիսացող ֆիզիկական անձանց՝ ակցիզային հարկ վճարելը շրջանցելով, անսահմանափակ քանակով ԵԱՏՄ-ից Հայաստան ներմուծել այդ ապրանքները:
Այժմ առաջարկվում է այդ ծածկագրերին դասվող՝ ծխախոտային արտադրանքի գլանակների, հեղուկ քարթրիջների, էլեկտրոնային սիգարետների եւ համանման անհատական էլեկտրոնային գոլորշիացնող սարքավորումների՝ անհատ ձեռնարկատեր չհանդիսացող ֆիզիկական անձանց կողմից ԵԱՏՄ-ից մեր երկիր ներմուծելու դեպքում սահմանել առեւտրային չափաքանակներ: Այդ չափաքանակները գերազանցելու դեպքում գերազանցող մասը չի համարվելու անձնական օգտագործման ապրանքներ եւ ենթակա է լինելու հարկման:
Ըստ ֆինանսների նախարարության՝ սա բխում է հարկային եւ մաքսային վարչարարության սահմանած քաղաքականության ուղղություններից, ըստ որի՝ 1. նպատակ կա ապահովել հարկեր/ՀՆԱ ցուցանիշի բարելավում առնվազն 2.6 տոկոսային կետով՝ 2026 թ. հարկեր/ՀՆԱ ցուցանիշը հասցնելով առնվազն 25 տոկոսի, 2. հանրային ռեսուրսների կառավարման արդյունավետությունն ու հասցեականությունը կբարձրանա եւ այդ ռեսուրսները հանրօգուտ ու համապետական նշանակություն ունեցող ծրագրերի վրա կծախսվեն, ինչպես նաեւ հարկաբյուջետային կայունությունն ապահովելու նպատակով քայլեր կձեռնարկվեն հարկային եկամուտների ընդլայնման ուղղությամբ, 3. հարկային եւ մաքսային վարչարարության պարզեցման եւ դրա արդյունավետության բարձրացման միջոցով նվազագույնի կհասցվի ստվերային տնտեսությունը, եւ տնտեսավարողների գործունեության հավասար պայմաններ կերշխավորվեն:
Որոշումն ուժի մեջ կմտնի այս տարվա դեկտեմբերի 1-ից։
