Երեւանի Ամիրյան, Սարյան, Բուզանդի փողոցներով սահմանափակված տարածքի նկատմամբ հանրության գերակա շահ ճանաչվեց։ Որոշումը կառավարությունը կայացրեց երեկվա նիստում։
Գործադիրը որոշեց, որ օտարվող սեփականության տարածքում քաղաքաշինական ծրագրի իրականացման շահը գերակայում է oտարվող սեփականության սեփականատերերի շահերից, որովհետեւ՝ 1. օտարվող սեփականության տարածքում քաղաքաշինական ծրագրի իրականացմամբ Երեւանի կենտրոնից կվերանա այժմյան խառը, անկանոն կառուցապատումը` հին եւ խարխուլ, տարերայնորեն տեղադրված շինություններով, որոնց փոխարեն պետք է կառուցվի 1 բազմաբնակարան շենք եւ 1 հասարակական նշանակության շինություն՝ ստորգետնյա միասնական հարկերով: Ամբողջ տարածքը կառուցապատման քաղաքաշինական ծրագրերի շրջանակներում պետք է բարեկարգվի, համալրվի կանաչապատ տարածքով եւ խաղահրապարակով։ Նաեւ հիմնովին նորացվելու են ինժեներատեխնիկական ենթակառուցվածքները։ 2. Երեւանի գլխավոր հատակագծի, Կենտրոն վարչական շրջանի համաձայնեցված գոտեւորման նախագծի համաձայն՝ Գլխավոր պողոտայի տվյալ տարածքի համար նախատեսված է տարածքի արդիականացում, կիրառական ենթակառուցվածքների ամրացում։ Գործադիրը վստահ է, որ քաղաքաշինական ծրագրի արդյունավետ իրականացումը չի կարող ապահովվել առանց նշված սեփականության oբյեկտների oտարման, քանի որ դրանց անմիջական հարեւանությամբ գտնվող տարածքների համար նախագծվել եւ մասնակիորեն իրականացվել են համաքաղաքային ենթակառուցվածքների անբաժանելի մասը կազմող հանգույցներ, արդեն իսկ մասնակիորեն կառուցապատվել է Գլխավոր պողոտան։ Բացի այդ՝ անհնար է ապահովել տարածքների ջրամատակարարումը, ջրահեռացումը եւ քաղաքի համար կենսական նշանակություն ունեցող այլ պայմաններ, որոնք նախատեսված են Երեւանի գլխավոր հատակագծով:
Օտարվող սեփականության ձեռքբերող է «Ջի Էմ Դեվելոփեր» սահմանափակ պատասխանատվությամբ ընկերությունը։ Սեփականության օտարման գործընթացն սկսելու վերջնական ժամկետը 2024 թ. հունվարի 1-ն է։ Երեւանի քաղաքապետին առաջարկվել է որոշումն ուժի մեջ մտնելուն հաջորդող 7 օրվա ընթացքում որոշումը «պատշաճ ձեւով ուղարկել oտարվող uեփականության uեփականատերերին եւ oտարվող uեփականության նկատմամբ պետական գրանցում ունեցող գույքային իրավունքներ ունեցող անձանց»: Իսկ որոշումն ուժի մեջ է մտնում պաշտոնական հրապարակման oրվան հաջորդող 10-րդ oրը։
