Հայաստանի Հանրապետության նախագահի լիազորությունները կատարող Ալեն Սիմոնյանին երեկ հավատարմագրերն է հանձնել ՀՀ-ում Սերբիայի առաջին ռեզիդենտ դեսպան Տատյանա Պանայոտովիչ Ցվետկովիչը:
Ինչպես հայտնում են ՀՀ նախագահի աշխատակազմից, Ալեն Սիմոնյանը շնորհավորել է արտակարգ եւ լիազոր դեսպանին պաշտոնի ստանձնման առթիվ եւ հաջողություն մաղթել մեր երկրում դիվանագիտական առաքելությունն իրականացնելու գործում։
Նա նշել է՝ լիահույս է, որ դեսպանի պաշտոնավարման ընթացքում բարեկամ Սերբիայի հետ ընթացիկ ծրագրերի հետագա զարգացումը եւ նոր ծրագրերի մշակումը խորապես կնպաստեն երկու երկրների միջեւ առկա համագործակցությանը:
Խոսելով Հայաստանի եւ Սերբիայի միջեւ գոյություն ունեցող քաղաքական երկխոսությունից՝ Ալեն Սիմոնյանը կարեւորել է հետեւողական եւ լրացուցիչ ջանքերի ներդրումը հայ-սերբական երկկողմ եւ բազմակողմ փոխգործակցության օրակարգին նոր բովանդակություն եւ լիցք հաղորդելու ուղղությամբ:
