Հայաստանի արդյունաբերողների եւ գործարարների միության նախագահ Արսեն Ղազարյանը Գործարարի օրվա կապակցությամբ հանդես են կել ուղերձով, որը եւ ներկայացնում ենք մեր ընթերցողների ուշադրությանը:
«Հարգելի՛ հայրենակիցներ,
Սկսած 2017 թվականից՝ մարտի 3-ը մեր երկրում նշվում է որպես Գործարարի օր, որը համընկնում է նաեւ հայ մեծանուն բարերար Ալեքսանդր Մանթաշյանցի ծննդյան օրվա հետ՝ խորհրդանշելով հայ ձեռներեցության բարի ավանդույթների շարունակականությունը։
Անկախ Հայաստանի տնտեսությունն անցած ավելի քան երեսուն տարում ունեցել է զարգացման տարբեր շրջափուլեր՝ իրենց յուրահատկություններով, հիմնախնդիրներով, հնարավորություններով, որոնց հաղթահարումը, գաղափարները գործուն նախագծեր դարձնելու ոչ դյուրին աշխատանքը պատվով իր ուսերին է կրել գործարար հանրությունը։ Այսօր, հիրավի, կարող ենք արձանագրել, որ մեզանում ունենք ձեւավորված, կայացած եւ մրցունակ գործարար խավ, որը բանիմացությամբ կարողանում է զարգացում ապահովել տնտեսության ամենատարբեր ոլորտներում, նպաստել պետական բյուջեի շարունակական հարկային ավելացմանը, գործատեղերի ստեղծմանը, սոցիալ-տնտեսական խնդիրների հաղթահարմանը՝ հանրության առջեւ կորպորատիվ սոցիալական պատասխանատվության քաջ գիտակցմամբ։
Ներկայում էլ մենք հեշտ ժամանակներ չենք ապրում՝ աշխարհաքաղաքական բազմաթիվ մարտահրավերներ, տնտեսական եղած համակարգերի, շուկաների ձեւափոխություններ, լոգիստիկ, ֆինանսաբանկային խնդիրներ, հումքային եւ մարդկային ռեսուրսների հետ կապված բարդություններ, շարունակական հետապնդող մրցակցություն։ Այսօր մեզանից պահանջվում է առավել ջանասիրություն, նպատակասլացություն, նորարարություն, արդիական տեխնոլոգիաների ներգրավում, մրցակցային կարողությունների հզորացում, լայնախոհ մոտեցում։ Նաեւ՝ հասարակական ակտիվ դիրքորոշում՝ գործարար համայնք-հանրություն, մասնավոր հատված-պետություն ակտիվ երկխոսության ծավալում, իրավական դաշտի կատարելագործմանը հետեւողական ներգրավածություն, պետական ու ազգային շահերին սատարում։
Հարգելի՛ գործընկերներ, շնորհավորելով Գործարարի օրվա առիթով՝ ցանկանում եմ, որ յուրաքանչյուրս մեր ոլորտում գործենք առավել արդյունավետ, լինենք իրատես եւ նախաձեռնող, լավատես ու ստեղծարար, գրանցենք տնտեսական առաջընթաց՝ ի նպաստ պետության ամրության եւ ժողովրդի բարեկեցության»:
