Այսօր տարածաշրջանային զարգացումներին առնչվող Թուրքիայից եկող ազդակները հակասական բնույթ ունեն: Այս երկրի իշխանությունների դե ֆակտո խոսափող պարբերականը նույն օրը դրական լույսի ներքո անդրադառնում է Հայաստան-Թուրքիա կարգավորման գործընթացին, մյուս կողմից էլ այդ երկրի պաշտպանության նախարարը փաստացի խոսում է տարածաշրջանում սպառազինության մրցավազքին նոր մեկնարկ տալու մասին:
Նախօրեին «Sabah» թերթի կայքը հոդված էր հրապարակել հայ-թուրքական կարգավորման գործընթացի դրական ընթացքի վերաբերյալ՝ հղում անելով իր դիվանագիտական աղբյուրներին: Վերջինս հայ-թուրքական սահմանների բացումը կրկին կապել է հայ-ադրբեջանական վերջնական խաղաղության պայմանագրի կնքման հետ: Պարբերականը նաեւ հայտնել էր, որ Հայաստանի եւ Թուրքիայի հատուկ ներկայացուցիչներ Ռուբեն Ռուբինյանի եւ Սերդար Քըլըչի՝ հուլիսի 1-ին ընդունած որոշումներն ամբողջականացնելու նպատակով մոտ ապագայում ձեւավորվելու է մասնագիտական հանձնաժողով, իսկ նրանց հաջորդ հանդիպումը նախատեսվում է անցկացնել Թուրքիայում:
Նույն օրը ՀՀ ԱԳՆ մամուլի քարտուղար Վահան Հունանյանը «Արմենպրեսին» պարզաբանել է, որ Հայաստան-Թուրքիա կարգավորման գործընթացի հատուկ ներկայացուցիչների՝ առաջիկայում որեւէ վայրում կամ ժամկետում հանդիպելու վերաբերյալ որեւէ պայմանավորվածություն չկա, եւ նախատեսված է ընդամենը սահմանին Հայաստանի եւ Թուրքիայի համապատասխան գերատեսչությունների ներկայացուցիչների հանդիպում, որի ընթացքում քննարկվելու է ուղիղ ավիաբեռնափոխադրումներ սկսելու եւ երրորդ երկրների քաղաքացիների համար սահմանը բացելու պայմանավորվածությունների իրագործումը:
Տարածաշրջանային կարգավորումներին վերաբերող տեղեկատվությունների այս դրական հոսքի ֆոնին Թուրքիայի պաշտպանության նախարար Հուլուսի Աքարը նշել է, թե Թուրքիան ռազմարդյունաբերության ոլորտում այնքան է աճել եւ զարգացել, որ կարող է ապահովել նաեւ իր դաշնակիցների ու բարեկամ երկրների պաշտպանական կարիքները։ Այդ երկրների շարքում Աքարը շեշտել է Ադրբեջանին, Լիբիային, Կիպրոսի թուրքական հատվածին։
Սա օրինաչափ տարակուսանք է առաջացնում տարածաշրջանի երկրներում եւ խնդրի կարգավորմամբ շահագրգռված միջազգային կառույցների ներկայացուցիչների ու պաշտոնյաների շրջանում: Անկարան խոսում է իր դաշնակիցներին սպառազինելու պատրաստակամության մասին այն դեպքում, երբ վերջիններս ակտիվ կամ սառեցված հակամարտությունների մեջ են իրենց հարեւանների հետ: Օրինաչափ հարց է ծագում, թե ի՞նչ նպատակ է հետապնդում կարգավորման ակտիվ գործընթացի մեջ գտնվող Ադրբեջանին զինելու մասին հայտարարությունը:
Դրանով Թուրքիան խրախուսում է Ադրբեջանի ագրեսիվ գործողությունները ՀՀ-ի եւ Արցախի սահմաններին: Բնականաբար, սա չի կարող նպաստել խնդիրների խաղաղ լուծման ընթացքին եւ երկրների միջեւ հարաբերությունների կարգավորման բանակցություններին: Մյուս կողմից Թուրքիայի պաշտպանության նախարարի հայտարարությունը փաստացի նշանակում է, որ վերջինս ցանկանում է փոխարինել ռուսական սպառազինությունը տարածաշրջանի երկրներում, մասնավորապես՝ Ադրբեջանում, ինչը չի տեղավորվում նաեւ վերջերս այդքան թմբկահարվող ՌԴ-Թուրքիա լավ հարաբերությունների տրամաբանության մեջ:
Հարավային Կովկասում կարգավորման ակտիվ ընթացքի մեջ է վերջին տասնամյակների ամենաբարդ հիմնահարցերից մեկը՝ արցախյան խնդիրը, եւ երրորդ երկրները պետք է նպաստող քայլեր անեն բանակցությունների համար բարենպաստ նախադրյալներ ստեղծելու համար: Ինտենսիվ բանակցությունների մեջ գտնվող երկրին սպառազինելու մասին հայտարարությունները ոչ մի կերպ չեն կարող տեղավորվել տարածաշրջանային կարգավորման գործընթացների համատեքստում:
