Ինչպես գիտենք, հունվարի 1-ից բարձրացավ խմելու ջրի սակագինը։ ՀՀ հանրային ծառայությունները կարգավորող հանձնաժողովը սահմանել է «Վեոլիա ջուր» ՓԲԸ-ի կողմից բաժանորդներին խմելու ջրի մատակարարման եւ ջրահեռացման (կեղտաջրերի մաքրման) ծառայությունների մատուցման սակագները: Ըստ այդմ, 2022 թ. սոցիալապես անապահով բաժանորդների համար սակագինը կմնա անփոփոխ՝ 180 դրամ, իսկ մյուս բաժանորդների համար կդառնա 200,47 դրամ: Հիշեցնենք, որ դեռ նախորդ տարի «Վեոլիա ջուրը» դիմել էր ՀԾԿՀ-ին ՝ ջրի սակագինը ավելի քան 40 դրամով թանկացնելու հայտով. այդ ժամանակ գործող 180 դրամի փոխարեն առաջարկվում էր 1 խմ-ի գինը դարձնել շուրջ 223 դրամ։
Այս տարվա փետրվարի 1-ից թանկանում է նաեւ էլեկտրաէներգիան։ Նշյալ հանձնաժողովը նախորդ տարի դեկտեմբերի 29-ի նիստում քննարկեց եւ սահմանեց «Հայաստանի էլեկտրական ցանցեր» ՓԲԸ-ի կողմից սպառողներին վաճառվող էլեկտրաէներգիայի սակագները։ Այսպիսով՝ 1. սոցիալապես անապահով ընտանիքների (բնակիչ-բաժանորդների շուրջ 11 տոկոսը) համար գործող սակագները կմնան անփոփոխ, 2. ամսական մինչեւ 200 կՎտժ սպառում ունեցող բնակիչների (բնակիչ-բաժանորդների 55 տոկոսը) համար սակագները կավելանան 1.5 դրամ/կՎտժ-ով (ներառյալ ԱԱՀ-ն), 3. ամսական 201-400 կՎտժ սպառում ունեցող բնակիչների (բնակիչ-բաժանորդների 25 տոկոսը) համար սակագները կավելանան 3.5 դրամ/կՎտժ-ով (ներառյալ ԱԱՀ-ն), 4. մնացած սպառողների համար սակագները կավելանան 5.5 դրամ/կՎտժ-ով (ներառյալ ԱԱՀ-ն)։
Գազը չի թանկանում։ Բայց այստեղ մի խնդիր կա։ Բանն այն է, որ կառավարությունը դեկտեմբերի 23-ի նիստում չզեկուցվող հարցերի շարքում հաստատել է մի որոշում, որով նախատեսվում է տարեկան 31,79 մլն ԱՄՆ դոլար գումար վճարել «Գազպրոմ Արմենիա» ՓԲԸ-ին՝ որպես վերջինին պատկանող Հրազդանի 5-րդ էներգաբլոկի տարեկան հզորության վճար։ Կառավարության որոշման հիմնավորումում նշվում է, որ Հրազդանի 5-րդ էներգաբլոկի թերբեռնվածությունը մեծապես պայմանավորված է եղել առեւտրային պայմանագրերի բացակայությամբ, ինչպես նաեւ Իրան-Հայաստան 400 կՎ էլեկտրահաղորդման գծի կառուցման ժամկետների ուշացմամբ։ Էներգաբլոկի ոչ լրիվ հզորությամբ աշխատելու հետեւանքով «Գազպրոմի» կողմից կատարված ներդրումները ոչ միայն ետ չեն գնվել, այլեւ վարկային պարտավորություններն ավելացել են՝ հասնելով շուրջ 100 մլն դոլարի։ Նշվում է նաեւ, որ համապատասխան արձանագրությամբ սահմանված պայամանների իրագործումը կնպաստի Հրազդանի 5-րդ էներգաբլոկի վերագործարկմանը, ինչպես նաեւ հնարավորություն կստեղծվի 10 տարվա կտրվածքով հաստատուն պահել Հայաստան մատակարարվող գազի գինը 165 ԱՄՆ դոլար՝ 1 հազար խմ-ի համար (7900 կկալ/խմ)։
Բացի վերը նշվածից, արձանագրությամբ նախատեսվում է «Երեւանի ՋԷԿ»-ի «Գազպրոմ Արմենիա» ՓԲԸ-ին ունեցած շուրջ 30 մլն դոլար պարտավորությունների մարման հետ կապված հարցերի կարգավորումը։ Արձանագրությունը կազմվել է ռուսական կողմի հետ շուրջ 2 տարի տեւած բանակցությունների արդյունքում։
Փաստորեն, գազը չթանկացավ, բայց մեր բյուջեի հաշվին։ Իսկ սակագնային հիշյալ բարձրացումերը հանգեցնելու են թանկացումների, գնաճի։ Ամանորից հետո առաջին անհրաժեշտության ապրանքների գնային պատկերը դա է ցույց տալիս։ Այստեղ մեկ այլ խնդիր էլ կա. այո, սոցիալապես անապահովների մասով եւ՛ ջրի սակագինը պահպանվեց, եւ՛ էլէներգիայի։ Ապահով խավը չի խեղճանա։ Մնաց մեծամասնությունը՝ երկու՝ անապահով եւ ապահով խավերի մեջտեղում գտնվողը (միջին խավ չենք կոչի)։ Ահա այս խավի համար են դժվար ժամանակները։ Այս խավը կրկին ստիպված է լինելու ձգել գոտիները, կրճատել ծախսերը։ Սա այն խավն է, որ իբրեւ անապահով փաստաթղթավորված չէ, բայց հազիվ հոգում է օրվա նվազագույն ծախսերը։ Սա այն խավն է, որի համար ծագող յուրաքանչյուր լրացուցիչ անհրաժեշտ ծախս (բժշկական անհետաձգելի միջամտության կարիք, մահվան դեպք եւ այլն) մեծ բեռ է։ Եվ պետությունը սոցիալ-տնտեսական քաղաքականության դաշտում որեւէ որոշում կայացնելիս չպետք է անտեսի նաեւ այս խավին, այլապես կունենաք աղքատության խորացման նորովի պատկեր։ Իսկ սա կարող է էլ ավելի բարդացնել տնտեսական մեր վիճակը։ Պետք են իրավիճակը շտկող լուծումներ եւ, հարկ եղած դեպքում, այո, ոչ ստանդարտ լուծումներ։
