2022 թ. պետբյուջեի մասին օրենքում եւ կառավարության 2021 թ. դեկտեմբերի 23-ի թիվ 2121-Ն որոշումում փոփոխություններ եւ լրացումներ կատարելու, Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Վայոց ձորի եւ Տավուշի մարզպետարաններին գումար հատկացնելու մասին հարցը երեկ քննարկվեց կառավարության նիստում։
Ըստ տարածքային կառավարման եւ ենթակառուցվածքների նախարար Գնել Սանոսյանի, նախագծի ընդունումը պայմանավորված է կառավարության 2006 թ. նոյեմբերի 16-ի «ՀՀ պետական բյուջեից համայնքներին սուբվենցիաների տրամադրման կարգը հաստատելու մասին» թիվ 1708-Ն որոշմամբ սահմանված կարգի դրույթների համաձայն` համայնքներից ստացված տնտեսական եւ սոցիալական ենթակառուցվածքների զարգացմանն ուղղված ծրագրերի արդյունավետ իրականացման անհրաժեշտությամբ:
Նշյալ կարգի դրույթների համաձայն` 2020 թ. սուբվենցիաներ ստանալու համար ծրագրային հայտերի գնահատման միջգերատեսչական հանձնաժողովի նիստերի ընթացքում քննարկվել եւ հանձնաժողովի կողմից հավանության է արժանացել 700 սուբվենցիոն ծրագիր, իսկ 2021-ին՝ 678: Ծրագրային հայտերը հիմնականում ուղղված են համայնքներում կապիտալ ներդրումներին` մասնավորապես՝ փողոցների, այգիների, պուրակների, խաղահրապարակների բարեկարգմանը, համայնքային շենքերի, մշակութային տների, մանկապարտեզների, հանդիսությունների սրահների կառուցմանն ու նորոգմանը, խմելու, կոյուղու, ոռոգման ջրագծերի կառուցմանն ու նորոգմանը եւ գիշերային լուսավորության անցկացմանը, բնակավայրերի գազաֆիկացմանը, բազմաբնակարան շենքերի ընդհանուր բաժնային սեփականության գույքի նորոգմանը՝ էներգախնայող միջոցառումների կիրառմամբ:
Նախարարի խոսքով՝ կառավարության 2021 թ. դեկտեմբերի 30-ի որոշմամբ հենց այդ տարի հաստատված եւ իրականացման փուլում գտնվող մի շարք ծրագրերի աշխատանքների գծով համայնքների հետ կնքված սուբվենցիայի տրամադրման մասին պայմանագրերի գործողության ժամկետը երակարաձգվել է մինչեւ 2022 թ. հոկտեմբերի 1-ը՝ եղանակային ոչ բարենպաստ պայմանների եւ կատարված աշխատանքների որակի պահպանման պատճառով:
46 համայնքներից անցկացվել է 62 ծրագրերի (որոնցից 59-ը հաստատվել է 2021 թ. սուբվենցիաներ ստանալու համար ծրագրային հայտերի գնահատման միջգերատեսչական հանձնաժողովի նիստերի ընթացքում, իսկ 3-ը՝ 2020-ին) գնումների գործընթացը։ Մրցույթների արդյունքների վերաբերյալ ներկայացվել են համապատասխան արձանագրություններ: Այդ ծրագրերի շինարարական աշխատանքների ու գույքի ձեռքբերման գործընթացներն ավարտվել են, եւ պետբյուջեից ֆինանսավորման անհրաժեշտություն է առաջացել։
Միաժամանակ, Արարատի մարզի Արեւաբույր համայնքի «Ղ. Աղայանի, Իսակովի, Հերացու, Մասիսի, Պ. Սեւակի, Մաշտոցի փողոցների գազաֆիկացման աշխատանքներ» ծրագրի համար կառավարության 2021 թ. որոշմամբ հատկացվել է գումար։ Սակայն տեխնիկական վրիպակի հետեւանքով ծրագրի վերնագրում Ջ. Աղայի փողոցի փոխարեն տպագրվել է Ղ. Աղայանի փողոց, ինչի պատճառով համայնքին գումարը չի վճարվել եւ վերադարձվել է պետբյուջե։ Այժմ ծրագրի անվանումը կշտկվի եւ գումարը կվճարվի համայնքին։
Մի խոսքով, 2022 թ. բյուջեից մարզպետարաններին կհատկացվի 1,608,376.4 հազար դրամ՝ համապատասխան շինարարական կազմակերպությունների նկատմամբ ֆինանսական պարտավորությունները կատարելու համար:
