Չնայած ռուս-ուկրաինական հակամարտությանը՝ ԵԱՀԿ Մինսկի խմբի համանախագահող երկրները զգալի ուշադրություն են հատկացնում արցախյան հիմնահարցի կարգավորման, Հայաստանի եւ Ադրբեջանի միջեւ խաղաղության համաձայնագրի մշակման գործընթացին: Այստեղ պետք է արձանագրել, որ վերջիններս իրենց այդ առաքելությունն իրականացնում են միմյանցից առանձին, սակայն, ըստ էության, նույն լուծումների եւ կարգավորումների միեւնույն տրամաբանության մեջ: Դատելով հանդիպումների վերաբերյալ հրապարակվող տեղեկատվությունից՝ կարելի է ասել, որ կարգավորումների տրամաբանության ներքո ԱՄՆ-ում, ԵՄ-ում եւ ՌԴ-ում տեղի ունեցող հանդիպումներին արձանագրվող ձեռքբերումները լրացնում են միմյանց:
Հայաստանի եւ Ադրբեջանի ղեկավարների, ԱԳ նախարարների եւ աշխատանքային խմբերի յուրաքանչյուր հանդիպման ժամանակ շեշտվում են նախորդ հանդիպումներում ձեռք բերված պայմանավորվածությունների կատարման ընթացքի վերաբերյալ ամրագրումները: Նախօրեին Հայաստանի ԱԳ նախարար Արարատ Միրզոյանի, Ադրբեջանի ԱԳ նախարար Ջեյհուն Բայրամովի եւ ԱՄՆ պետքարտուղար Էնթոնի Բլինքենի՝ ԱՄՆ մայրաքաղաք Վաշինգտոնում կայացած հանդիպման արդյունքներով նույնպես արձանագրվեց այդ փաստը։ Երկու կողմերը վերահաստատեցին հոկտեմբերի 6-ին Պրահայում եւ հոկտեմբերի 31-ին Սոչիում տեղի ունեցած հանդիպումներում Հայաստանի եւ Ադրբեջանի ղեկավարների ստանձնած հանձնառությունները: ԱՄՆ-ում կայացած հանդիպումից պարզ է դառնում, որ դեռ կան քննարկման եւ ճշգրտման հարցեր: Տարածված հաղորդագրության մեջ ասվում է, որ կողմերն արձանագրել են առկա մի շարք խնդիրներ, որոնք դեռեւս հասցեագրման կարիք ունեն, ուստի պայմանավորվել են թափ հաղորդել իրենց բանակցություններին եւ եւս մեկ հանդիպում անցկացնել առաջիկա շաբաթների ընթացքում:
Երկրների ԱԳ նախարարների հանդիպման արդյունքներից մեկն էլ այն է, որ անհրաժեշտ է հնարավորինս արագացնել կարգավորման գործընթացը: Այդ մասին հիշատակվում էր նաեւ Սոչիում կայացած վերջին հանդիպման արդյունքներով հրապարակված հայտարարության մեջ: Ուշագրավ է, որ Միրզոյանի եւ Բայրամովի վաշինգտոնյան այցի համատեքստում ԱՄՆ պետքարտուղարը նույնպես հիշատակում է 1991 թ. անկախացման գործընթացը, ինչպես շեշտադրվել է Սոչիում:
Այսպես՝ Բլինքենը հանդիպման առիթով տարածած իր ուղերձում ասել է. «ԱՄՆ-ն վճռական կերպով աջակցում է Հայաստանի եւ Ադրբեջանի ինքնիշխանությանն ու տարածքային ամբողջականությանը, եւ 1991 թ. անկախության վերականգնումը կենսական կարեւոր պահ էր երկու երկրների իրավունքների երաշխավորման համար, իրավունքներ, որոնց մենք մեծապես աջակցում ենք»: Պետքարտուղարը նաեւ նշել է, որ ԱՄՆ-ն՝ որպես Հայաստանի ու Ադրբեջանի բարեկամ, հանձնառություն է ստանձնում ամեն ինչ անել՝ աջակցելու խաղաղության հասնելու ջանքերին:
«Պատրաստակամ ենք քայլել ձեզ հետ տեւական խաղաղություն տանող ճանապարհով, օգնել` ինչով կարող ենք: Սա, կարծում եմ, ավելի լավ ու պայծառ ապագայի խոստում է։ Եվ ես ողջունում եմ եւ՛ ձեզ, եւ՛ ձեր կառավարություններին այն խիզախության եւ վճռականության համար, որ դուք ցուցաբերում եք այդ նպատակակետին հասնելու համար»,- հայտարարել է ԱՄՆ պետքարտուղարը՝ շեշտելով, որ 30 տարվա հակամարտությունը բազմաթիվ զրկանքների եւ մարդկային կորուստների պատճառ է դարձել:
Ստացվում է, որ աշխարհաքաղաքական տարբեր կենտրոններում առաջնայնություն է տրվում հայ-ադրբեջանական հարաբերությունների հնարավորինս արագ կարգավորմանը։ Բանակցությունների տրամաբանության մյուս առանձնահատկությունն այն է, որ խաղաղության հաստատման բանակցային շղթայից առանձնացվում է Արցախի Հանրապետության հիմնահարցը, ինչը տրամաբանական է, քանի որ այդ բարդ խնդրի լուծման համար տեւական քաղաքական բանակցություններ են անհրաժեշտ՝ բոլոր կողմերի ներգրավմամբ: Չնայած այսօր արագացված քայլեր են արվում հայ-ադրբեջանական հարաբերությունների կարգավորման ուղղությամբ, բայց անժխտելի ճշմարտություն է, որ տարածաշրջանում տեւական խաղաղության համար պետք է լուծվի արցախցիների իրավունքների հարցը, ինչն էլ կարմիր գծով երեւում է ընթացող գործընթացներում:
