ՀՀ գիտությունների ազգային ակադեմիայի երկրաբանական գիտությունների ինստիտուտում իրականացվել է Դիլիջան քաղաքի ջրահեռացման թունելի ուսումնասիրություն եւ գնահատում, կազմվել է ցամաքուրդային թունելի եռաչափ մոդելը, որի հիման վրա արդյունավետորեն կիրականացվեն հակասողանքային միջոցառումները: Աշխատանքները ղեկավարել է երկրաբանական գիտությունների թեկնածու Միքայել Գեւորգյանը: Այս մասին «ՀՀ»-ին տեղեկացրել են ԳԱԱ տեղեկատվական-վերլուծական ծառայությունից։
Մ. Գեւորգյանը նշել է, որ Դիլիջան քաղաքը գրեթե ամբողջությամբ կառուցված է սողանքային գոտում: Բոլոր ուսումնասիրություններն ու հետազոտությունները հանգեցրել են այն եզրակացության, որ մեծ զանգվածի սահքի հիմնական պատճառը գրունտների գերխոնավ եւ ջրհագեցած լինելն է: Սողանքային տարածքի կայունացման նպատակով կատարվել են մի շարք հակասողանքային միջոցառումներ, որոնցից առաջնայինը սողանքային մարմնով անցնող ցամաքուրդային թունելի կառուցումն էր։ Ջրհագեցվածությունը նվազեցնելու եւ սահքը կանգնեցնելու նպատակով խիստ կարեւոր է ցամաքուրդային թունելի անթերի շահագործումը: «Մեր հետազոտական աշխատանքների արդյունքների հիման վրա կազմվել է ցամաքուրդային թունելի եռաչափ մոդելը, որի հիման վրա էլ շարունակվել են հակասողանքային միջոցառումների աշխատանքները»,- հայտնել է Մ. Գեւորգյանը։
Տեղեկատվության նույն աղբյուրի համաձայն՝ ԳԱԱ երկրաբանական գիտությունների ինստիտուտի կողմից իրականացվել են մի շարք հետազոտություններ եւ վերլուծություններ, որոնց արդյունքում ստացված նոր տվյալների հիմամբ կառուցվել է Մեծ Թալա սողանքային մարմնի ջրահեռացման եւ ցամաքուրդային կառույցների (մակերեսային ու ստորգետնյա) թվային եռաչափ մոդելը, ինչը թույլ է տալիս առավել հստակ ուրվագծել սողանքի ներկայիս վիճակն ու խոչընդոտները՝ թունելի եւ ամբողջ ցամաքուրդային համակարգի արդյունավետ աշխատանքի համար:
Իմիջիայլոց, հետազոտական աշխատանքներն իրականացվել են կենտրոնական բանկի պատվերով։ Աշխատանքներում ներգրավված են եղել երիտասարդ գիտնականներ, ովքեր մասնակցել են ցամաքուրդային թունելի ներսում ուսումնասիրություններին, իրականացրել են չափագրումներ, գրանցումներ, մասնակցել են թունելի եռաչափ մոդելավորման աշխատանքներին։
Ի դեպ, դեռ 2005 թ. կազմած «Սողանքներ Հայաստանում» հաշվետվությունում նշվում է, որ ՀՀ-ում հայտնաբերվել են 2504 սողանքային տեղամասեր, իսկ 2008-2009 թթ. «Ջրհան» ՊՓԲԸ-ի ուսումնասիրությունների արդյունքում ներկայացված «ՀՀ տարածքի էկզոգեն (արտածին) երկրաբանական երեւույթների (սողանքների) մշտադիտարկումների եւ ամփոփագրի (կադաստրի) կազմման աշխատանքների» հաշվետվության մեջ ՀՀ տարածքում փաստագրվել է 387 սողանք, եւ կազմվել են նշված սողանքների ամփոփագրային տվյալները…