Վերոնշյալ տարածքի նկատմամբ հանրության գերակա շահը ճանաչվել է՝ հաշվի առնելով Երեւանի գլխավոր հատակագիծը եւ կառավարության 2006 թ. սեպտեմբերի 7-ի «Երեւանի գլխավոր հատակագծի (2006-2020 թթ.) իրականացման հիմնական միջոցառումների ծրագիրը հաստատելու մասին» թիվ 1402-Ն որոշումը։ Կառավարության 2021 թ. հուլիսի 29-ի որոշմամբ Երեւանի քաղաքապետը լիազորվել է ՀՀ անունից «Ջի Էմ Դեվելոփեր» ընկերության հետ կնքել սեփականության օտարման գործընթացի ընթացքում պետության եւ ձեռքբերողի իրավունքները, պարտականություններն ու պատասխանատվությունը սահմանող պայմանագիր: Ի դեպ, կառավարության 2007 թ. համապատասխան որոշմամբ տարածքի նկատմամբ արդեն իսկ ճանաչվել էր բացառիկ` գերակա հանրային շահ եւ տարածքի ձեռքբերող էր ճանաչվել «Լիդեր Մոբիլ» սահմանափակ պատասխանատվությամբ ընկերությունը: Բայց հետո այս ընկերությունը սնանկ էր ճանաչվել, եւ քաղաքաշինական ծրագիրը չէր իրականացվել։ Իսկ արդեն 2017 թ. արձանագրությամբ կառավարությունը հավանություն էր տրվել «Ջի Էմ Դեվելոփեր» ընկերության ներկայացրած՝ Կենտրոն վարչական շրջանում Երեւանի թատրոնի եւ կինոյի պետական ինստիտուտի եւ Մուշեղ Իշխանի անվան թիվ 5 հիմնական դպրոցի միջանկյալ տարածքում բազմաբնակարան շենքի կառուցման ներդրումային ծրագրին:
Այն կիրականացվի 2 փուլով։ 1-ին փուլում նշված ինստիտուտի եւ դպրոցին հարակից 1278.07 քմ ընդհանուր մակերեսով տարածքում կկառուցվի բազմաբնակարան շենք, մոտ 955.69 քմ հողամասի վրա կապամոնտաժվի եղած շենքը եւ կկառուցվի Սոս Սարգսյանի անվան համազգային թատրոնի նոր շենք։ 2-րդ փուլում նախատեսվել է Ամիրյան փողոցի 76-80, Բուզանդի փողոցի 103-105 հասցեներով սահմանափակված տարածքում նախկին ձեռքբերողի չիրականացրած քաղաքաշինական ծրագրի իրականացում՝ հասարակության եւ պետության կարիքների համար տարածքի իրացում: Ընկերությունն առաջին փուլով նախատեսվածն արել է, հիմա դիմել է ծրագրի 2-րդ փուլի իրականացման համար անհրաժեշտ գործառույթների իրականացման խնդրանքով, կցելով տարածքի կառուցապատման էսքիզը, համաձայն որի, հաշվի առնելով հարակից տարածքների արդեն իսկ խիտ կառուցապատված լինելու հանգամանքը, նախատեսվում է կառուցել 1 բազմաբնակարան շենք եւ 1 հասարակական նշանակության շինություն (երկու բազմաբնակարան շենքի փոխարեն)՝ ստորգետնյա միասնական հարկերով:
Սա հաշվի առնելով՝ տարածքի հանրային գերակա շահ ճանաչվող օտարման գոտին առաջարկվում է սահմանել մոտ 4090 քմ: Բացի այդ՝ 2017 թ. արձանագրության որոշման ընդունման պահին հողամասի 1 քմ կադաստրային արժեք սահմանված է եղել 60 հազ. դրամ, իսկ ներկայումս այն կազմում է 330 հազ. դրամ, ինչը լրացուցիչ ֆինանսական բեռ է ձեռքբերող կազմակերպության համար:
Մի խոսքով, ակնկալվում է, որ մասնավոր ներդրումների հաշվին Երեւանի կենտրոնից կվերանա կիuախարխուլ, ոչ uեյuմակայուն, հիմնականում վթարային բնակելի ֆոնդը եւ Գլխավոր պողոտայի տվյալ հատվածում կարդիականացվի տարածքը։ Պետական եւ տեղական ինքնակառավարման մարմինների բյուջեներում ծախսերի եւ եկամուտների էական ավելացում ու նվազեցում չի նախատեսվում:
