Գործադիրը երեկվա նիստում որոշել է 2018 թ. հուլիսի 19-ի «Հայաստանի Հանրապետությունում ագրոպարենային ոլորտի սարքավորումների լիզինգի աջակցության ծրագիրը հաստատելու մասին» թիվ 893-Լ որոշման մեջ փոփոխություններ կատարել։ Ըստ էկոնոմիկայի նախարարության, այդ փոփոխությունների ընդունումը պայմանավորված է 2018 թ. որոշմամբ հաստատված՝ ագրոպարենային ոլորտի սարքավորումների լիզինգի աջակցության ծրագրի շարունակականությունն ապահովելու եւ 2023 թ. հունվարի 1-ից հետո ծրագրի շրջանակներում տրամադրվող լիզինգների պայմանները հստակեցնելու անհրաժեշտությամբ (ամբողջ տեղեկությունը էկոնոմիկայի նախարարությանն է)։
Արդեն տարիներ գործող այս ծրագրում պարբերաբար փոփոխություններ ու լրացումներ արվել են, ըստ որոնց լիզինգի (ֆինանսական վարձակալություն) պայմանները փոխվել են՝ տվյալ ժամանակահատվածի խնդիրներով պայմանավորված։ Վերջին փոփոխության համաձայն՝ 2022 թ. ապրիլի 16-ից մինչեւ նույն տարվա դեկտեմբերի 31-ը տրամադրվող լիզինգների համար առավելագույն տոկոսադրույք չի սահմանվել եւ սուբսիդավորումը եղել է ՀՀ դրամով տրամադրված լիզինգի 10, արտարժույթով տրամադրված լիզինգի՝ 6 տոկոսային կետով, իսկ կառավարության 2014 թ. դեկտեմբերի 18-ի թիվ 1444-Ն որոշմամբ հաստատված սոցիալական աջակցություն ստացող սահմանամերձ համայնքների բնակավայրերի տարածքներում գործունեություն իրականացնող տնտեսավարողների համար՝ ՀՀ դրամով տրամադրված լիզինգի 12, արտարժույթով տրամադրված լիզինգի՝ 7 տոկոսային կետով, եթե ձեռք բերվող սարքավորումները շահագործվելու են նույն վայրերում։ Նշվում էր, որ 2022 թ. դեկտեմբերի 31-ից հետո նոր պայմաններ են լինելու. լիզինգների համար կսկսեն գործել նախկին պայմանները, ըստ որոնց լիզինգները տրամադրվելու են ՀՀ դրամով՝ տարեկան մինչեւ 12 տոկոս փաստացի տոկոսադրույքով, որի մինչեւ 10 տոկոսային կետը սուբսիդավորում է, արտարժույթով՝ տարեկան մինչեւ 9 տոկոս փաստացի տոկոսադրույքով, որի մինչեւ 6 տոկոսային կետը սուբսիդավորում է։ Իսկ 2014 թ. նշյալ որոշմամբ հաստատված սոցիալական աջակցություն ստացող սահմանամերձ բնակավայրերի տարածքներում գործունեություն իրականացնող տնտեսավարողների համար լիզինգի տոկոսադրույքն ամբողջությամբ սուբսիդավորվում է, եւ լիզինգառուի կողմից վճարվող լիզինգի տարեկան տոկոսադրույքը կազմում է 0 տոկոս։
Մինչդեռ ֆինանսական շուկայում ստեղծված ներկայիս իրավիճակով պայմանավորված՝ ծրագրին մասնակից ֆինանսական կառույցների կողմից 12 տոկոսով լիզինգի տրամադրումը շահավետ չէ, եւ ծրագրի շարունակականության ապահովումը կդառնա խնդրահարույց։
Ինչեւէ, որոշվեց, որ ագրոպարենային ոլորտի սարքավորումների լիզինգի աջակցության ծրագրի շրջանակներում 2023 թ. լիզինգները կտրամադրվեն հետեւյալ պայմաններով՝ 1. տրամադրվող լիզինգների առավելագույն տոկոսադրույք չի սահմանվում, 2. սուբսիդավորվում է ՀՀ դրամով տրամադրված լիզինգի 10, արտարժույթով տրամադրված լիզինգի՝ 6 տոկոսային կետը, իսկ 2014 թ. որոշմամբ հաստատված սոցիալական աջակցություն ստացող սահմանամերձ համայնքների բնակավայրերի տարածքներում գործունեություն իրականացնող տնտեսավարողների համար՝ դրամով տրամադրված լիզինգի 12, արտարժույթով տրամադրված լիզինգի՝ 7 տոկոսային կետը, եթե ձեռք բերվող սարքավորումները շահագործվելու են նույն վայրերում։
Ըստ էության՝ երեկվա նախագծով առաջարկվեց 2023 թ. ծրագիրը շարունակել մինչեւ 2022 թ. դեկտեմբերի 31-ը սահմանված պայմաններով։
Որոշման նախագիծը մշակել է միայն էկոնոմիկայի նախարարությունը, այլ կառույցներ ու անձինք մշակմանը չեն մասնակցել։
Նախագծի քննարկման ժամանակ արդարադատության նախարարությունն առաջարկել էր «կրկին քննարկել եւ հիմնավորել» տրամադրվող լիզինգի առավելագույն տոկոսադրույք չսահմանելու կարգավորման անհրաժեշտությունն ու նպատակահարմարությունը: «Քանի որ կարծում ենք,- նշել էր պատկան այս կառույցը,-որ տոկոսադրույքի առավելագույն չափ չսահմանելու դեպքում Հայաստանի Հանրապետության տարածքում գործող առեւտրային բանկերի կամ վարկային կազմակերպությունների կողմից կարող են սահմանվել այնպիսի տոկոսադրույքներ, որոնց պարագայում նույնպես հնարավոր չլինի ապահովել սուբսիդավորման ծրագրի արդյունավետությունն ու շարունակականությունը»: Արդարադատության նախարարության մտավախությանը գործադիրը համաձայն չէր, որովհետեւ «նման ռիսկ չի կանխատեսվում», քանզի ծրագրին մասնակցում են հանրապետության գրեթե բոլոր առեւտրային բանկերն ու վարկային կազմակերպությունները, եւ դրանց միջեւ առկա մրցակցությունը «կնպաստի շահառուների համար լիզինգի տոկոսադրույքի շահավետ ցածր վերին շեմի առաջարկմանը»:
