Հայաստանից, սփյուռքից եւ Արցախից շուրջ 200 մասնակիցներ կհամախմբվեն մեկ նպատակի շուրջ՝ այսօր Երեւանում կմեկնարկի «Ապագա հայկականը» համաժողովը:
«Ապագա հայկականը» զարգացման հիմնադրամի գործադիր տնօրեն Արտակ Ապիտոնյանը նշեց, որ համաժողովին մասնակցելու նպատակով գրանցումը բաց է եղել հուլիս ամսվանից սկսած, եւ ընդհանուր մասնակցության հայտ են ներկայացրել 5714 քաղաքացիներ, որոնցից Հայաստանից են 3170-ը, սփյուռքից՝ 2334-ը եւ Արցախից՝ 209-ը:
«Առաջին համահայկական քաղաքացիական համաժողովին մասնակցելու համար գրանցվածներից արդեն ընտրվել են 200 մասնակից՝ ընտրված ներկայացուցչական ընտրանքի մեթոդով: Անաչառ վիճակահանության ապահովման նպատակով համակարգչային ծրագրի մշակումն իրականացրել են Վարդենիսի «Արմաթ» լաբորատորիայի սաները, որը մեզ համար շատ կարեւոր էր: Ցավոք, Արցախից ընտրված 10 մասնակիցներից 7-ը շրջափակման պատճառով չեն մասնակցի համաժողովին: «Ապագա հայկականը» նախաձեռնության համահիմնադիր Ռուբեն Վարդանյանը եւս, հասկանալի պատճառով, չի մասնակցի համաժողովին, իսկ Արցախից ընտրվածներից երեքը, որոնք մինչ շրջափակումը գտնվել են Հայաստանում, կմասնակցեն համաժողովին»,- ասաց Ապիտոնյանը:
Նա ընդգծեց, որ այս նախաձեռնությունը ձեւավորվել է դեռեւս 2021 թ. եւ մշակել է 15 համահայկական նպատակներ: Առաջին համաժողովը, որը կմեկնարկի այսօր, քննարկելու է այդ նպատակներից երեքը՝ Հայաստան-Սփյուռք միասնականություն, պատմական պատասխանատվություն եւ բնակչության աճ: Ըստ նրա՝ համաժողովի ընթացքում ընտրված մասնակիցներն ուսումնասիրելու են առկա մարտահրավերները եւ զարգացման հնարավոր սցենարները, ուրվագծելու են խնդիրների լուծման ուղղությունները եւ դրա արդյունքում ընդունելու են առաջարկությունների փաթեթ:
«Ավելի քան 100 հայազգի փորձագետներ 5 ամիս շարունակ աշխատել են փորձագիտական հանձնախմբերում: Ձեւավորված վերջնական սցենարներն ու ծրագրերը դրվելու են «Ապագա հայկականի» համաժողովի քննարկմանը»,- ասաց գործադիր տնօրենը։
Գործարար, բարերար, «Սոլարոն» (Solaron) ընկերության հիմնադիր, Հայաստանի գիտության եւ տեխնոլոգիաների հիմնադրամի (FAST) համահիմնադիր, «Ապագա հայկականը» նախաձեռնության համահիմնադիր Արթուր Ալավերդյանը նշեց, որ իրենք սահմանել են իրենց կարծիքով՝ Հայոց աշխարհի կարեւորոգույն 15 նպատակները. «Այդ գործընթացին մասնակցել են 1000-ից ավելի համանախաձեռնող, եւ 100 հազարից ավելի մարդ կիսում է այդ մոտեցումը եւ պատրաստ է մեզ հետ քննարկելու այդ կարեւորագույն հարցերը երկրի զարգացումների շուրջ, թե ինչպե՞ս հասնենք կայուն զարգացման եւ մեր նպատակներին»:
«Mlinda» եւ «The Good Investors» կազմակերպությունների հիմնադիր, «Ապագա հայկականը» նախաձեռնության համահիմնադիր Ռիչարդ Ազարնիան նշեց, որ կարեւոր է հասկանալ, թե նախաձեռնությունը ինչո՞ւ է այստեղ հասել. «Մեր կարծիքով՝ Հայաստանը եւ հայությունը հիմա այնպիսի հատուկ վիճակում է, որ նման դեպքերում սովորական մեթոդները գուցե չեն հերիքում, օրինակ՝ ընտրական ժողովրդավարությունն իր տեղն ու կարեւորությունն ունի, բայց մենք կարծում ենք, որ այս դժվարությունները, որ մենք ապրել ենք որպես երկիր, որպես ազգ՝ մանավանդ պատերազմից հետո, զայրույթը, անհասկացողությունը, վախը մեկ ընտրությամբ լուծել չի լինի, այսինքն այս հարցերի մասին պետք է խոսել, լսել, միասին հասկանալ, որից հետո միասին կգտնենք տարբեր ուղիներ, որպեսզի քայլենք դեպի մեր ապագան տարբեր ճանապարհներով»:
